Article

قفل لي على كل المواضيع.. أنا عندي اكتئاب موسمي ربيعي

19 2018 636591543994674182 467 1

قفل لي على كل المواضيع.. أنا عندي اكتئاب موسمي ربيعي

“الشجر الناشف بقى ورور والطير بقى لعبي ومتهور..

واحنا هانفرفش امتى امال! دلوقتي ولا في سبتمبر!”

من كام اليوم هيئة الأرصاد الجوية  أعلنت نهاية فصل الشتاء رسميًا وبداية فصل الربيع، ولو انت ما قريتش بيان هيئة الأرصاد فأكيد أخدت بالك إن الشجر بدأ يخضّر ويزهر، والورد بدأ يفتح ويلون، والجو  بدأ يدفى، ويمكن تكون لاحظت إنك حاسس بزهق كده وقريفة ومزاجك مش تمام من غير سبب واضح محدد بالنسبة لك، وكإن الجو نفسه فيه حاجة مزهقاك! فأنت علشان شخص حكيم وواعي قعدت تحلل الموضوع وافتكرت إنك تقريبًا كل سنة في نفس التوقيت بتحس بنفس الإحساس ده! فقولت لنفسك ايه ده! تكونش يا واد يا أحمد مصاب باكتئاب موسمي ربيعي! -ده على افتراض إن اسمك أحمد يعني- وده بعد ما عرفت أعراض الاكتئاب الموسمي الربيعي اللي هي:

  • اضطراب النوم (الأرق)
  • فقدان الشهية
  • فقدان الوزن
  • الشعور بالضيق أو القلق
  • الشعور بالاكتئاب معظم اليوم في أغلب الأيام
  • فقد الاهتمام بأنشطة كنت بتستمتع بها سابقًا
  • تردُّد أفكار حول الموت أو الانتحار

 

فقولت يااه.. ده هو ده اللي أنا حاسس بيه دلوقتي بالظبط! ده نوع من أنواع الاكتئاب! بعدين قريت إن أعلى نسب الانتحار في العالم بتكون في فصل الربيع، فخوفت على نفسك وقولت لا أنا لازم أشوف أخصائي نفسي أنا مش هسكت! هو هيكون عنده القدرة على تشخيص حالتي وعلاجي، بس أنا الأول عايز أعرف ايه أسباب اكتئاب الربيع ده، فجيت لي أنا بقى يا أحمد وأنا قولتها لك..

 

  • التوقعات العالية والإحباطات الفردية

كل واحد فينا معرض إنه يمر بيوم سئ، يوم من الأيام اللي بنقول فيها لبعض  “النهاردة مش يومك”، يوم تكون فيه محبط ومزاجك وحش، وأمورك مش ماشية، فلو ده حصل معاك في يوم ربيعي مشرق، كل الناس حواليك شكلهم مبسوطين، قلعوا لبس الشتا التقيل الغامق ولبسوا لبس ملون مبهج، حتى الطبيعة كده شكلها فرحانة  والجو بديع، إلا إنت يا ولداه بائس حزين، طبيعي هاتحبط وتقول اشمعنا أنا!

راشيل أنونزياتو، أستاذة مساعدة في علم النفس بجامعة فوردهام بتقول “يمكن ده الوقت من السنة اللي ما بتكونش متوقع تحس فيه بالإحباط، ولو ماحستش إنك مبسوط زي باقي اللي حواليك هاتسأل نفسك! هو أنا مشكلتي ايه! “، ويمكن التوقعات العالية للربيع لما بتفشل ده بيكون السبب في الكآبة اللي بنحس بيها.

 

  • مراجعة الخطط والإنجازات

مع نهاية مارس وبداية أبريل بنبدأ نسأل نفسنا احنا حققنا ايه من الخطط اللي كنا حاطينها للسنة اللي بدأت وعدى منها 3 شهور والرابع اهو بيبدأ، ايه التقدم اللي حقنناه، ايه الخطوات اللي خدناها، ولما بنكتشف إننا ما حققناش حاجة حقيقية تذكر، وإننا قضينا الشتا تحت البطانية بناكل وبنشرب سحلب، بنحبط وبنصاب بالكآبة والحزن، وبيبدأ الشخص يحس إنه فاشل ومش قادر يحقق حاجة، وبالتالي بيفقد رغبته في الخروج والاختلاط بالناس، لإنه محبط ولإنه محتاج وقت يفكر ازاي يلحق وقته اللي بيضيع ويرتب أوراقه، زي ما بيقول الطبيب النفسي صاحب كتاب “إعادة الحياة” د. فويان زين.

 

  • حساسية الربيع

لو انت كنت سعيد الحظ ومش مصاب بحساسية الربيع، أو حساسية حبوب اللقاح فإنت أكيد قابلت حد من اللي حواليك مصاب بيها، ولاحظت عليه أعرض زي الرشح والعطس والحكة والصداع نتيجة  التهاب الغشاء المخاطي في الأنف، حد يسألني ايه علاقة المناخير بالاكتئاب والحالة النفسية! أقوله لأ ده فيه علاقة قوية جدًا ازاي بقى!

فيه مواد معينة بتحفز الالتهابات اسمها السيتوكينات، السيتوكينات دي بيكون مستواها أعلى في جسم المصابين بحساسية الربيع، تحديدًا في الأنف، فيه أبحاث بتقول إن الأشخاص المصابين بالاكتئاب بيكون عندهم نفس المستوى من السيتوكينات، فلو انت مش مكتئب بس عندك حساسية فالسيتوكينات دي هاتتنقل من تجويف مناخيرك تروح على مخك وتكئبك، وده غير  إن الأشخاص اللي عندهم حساسية ما بيناموش كويس وبيتألموا  فبيكونوا مرهقين  ومستنيين الربيع يخلص علشان يبقوا كويسين، والكلام ده ينطبق كمان على الناس اللي بتعاني من الرمد الربيعي.

 

  • العوامل الاجتماعية والديموغرافية

لما الشتا يدق البيبان وطول فصل الشتا الناس نشاطها بيكون أقل، بيشتغلوا أقل، بيخرجوا ويسافروا أقل، وبالتالي حياتهم الاجتماعية والعملية بتكون إيقاعها أبطأ، وبما إنهم مش بيقابلوا ناس كتير، بحكم الجو البارد وسوء الأحوال الجوية  وقصر النهار، فبيكونوا أقل عرضة للصراعات والمشاكل، ومع دخول الربيع كل ده بيتغير وبتزيد التفاعلات الاجتماعية، و ضغط الشغل اللي ممكن وده بيخلينا عرضة أكتر للاكتئاب، وزي ما توصلت الدراسات فذروة الانتحار كانت أكتر وضوحًا في الربيع بين العاملين في المزارع أو في المصانع اللي بيعانوا من تغيير موسمي في كثافة الشغل والتفاعلات الاجتماعية.

 

  • العوامل المناخية

أشعة الشمس تثير الأفكار الانتحارية، ده كان رأي بعض علماء النفس اللي شايفين إن ضوء الشمس بيتفاعل مع نظام السيروتونين مادة كيميائية في المخ (ناقلات عصبية) تؤثر على المزاج، وبالنسبة للناس اللي بيعانوا من الاكتئاب ده ممكن يوفر لهم زيادة في الطاقة بما يكفي لوضع خطة انتحارية موضع التنفيذ، ويمكن علشان كده حوادث إيذاء النفس بتزيد في الشهور اللي النهار بيكون فيها أطول، وفي دراسة في كوريا الجنوبية نتايجها أظهرت زيادة بنسبة 1.4 % في معدل الانتحار في كل مرة بيرتفع معدل الحرارة بمقدار درجة مئوية واحدة.

 

ودي شوية نصايح علشان تساعدك تعدي فصل الربيع بنشاط وحيوية من غير كآبة ولا اكتئاب موسمي:

– اتعرض لضوء وحرارة الشمس بشكل تدريجي كل يوم مع بداية الربيع علشان تظبط ساعتك البيولوجية الداخلية.

احجز جلسة مع معالج يمكنه مساعدتك فيما يتعلق بهذا الموضوع
( المراجعات)
عرض الصفحة الشخصية
( المراجعات)
عرض الصفحة الشخصية
( المراجعات)
عرض الصفحة الشخصية
( المراجعات)
عرض الصفحة الشخصية

–   الحركة مهمة جدًا في التخلص من إرهاق بدايات الربيع، وده لأنها بتساعد على تنشيط الدورة الدموية.

–  مارس الرياضة في مكان مفتوح، علشان تستفيد من الأكسجين في تجديد طاقتك.

– خلي نظامك الغذائي بيجمع بين الخصروات والفاكهة علشان يزود جسمك بالفيتامينات والأملاح اللي هتديك النشاط والحيوية.

– واجه  أفكار النقد الذاتي، وقول لنفسك إن كل الناس بتتعرض لوعكات وكبوات ووارد ده يحصل لك في أي وقت من السنة عادي، وفكر بشكل إيجابي.

– فكر  ايه العقبات والحواجز اللي عطلتك عن تحقيق أهدافك،  وفكر ازاي تعدل خططك علشان تقدر تحققها، وافترض إن ممكن خططك مكنتش واقعية ومحتاجة تعديل.

– ما تستهونش بحساسية الربيع والتزم بأدويتك وعلاجك، وخليك مستعد لده من قبل بداية ظهور أعراض الحساسية عليك.

– صحتك النفسية أغلى ما عندك، فلو طول 4 شهور من السنة بتعاني من كآبة وزهق وإحباط دي مش حاجة هينة، لازم تستشير طبيب نفسي يساعدك تتجاوز الأزمة الموسمية دي، وممكن جدًا يحميك من تكراراها كل سنة، علشان لو بتكتئب كل ربيع فده معناه إنك بتهدر ربع حياتك حرفيًا.

 

إيمان السيد

كاتبة صحفية ومهتمة بالشأن النفسي

إذا كنت تعاني من مشكلات عاطفية ووجدانية مرتبطة باضطرابات جسدية، فلا تتردد في التواصل مع فريق أطباء شيزلونج ليكون رفيقك في رحلة التعافي النفسي.

المصادر:

https://www.mayoclinic.org/ar/diseases-conditions/seasonal-affective-disorder/symptoms-causes/syc-20364651

https://www.psychologytoday.com/us/blog/catching-homelessness/201704/spring-blues

https://www.psychologytoday.com/us/blog/minding-the-body/201803/got-the-springtime-blues-youre-not-the-only-one

https://slate.com/news-and-politics/2012/12/suicide-rate-season-there-more-suicides-in-spring-and-not-during-the-holidays.html