في عيد الحب.. حب نفسك مرتين
في عيد الحب.. حب نفسك مرتين
“أحيانا تكون لحظات الوحدة التي تمر بها هي فرصتك المثلي لإعادة التواصل مع نفسك ، والآخرين”
ماكسيم لاغاسي
عيد الحب أو الفالانتاين زي ما متعودين نسميه ،بيكون فرصة لطيفة نعبر عن مشاعرنا للناس اللي بنحبها و نبين لهم بأكتر من طريقة عن مشاعرنا .
لكن ساعات بيعتمد شعورك تجاه عيد الحب على شعورك تجاه نفسك ونوع و جودة العلاقات اللي إختبرتها في حياتك.
و بالتالي ممكن يكون الفالانتاين يوم بيستناه البعض بفارغ الصبر ، و في نفس الوقت ممكن يكون يوم صعب علي بعض الناس و بيفكرهم بوحدتهم أو بمخاوفهم من الوحدة .
حيران كده ليه ..متغير ليه؟!
في أسباب كتير ممكن تخليك مش قادر تستمتع ،أو حاسس بالوحدة و الإنزعاج في يوم عيد الفالانتاين .
زي حصرك لفكرة إن الفالانتاين يوم حكر علي المرتبطين والأزواج فقط ، أو إنه يكون بيفكرك بعلاقة قديمة مسمومة .
أو يمكن يكون بيغلف علاقتك الحالية بالتوتر، والتوقعات المرتفعة اللي بتشبه الأفلام و الصور اللي مفيهاش غلطة اللي بتصدرهالنا السوشيال ميديا كل لحظة و تخلينا مش راضيين عن شكل علاقاتنا.
،أوحتي ممكن يكون بيفكرك بإفتقادك لشريك سواء كان بشكل خارج عن إرادتك، أو بقرار منك نتيجة خوفك من الإرتباط والإلتزام بعلاقة .
في المقال ده بنساعدك تتعرف علي طرق تقدر بيها تتغلب علي مشاعر الضيق و الوحدة اللي ممكن تواجهك ،و تحب نفسك زيادة حبتين اليوم ده
شوية عزايم علي ما قُسم
1- غير نضارتك
مفهومك عن عيد الحب بيفرق جدا في طريقة إستقبالك له و تأثيره علي صحتك النفسية.
يوم عيد الحب زيه زي أي مناسبة تانية هو فرصة لتجديد الود و تلكيكة حلوة لإنعاش العلاقات , حتي لو كانت علاقتك مع نفسك .
أيا كان سبب أفضل طريقة لإدارة مشاعر الوحدة في اليوم ده إنك تركز إيه بيخليك تحس بالشعور ده و تواجهه بشجاعة , و تقرر قرارا واعي إنك تتونس بنفسك و بالموارد المتاحة في حياتك (سواء كانت الموارد دي أشخاص و علاقات طيبة ، أو ممارسات كفيلة إنها تساعدك علي أن تكون سعيدًا بالموجود عندك بالفعل ، وقضاء بعض الوقت مع نفسك).
2- خليك جنتل مع نفسك
•إطبخ أو إعزم نفسك علي أكلة حلوة
•مارس هواية أو نشاط بتحبه وبتستمتع به .
• إدخل فكرة أو تجربة جديدة .
• هادي نفسك بهدية حلوة و يا ريت لو ليها علاقة بإستشفاء جسمك و نفسك (زي جلسة إسترخاء،أو مساج، أوغيرها من الأنشطة و الممارسات اللي ممكن تشكر بيها نفسك و جسمك علي صبرهم عليك في فترات إهمالك ليهم).
كل الأفكار دي ممكن تساعدك في تحويل انتباهك لنفسك والاستمتاع بوقت مستمتع و عالي الجودة لوحدك!!.
3- خليك مع الناس الرايقة
مش شرط تقضي اليوم كله لوحدك ،ممكن تختار ناس بيريحك وجودهم , و إقضي معاهم اليوم ده.
بالإضافة إن ده كفيل يقلل إحساسك بالوحدة إلا إن وجودك وسط ناس بتحبهم وبتتونس بيهم بيزودك بمشاعر الحب و السعادة.
4- ارسم قلب وضحكه على الشبابيك
لو تعرف شخص فقد حبيبه، أو لسة خارج من علاقة مؤذية ، أو شخص هيفرح بإهتمامك.
لا تتخيل هدية صغيرة و رمزية له في عيد الحب ممكن تغير يومه و يومك و ترسم علي قلوبكم بهجة و محبة كبيرة .
5- خد استراحة من وسائل التواصل الاجتماعي
شئ جميل إنك تفضل متواصل و علي إطلاع بأخبار أصدقاؤك وعائلتك أو حتي المشاهير ، ولكن لازم تكون عارف أثر ده علي صحتك النفسية .
مفيد إنك تفصل شوية عن وسائل السوشيال ميديا أو عالأقل ترشد إستخدامك لها .
وخليك فاكر إن الصور الموجودة على منصات التواصل الاجتماعي هي مجرد صور ومش حياة كاملة
6- اطلب المساعدة
لو استمرت معاك مشاعر الوحدة و الضيق , ففكر في زيارة مختص لمناقشة أفكارك ومشاعرك مع لا تتردد في طلب المساعدة ..و الاستشارة النفسية من أحد متخصصي موقع شيزلونج .
إحجز جلستك
في النهاية .. إنت حر إنك تتجاهل اليوم بالكامل و تتعامل معاه علي أنه يوم عادي أو حكر علي شكل معين من الحب ، أو أفضل إنك تنتهز الفرصة و تدلع نفسك و الناس اللي بتحبهم .
نتمني أن يفيدك المقال وللمزيد من المعلومات المتعلقة بصحتكم النفسية تابعوا مقالاتنا علي موقع
شيزلونج.
إيناس طه البداوي
باحثة ماجستير إرشاد نفسي
المصادر
- Werner KH, Jazaieri H, Goldin PR, Ziv M, Heimberg RG, Gross JJ. Self-compassion and social anxiety disorder. Anxiety Stress Coping. 2012;25(5):543-558. doi:10.1080/10615806.2011.608842
- http://princegeorge.cmha.bc.ca/news/10-tips-for-the-valentines-day-blues/
- http://www.mymentalhealthday.org/tag/valentines-day
