اهتم بنفسك وقدّرها
اهتم بنفسك وقدّرها
الحضن بشكل عام مش مجرد تعبير عن الحب و تبادل للمشاعر العميقة , لكنه له أثر عظيم علي صحتنا النفسية ….
و ده موضوع لا يمكن الإختلاف عليه و لكن ..تعرف إيه عن عن الحضن الذاتي (Self Hug)
يمكن أحيانا بنعتبر الحضن جزء من روتين التحية نظرا لطبيعة بلادنا و ناسنا الدافئة اللي بتسمح و بتشجع علي توزيع الأحضان و الود طول الوقت .
لكن الحقيقة إن الحضن له معاني أعمق من مجرد التلامس الإنساني و التعبير عن الحب فقط.. الحضن اللي بتستقبله من قريب أو صاحب أو حتي طفل بيتصرف بعفوية قادر يعمل المعجزات.
مع ذلك مش كل الناس هيكون متوفر لها تتبادل أحضان بشكل آمن ( خصوصا في حضور الأستاذ الكوفيد إياه أو أي ظرف آخر من ظروف الحياة )..طب و العمل ساعتها ؟؟!
هنا تبرز قوة الحضن الذاتي (Self Hug) ..من رحمة ربنا إن ممكن يكون للحضن الذاتي نفس فوائد الحضن اللي بتستقبله من الآخرين..تتصور؟؟!!
هل تعلم إنك تقدر تحضن نفسك و إن ده مش بس طبيعي ده ممكن يكون عين العقل و يساعدك في تحسين حالتك المزاجية و النفسية ؟؟
في المقال بتاع النهاردة هنقولك ليه مهم تقدم لنفسك الحضن اللي محتاجه و تأثير ده علي صحتك النفسية.
فوائد الحضن
أولا :مسكن للألم
“الحضن دوا الحزين و ترياق الوحدة”
وفقًا لدراسة تمت سنة 2015 أثبت العلماء أن هرمون الأوكسيتوسين ، اللي بيتفرز مع الحضن مش بس بيعمل كمسكن فوري لتخفيف الألم بشكل مباشر ,لأ ده كمان بيخفف الحساسية تجاه الألم عن طريق تقليل مشاعر القلق والخوف.
ثانيا : شعور بالكفاية و الآمان
“تبقي إحساس الآمان اللي عمره ما يبقي خوف”
لا يمكن نقلل من أهمية الاتصال البشري ، وتقديم الدعم الاجتماعي خصوصا وقت المحن و أثرهما الهايل.
لكن بنتكلم عن الأوقات اللي هتمر عليك أحيانا و تمنعك الظروف من التواجد بالقرب من حبايبك و إحتضانهم بقوة ..إتطمن و متخليش ده يأثر علي صحتك النفسية ..قوم إدي نفسك حضن “
كمان محتاج تفكر نفسك دايما إنك بتلعب أهم دور في عافيتك ، و إنك مش هينفع تسيب نفسك تدخل في دوامات الوحدة و الحزن لمجرد إنك منتظر الدعم و التهدئة من شخص آخر .
إنت الوحيد اللي هتكمل مع نفسك رحلتها .. و إنت الوحيد اللي في عز وحدتك تقدر تطمن نفسك و تهديها ..زو طبعا تدي نفسك حضن.
ثالثا:الحضن و الإسترخاء
بعد يومً طويلً , أو شعور الكآبة اللي بدون سبب واضح أو حتي الشعور بالتوتر نتيجة الوحدة و البعد عن أشخاص قريبين لقلبك ..كل المواقف دي بتضغط عليك و بتخليك في حاجة ماسة للاسترخاء و هنا بتيجي قوة الحضن !!
اللي بيقلل من مستويات الكورتيزول (هرمون التوتر) في جسمك و يساعد في تخفيف بعض من التوتر والضغط و رفع معنوياتك وتحسين مزاجك
رابعا :ارحم نفسك ..أحضن نفسك
وفقًا لأبحاث كريستين نيف (و هي أول من أكتشف مصطله الرحمة بالذات ( Self Compassion ) )، فإن تقديم الحضن , و الطبطبة لنفسك بيزود من مشاعر الحب و الرحمة تجاه الذات.
فالحضن الذاتي -باعتباره أحد ممارسات اللطف مع الذات- بيسهل عليك تقبل نفسك زي ما أنت ، زي ما بيساعدك علي تهدئة نفسك بعد التعرض للمحن أو إرتكاب الأخطاء.
الخلاصة إن الحضن بيسهل القبول الواعي وإحترام الذات ، اللي بيساعد علي الرحمة و التعاطف مع الذات اللي بدورها بتؤدي إلى تحسين نظرتك العامة للحياة و تحسن رفاهتك و صحتك النفسية .
إزاي أحضن نفسي
يمكن يبان الموضوع غريب في الأول ، لكنه بسيط جدًا. قدم الحضن لنفسك زي ما بتقدمه لشخص عزيز :
- حاوط نفسك و طبطب علي قلبك
- غمض عينك و إتنفس بعمق
- تخيل إنك بتحضن الطفل الصغير اللي جواك
- ركز على الأفكار اللطيفة والمحبة ووجهها لنفسك
(كله هيعدي زيه زي االي قبله
(إنت كفاية)
( إنت بتعمل اللي تقدر عليه)
خلاصة القول
في النهاية ممكن تفكر تعدي المقال ده و تعتبره مقال سخيف و مطرقع و ممكن تجرب و تستفيد من فوائد للحضن و الحديث الإيجابي للذات اللي بيزود من مشاعر تقدير الذات والثقة بالنفس ، وبيعزز الإيجابية والقوة الداخلية.. اللي إنت محتاجهم جدا جدا في رحلة الحياة.
المصادر
https://www.researchgate.net/publication/50867454_The_analgesic_effect_of_crossing_the_arms
https://pubmed.ncbi.nlm.nih.gov/22071630/
https://www.ncbi.nlm.nih.gov/pmc/articles/PMC3936960/
https://www.cell.com/cell-metabolism/fulltext/S1550-4131(07)00069-1?_returnURL=
https%3A%2F%2Flinkinghub.elsevier.com%2Fretrieve%2Fpii%2FS1550413107000691%3Fshowall%3Dtrue
https://www.ncbi.nlm.nih.gov/pmc/articles/PMC5045952/
https://opus.uleth.ca/handle/10133/3202%20%20
https://clinical-practice-and-epidemiology-in-mental-health.com/VOLUME/6/PAGE/25/FULLTEXT/
The Chemicals of Care: How Self-Compassion Manifests in Our Bodies
https://greatergood.berkeley.edu/article/item/try_selfcompassion
إيناس طه البداوي
باحثة ماجستير إرشاد نفسي -جامعة القاهرة
