الأسبوع ده و بالتحديد من 1 إلى 5 نوفمبر  مختلف جدا لأنه ببساطة هو الأسبوع الدولي للتوعية بالإجهاد و التوتر النفسي . 

أد ما أكيد سنة  2021 إدتنا أحداث جميلة تدعوا للإمتنان و التقدير  ، إلا إن –علي صعيد آخر – معدلات التوتر

العام زادت, مع إستمرار وجود وباء Covid-19  ,اللي تسبب في زيادة مشاكل الصحة النفسية ، وخاصة الشعور بالوحدة والحزن . 

يا سيدي كبر مخك؟  

الحقيقة كان بودي أكبر مخي بردو .. بس في عصرنا و في ظل وجود 74٪ من الأشخاص علي المستوي العالمي
غير قادرين على التعامل مع مستويات التوتر اللي بيواجهوها في حياتهم اليومية  ،و بالتالي بيتعرضوا 
لآثار نفسية جسيمة ناتجة عن التوتر زي شعور 61٪ منهم  بالقلق ، و 32٪ بتراودهم أفكار انتحارية..  
عشان كدة الموضوع حاليا طرح و معالجة الموضوع مش رفاهية أو وعي زيادة ،
تعلم مهارات إدارة التوتر و تنظيم المشاعر بشكل عام بقي شئ مهم و ضروري جدا . 


و بما إن أكثر أسباب التوتر و الإجهاد النفسي شيوعاً خاصة بين فئة الشباب بالذات هو الضغط للوصول للنجاح – قررنا نتكلم في مقال النهاردة عن شوية خطوات ممكن نقلل بيها  التوتر الناتج عن السعي للوصول للنجاح .. 
هنتكلم عن 7 طرق فعالة في الحفاظ على أدائك عالي  و النجاح في التعامل مع الضغط و الإجهاد النفسي  

خبر حلو 

أغلبنا بيقدر يتعامل مع ضغوط الحياة- إلى حد معين، و الحد ده بيفرق من شخص للتاني..  

في اللي بينهار تماما و في اللي بيعرف يشتغل تحت الضغط و يحقق آداء ممتاز . 

لكن الحقيقة الأشخاص اللي بينجحوا في النجاح في ظل الضغوط- سواء كانت الضغوط دي حياتية أو مهنية –
مش بيحققوا ده  لأنهم سوبر و بيعشقوا المعاناة الفرق كله يكمن في طريقة تعاملهم مع المواقف 
و الفترات الضاغطة … والخبر الحلو  أن المهارات اللي هم بيستخدموها دي
ممكن لأي شخص تعلمها و ممارستها بكفاءة. 

ال 7 نصايح الذهبية

1. لا تخافوا لكن إحذروا 

وقت الضغوط هو أكتر وقت ممكن يسمحلك تشوف نفسك في مراية صادقة .. فتقدر تلاحظ نقاط ضعفك و قوتك و تشتغل عليها و تستخدامها لصالحك . 

2. إكبر و سيطر. 

لما بنتعرض لمواقف ضاغطة أكتر من قدرتنا علي التحمل ،ممكن بسهولة نفقد إتزاننا و احيانا بتخرج الأمور عن السيطرة . 

لما يحصل كدة  حاول ترجع تستعيد السيطرة في أسرع وقت..  

فكر نفسك إنك صحيح ممكن ما تقدرش تتحكم في الأحداث ، ولكن حاول تتحكم في ردود أفعالك ..  

إعرف إنك لما بتاخد قرارات حكيمة و فعالة بعيدا عن القرارات الانفعالية فانت بتحمي نفسك من الضغط اللي ممكن تزوده . 

علي سبيل المثال لو مديرك عرض  عليك شغل إضافي في الوقت اللي انت فيه غرقان في كومة الشغل اللي مبيخلصش ، ممكن تعد تزعق و تنهار ، و ده كفيل إنه يزود الضغط أكتر و يوقعك في مشاكل أكبر أو إنك ترفض بشياكة و تلاقي حب يرة الصندوق . 

3. إنت مش خيل و إحنا مش في سباق 

السعي للكمال سبب رئيسي للتوتر. أكبر ضغط ممكن نحط نفسنا فيه هو ضغط السعي للمثالية ،لازم أبقي عندي أحسن كارير و أفضل فورمة ساحل , و أجيب فيلا بتلات جناين … 

إعرف أحلامك إنت و طموحاتك الحقيقية شوف نفسك بجد .. 

إيه بيرضيك ؟ 

إيه بيفرحك ؟؟.. 

ممكن تلاقي سعادتك و نفسك في حاجات تانية و أماكن مختلفة عن إختياراتك ،و تحقق نجاح أكبر بكتير من السعي ورا مثالية فارغة و شروط  بتفرضها عليك مقارنات و معايير الوسط الإجتماعي و السوشيال ميديا  . 

4. ركز..ركز 

منقدرش نقول إن الناس تحت الضغط بيشتغلوا بشكل أفضل – لكنهم ساعات بيقدروا يشتغلوا بتركيز أكبر. 

لما يكون عندك مهمة و مربوط بوقت لتسليمها أو عندك هدف مهم للوصول إليه ،أسوأ شيء تعمله إنك تستنزف نفسك و تشتت جهودك في أكتر من إتجاه . 

تقدر تختار مهمة واحدة في كل مرة و تركز فيها و تحققها,ده كفيل يحسسك بالإنجاز و يحافظ علي طاقتك و إنتباهك. 

احجز جلسة مع معالج يمكنه مساعدتك فيما يتعلق بهذا الموضوع

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

5. أهم من الشغل تظبيط الشغل

لأن بدون استراتيجية  و خطة واضحة ،ممكن جدا وسط الضغط تفقد إنتباهك و تنتوه وسط التفاصيل والمهام اللي ملهاش نهاية. 

خللي خطتك جاهزة ومرنة، يعني حضر خطة لتنفيذ المشروع أو المهمة اللي أنت شغال عليها  ، و دايما خليك جاهز بحلول و اقتراحات بديلة عشان تكون مستعد لأي تغيير   . 

6. حالتك المزاجية. 

ما تسمحش  للحالات المزاجية أو المشاعر القوية بالسيطرة عليك ، من حقك تزورك أي مشاعر طبعا لكن في فرق كبير بيت  قبول المشاعر و التعامل معاها و إدارتها بشكل جيد ، و بين الغرق في دوامة الإنفعالات. 

في وسط الضغط محتاج تتعلم أكتر عن تنظيم المشاعر و لو حاسس إنك محتاج مساعدة تقدر تتواصل مع حد متخصص يساعدك علي اكتساب مهارات إدارة و تنظيم المشاعر .

7. لو تهت دور علي السر.. 

كل طريق و له بداية و كل بداية و لها سبب و سر ، لو حسيت إنك مضغوط كفاية و عايز تستسلم !! 

حاول تفتكر السبب الرئيسي اللي خلاك تبدأ المشوار ده من الأصل . 

حاول تفتكر و تستحضر روح البدايات و حالة الشغف اللي كانت بتغلفها ..أحيانا ده بيساعدك تكمل الطريق . 

و زي ما بيقولوا لو عندك سبب قوي كفاية ..دايما هتلاقي طريقة . 

أخيرا بقي .. الضغط مش شعور ممتعً ولا حالة نحب نتحط فيها , بس محتاجين نعرف إزاي ممكن ننتعامل معاه و نديره و نستعد له ..ساعتها بس هنبقي بني آدمين فعالين و قادرين علي النجاح , مش زي الحلة البرستو اللي بتفضل تتحمل الضغط لحد ما ييجي يوم و تنفجر . 

إعداد و كتابة : إيناس طه البداوي
استشاري التربية والصحة النفسية

المصادر

https://www.mentalhealth.org.uk/statistics/mental-health-statistics-stress

Workplace Stress

https://champions-speakers.co.uk/news/all-about-international-stress-awareness-week

https://www.nimh.nih.gov/health/publications/stress

https://www.mind.org.uk/information-support/types-of-mental-health-problems/stress/dealing-with-pressure/

https://www.forbes.com/sites/forbescoachescouncil/2017/07/28/18-ways-to-get-better-at-working-under-pressure/?sh=4560f5932e35

0. Psychology Today. (n.d.). Perfectionism. Retrieved from https://www.psychologytoday.com/us/basics/perfectionism 

Flett, G. (2012, February). The price of perfectionism. Association for Psychological Science. Retrieved from https://www.psychologicalscience.org/observer/the-price-of-perfectionism 

Smith, M.M., Sherry, S.B., Chen, S., Saklofske, D.H., Mushquash, C., Flett, G.L., & Hewitt, P.L. (2017, July). The perniciousness of perfectionism: A meta‐analytic review of the perfectionism–suicide relationship. Journal of Personality, 86(3): 522-542. Retrieved from https://onlinelibrary.wiley.com/doi/abs/10.1111/jopy.12333