راقب من تحب.. علامات تدل على أن صحته النفسية في خطر

أمراض نفسية
كتبت بواسطة إيمان السيد

لو لاحظت على ابنك إنه بيكح كتير، على والدتك إنها مبقتش تقدر تمشي زي الأول، على زوجتك إن لون بشرتها شاحب، هاتبدأ تقلق، وهاتحس إن ده عرض لمشكلة صحية، وهاتطلب من الشخص اللي إنت قلقان عليه إنه يعمل الفحوصات اللازمة ويزور الطبيب المختص، الاهتمام بالصحة الجسدية للأشخاص اللي بنحبهم شئ جميل، لكن الأجمل إننا مش بس نهتم بصحتهم الجسدية لا كمان صحتهم النفسية، وطالما هما أشخاص أمرهم بيهمنا لازم ناخد بالنا من أي تغيير نفسي بيطرأ عليهم، علشان نقدر نساعدهم في الوقت المناسب، وعلشان كده جمعية علم النفس الأمريكية حددت 5 إشارات تحذيرية لو لاحظتهم على شخص فده معناه إنه مش في كامل لياقته النفسية.

 

  • تغيير في الشخصية

لو لاحظت إن الشخص المقرب منك، شخصيته اتغيرت، مبقاش زي زمان، بيتصرف كإنه شخص مختلف، واحد تاني بصفات واهتمامات جديدة مختلفة غير اللي كان بيتميز بيها قبل كده، حتى إحساسه بنفسه اتغير، مبقاش عارف يشوف نفسه زي الأول، وغالبًا التحول والتغيير بيكون سلبي، ما بيكونش تغيير للأفضل، فدي أول علامة تحذير إن الشخص ده ممكن يكون بيعاني من مشكلة نفسية.

 

  • القلق

لو شخص من المقربين في حياتك كان مسالم متصالح مع نفسه، عنده سلام داخلي وهادي، وفجأة بقى على طول قلقان ومتوتر بشكل مستمر، خايف من كل حاجة، ومش عارف يتطمن ويحس إنه مستقر، والقلق والتوتر دول مخلينه على طول عصبي، بينفعل بسهولة، مزاجي ومتقلب، عنده تغيرات حادة في العاطفة، بيعيط بسهولة، فالشخص ده غالبًا عنده مشكلة نفسية، ودي تانية علامة تحذيرية بتدل على ده.

 

  • الانسحاب الاجتماعي

لو لاحظت إن الشخص بقى بيتعمد يعزل نفسه، وقافل على نفسه اجتماعيًا، مقضي معظم الوقت لوحده، بيتهرب من أي مناسبات اجتماعية، ما بيحبش يواجه الناس، بيعتذر عن الخروجات والمقابلات في آخر لحظة، وبيحس إن مقابلة الناس بتضغط عليه، حتى مكالمات التليفون ما بيحبش يرد عليها، وبيحس إن الموبايل عبء عليه، بيقفل حساباته على مواقع التواصل الاجتماعي علشان يرتاح من ضغوط الناس، فدي العلامة التحذيرية التالتة لإن الشخص ده بيعاني من مشكلة نفسية.

 

  • عدم وجود رعاية ذاتية وممارسة سلوكيات محفوفة بالمخاطر

غالبًا الأشخاص اللي بيعانوا من مشاكل نفسية، خصوصًا الاكتئاب واضطرابات القلق بيفقدوا اهتمامهم بسلامتهم الشخصية وصحتهم، فمثلًا ممكن يدخنوا بشراهة، يشربوا كحوليات ويتعاطوا مخدرات، أو حتى يبدأوا يهملوا في مظهرهم الخارجي وشكلهم ولبسهم، أو ما بيهتموش بأكلهم ولا إنهم ياخدوا أدويتهم، ما بيناموش كويس، بيجهدوا نفسهم زيادة عن اللزوم، كل دي مؤشرات إنهم في خطر.

 

  • الشعور باليأس والإرهاق

ممكن تعتقد إن مفيش علاقة بين اليأس والإرهاق، لكن هما بينهم علاقة قوية جدًا، الشخص اللي بيعاني من مشكلة نفسية، بيحس إنه مرهق ومعندوش طاقة يعمل حاجة، فاقد حماسه وشغفه بكل الأنشطة اللي كان بيحبها، شايف إن الحياة صعبة وإن يائس من إن تحصله حاجة حلوة، أو إنه يلاقي سبب أو دافع يخلوه مبسوط، فلو لاحظت العلامة دي على شخص فاعرف إن سلامته النفسية في خطر.

 

العلامات دي لو لاحظتها منفردة أو مجتمعة على شخص، فمش مفروض تسكت وتعتبر الموضوع عابر، لإن ده بيدل على إن الشخص ده مش في كامل سلامته النفسية، وإنه في أزمة ومحتاج دعم ومساعدة من مختص، ساعده إنه يتوجه للاخصائي النفسي علشان هو الشخص الأجدر على تشخيص مشكلته وحلها، وكل ما كانت ملاحظتك وطلب المساعدة بدري كل ما كان مواجهة الأزمة وحماية الشخص أسهل.

إيمان السيد

كاتبة صحفية ومهتمة بالشأن النفسي

إذا كنت تعاني من مشكلات عاطفية ووجدانية مرتبطة باضطرابات جسدية، فلا تتردد في التواصل مع فريق أطباء شيزلونج ليكون رفيقك في رحلة التعافي النفسي.

أترك تعليق