بناء عادات صحية نفسية

بناء عادات صحية نفسية
عمرك فكرت ليه في ناس بتقدر تبني عادات إيجابية تهتم بصحتهم النفسية، وناس تانية مش عارفة تمشي في الطريق ده؟ ممكن تستغرب لما تعرف إن الموضوع مش بس محتاج إرادة شخصية، لكن كمان نظام بيشجع العادة ويدعمها. طيب يعني إيه عادة أصلاً؟ وبتتكون إزاي؟ وإزاي ممكن نبدأ نعمل عادات نفسية صحية؟
يعني إيه العادات؟ وتتكون إزاي؟
العادات هي حاجات بنعملها بشكل متكرر من غير ما نفكر فيها كتير. زي ما بيشرح الكاتب جيمس كلير في كتابه *”العادات الذرية” (Atomic Habits)*، العادة بتتكون من 4 خطوات:
1. الإشارة: الحاجة اللي بتحفز العادة.
2. الرغبة: الدافع اللي بيخلينا نعمل الحاجة.
3. الاستجابة: الفعل نفسه.
4. المكافأة: النتيجة اللي بتخلي العادة تتكرر.
وكمان الكاتب تشارلز دوهيج في كتابه “قوة العادات” (The Power of Habit) بيقول إن العادة بتبقى أسهل لما تكون جزء من البيئة والنظام اليومي بتاعنا.
العادات الصحية النفسية:
العادات الصحية النفسية هي التصرفات اللي بنعملها كل يوم عشان ندعم صحتنا النفسية ونعيش براحة أكبر. زي مثلاً:
– التأمل: زي تمارين التنفس العميق لتخفيف التوتر.
– كتابة المشاعر: عشان ننظم أفكارنا ونعبر عنها.
– القراءة الإيجابية: عشان تحفز العقل وتخلينا نفكر بشكل أحسن.
– وقف النقد الذاتي الزيادة: عشان نحب نفسنا أكتر.
العادات دي بتساعدنا نبقى واعيين بنفسنا أكتر، وبتساعدنا على تقليل القلق والاكتئاب، ونعيش بشكل أريح.
في بعض العادات السلبية اللي ممكن تأثر على يومنا بشكل كبير، بذات اللي بنبدأ بيها يومنا:
- التصفح المفرط للسوشيال ميديا: لما تبدأ يومك بتصفح الأخبار وحسابات الآخرين، ممكن تلاقي نفسك غارق في المقارنات والتوتر، بدل ما تبدأ يومك بتركيز وإيجابية.
- تأجيل الاستيقاظ (زر الغفوة): الضغط المتكرر على زر الغفوة مش بس بيأثر على جودة نومك، لكنه كمان بيخلق إحساس بالكسل وعدم الإنجاز مع بداية يومك.
- إهمال ترتيب السرير أو المساحة الشخصية: البيئة الفوضوية أول ما تصحى ممكن تعكس إحساسًا بالتشتت وعدم السيطرة على اليوم.
- الانغماس في التفكير السلبي: بدء اليوم بالتفكير في المشاكل أو القلق من التحديات المستقبلية بيستهلك طاقتك النفسية من البداية.
- الإفراط في تناول الكافيين قبل الإفطار: شرب كميات كبيرة من القهوة أو الشاي على معدة فارغة مش بس بيؤثر على جسمك، لكنه كمان ممكن يزيد من العصبية والتوتر.
- تجاهل وجبة الإفطار: تفويت أول وجبة في اليوم يسبب انخفاض الطاقة ويزيد من الشعور بالإجهاد طوال اليوم.
- الانشغال الفوري بالعمل دون لحظة هدوء: الدخول في زحمة المهام الصباحية مباشرةً بدون تخصيص وقت لنفسك بيخلق إحساسًا بالضغط ويؤثر سلبًا على حالتك النفسية.
إزاي تتخلص من العادات السيئة؟
عشان تتخلص من عادة سيئة، لازم تبقى عارف المحفزات اللي بتخليها تستمر. مثلاً:
– حدد المحفزات: شوف إيه اللي بيخليك تعمل العادة دي.
-بدل العادة: اختار عادة إيجابية مكانها.
– غير البيئة: حاول تبعد عن أي حاجة بتشجع العادة.
– اصبر واثبت: التغيير بياخد وقت.
خطوات لبناء عادات صحية نفسية:
1. بدأ بخطوات صغيرة: خلي العادة بسيطة وسهلة.
2. حدد وقت معين: كرر العادة كل يوم في نفس الوقت.
3. سجل تقدمك: اكتب نجاحاتك عشان تفضل متحمس.
4. كافئ نفسك: اربط العادة بحاجة حلوة.
5. خليها جزء منك: فكر في نفسك كشخص بيعمل العادة دي.
بناء العادات الصحية النفسية مش مستحيل، لكنه محتاج نظام وصبر. لما تفهم دورة العادة وتشتغل على تكوين بيئة تساعدك، هتقدر تحسن صحتك النفسية وتعيش براحة وسلام. ابدأ النهاردة خطوة صغيرة للتغيير الإيجابي.