رمضان كريم ..و إنت طيب
رمضان كريم ..و إنت طيب
رمضان هو شهر الخير و العطاء ..
في شئ سحري مرتبط بشهر رمضان أغلب الناس بتسعي من قلوبها لتقديم الخير و إظهار المحبة و التآلف ، و ده بيخلي الشهر كله يتميز بطابع خاص جدا و مكانة خاصة في قلوب عموم الناس مش بس المسلمين .
تخيل بقي لو عرفت إن العطاء ده مش بس واحد من الممارسات الروحانية ،لأ ده كمان علميا بيعزز صحتك النفسية .
في المقال ده هنحاول نبين أهم 7 فوايد لتقديم العطاء للآخرين و اثره علي صحتكم النفسية .
1-المواد الكيميائية في المخ
بمجرد ما بتقدم خدمة أو شئ لطيف للي قدامك بتحس بشعور لطيف ، أهو الشعور ده بيسموه نشوة العطاء أو (Helper’s high).
أكدت الأبحاث أنك لما بتساعد شخصًا ما ، بتحصل عملية في المخ بتفرز هرمونات السعادة، والرضا -زي السيروتونين والدوبامين والأوكسيتوسين -اللي بيقوموا بتحفيز مركز المكافأة في العقل و بالتالي بنحس بمشاعر السعادة.
2. للعطاء أشكال أخري
العطاء و عمل الخير مش لازم يكون له صورة واحدة نمطية ، في أشكال و أفكار متعددة للطف .
أحيانا مش بيتوفرلنا إننا نقدم مساعدات مالية أو وقتنا و مجهودنا مبيكونش سامح بتقديم المساعدات الخيرية .
الحقيقة إنك ممكن بلفتة لطيفة بسيطة تعمل خير و تحسن صحتك النفسية .
تخيل إنه بمجرد الاتصال بشخص عزيز و تفقد أحواله ، أو كلمة “شكرًا” لشخص غريب أو إبتسامة كفيلة إنها تقدملك ده و يمكن تغير يوم شخص للأفضل .
3. الرحمة تجر الرحمة
تخيل التراحم و كأنه عضلة من عضلات جسمك ، في كل مرة هتقدم فيها معروف لشخص تاني ، فإنت بكدة بتبني عضلات أكثر ، وبيكون عندك قدرة أكبر علي ممارسة أعمال الخير بشكل أسهل.
تخيل بقي لو قررت تبني كذا عضلة زي التراحم و حسن الظن في الآخرين , التواصل الرحيم ,التعاطف ، المبادرة لعمل الخير كل دي مهارات ممكن تعزيزها من خلال ممارستها بشكل مستمر .
مع الوقت هتبتدي في جني ثمار اللطف و يبان أثره علي صحتك النفسية و جودة حياتك من غير ما تحس بجهد كبير .
4- كتر خير قلل توتر
وفقا للدراسات : فالأشخاص اللي بيقدموا اللطف والاهتمام بالآخرين; بيتمتعوا بمستوى أقل بنسبة 23٪ من هرمون التوتر-الكورتيزول – ،فببساطة الدراسة دي بتقدملك روشتة لمسكن طبيعي للتوتر ، فقط من خلال إظهار و تقديم التعاطف و اللطف مع شخص آخر.
5- شوف نفسك بعيون جديدة
تشير الدراسات أن الأعمال اللطيفة العشوائية ممكن تحسن مستوي تقدير الذات، ووجود معني و هدف للحياة ، و ده قد يكون كفيل إنه يحسن حالتك النفسية , و يعزز جودة حياتك .
6- سرعة النتايج
من اللطيف إن متعة العطاء مش من ضمن الأمور اللي بتطلب وقت كبير عشان تنعكس آثارها علي صحتك النفسية .
ممكن بمجرد السماح لنفسك بالحضور و الإستمتاع باللحظة اللي بتقدم فيها شئ لطيف لشخص أخر تقدر تحس بشعور أفضل .
7- خللي بالك من نفسك
لما تقرر تمشي في مشوار العطاء ده ، إفتكر إنه مهم بس كمان مهم تحافظ علي صحتك النفسية ، إفتكر:
- إنك مختار تعمل ده بإرادتك مش مفروض عليك .. ماتسمحش إنه يكون فرض!!
- لو بدأ يبقي ضاغط أو مرهق لك نفسيا..خد وقت مستقطع .
- مفيد أثناء تقديم المساعدة للآخرين ، إنك تاخد شوية وقت لمراجعة القرار الواعي بتقديم العطاء ، ومدى توافق القرار ده مع نوع الشخص اللي نفسك تكون عليه.
كلمة أخيرة :
القيام بشيء لطيف لشخص آخر ، بغض النظر عن حجمه أو صغره ، بيسيب تأثيرً إيجابيًي على صحتك النفسية ، و رمضان -شهر الخير هو أحسن وقت تبدأ فيه عادة جديدة طيبة و جميلة تأثر فيك و تبني في المجتمع حواليك .
و كل سنة و إنتم بخير ،و رمضانكم كريم وإنتم أطيب و أطيب.
نتمني أن تفيدكم تلك المعلومات ، كما نشجعكم علي طلب المساعدة دوماً من حلال فريق شيزلونج للاستشارات النفسية، عبر التواصل مع فريق من أكفأ الأطباء والمعالجين ،الذين يسرهم تقديم المساعدة والدعم ، احجز جلستك الآن وأبدأ رحلة الاستشفاء.
وللمزيد من المعلومات التي تخص صحتكم النفسية تابعوا مقالاتنا علي موقع شيزلونج.
إعداد و كتابة : إيناس طه البداوي
استشاري التربية والصحة النفسية
المصادر
- Jiang T, Yakin S, Crocker J, Way BM. Perceived social support-giving moderates the association between social relationships and interleukin-6 levels in blood. Brain Behavior and Immunity. 100 (2022): 25-28. doi:10.1016/j.bbi.2021.11.002
- Holt-Lunstad J, Smith TB, Layton JB, Brayne C. Social relationships and mortality risk: a meta-analytic review. PLoS Med 7(7): e1000316. doi:10.1371/journal.pmed.1000316
- Chen L, Deng H, Cui H, et. al. Inflammatory responses and inflammation-associated diseases in organs. Oncotarget. 2018 Jan. 23; 9(6): 7204-7218. doi:10.18632/oncotarget.23208
4.https://link.springer.com/article/10.1207/s15327558ijbm1202_4%2
5. https://news.wisc.edu/brain-can-be-trained-in-compassion-study-shows/
6.https://www.dartmouth.edu/wellness/emotional/rakhealthfacts.pdf%20
7.https://www.ncbi.nlm.nih.gov/pmc/articles/PMC4888152/%20
8.https://hqlo.biomedcentral.com/articles/10.1186/s12955-015-353-y
9. https://psych.ubc.ca/news/kindness-may-help-socially-anxious-people-relax-says-new-research-by-dr-lynn-alden/%20
10.https://www.pnas.org/doi/10.1073/pnas.060447510
