العلاج المعرفي السلوكي: أداة الولادة من جديد

أمراض نفسية
فريق شيزلونج
كتبت بواسطة فريق شيزلونج

اللي بيلجأ مننا للأطباء والمعالجين النفسيين بيبقوا دايما بيفكروا هيقولوا لهم ايه؟، وبتبقى دايما الرغبة في إن حد يسمع لك هي اللي بتحركك ناحية خطوة العلاج النفسي.

بس بيبقى دايما السؤال: المعالج على الناحية التانية هيقولك إيه؟ يظل شئ أغلبنا ميعرفش عنه كتير.

هل المعالج بيقول كلام بيريح و خلاص؟ بيطيب خاطر وخلاص؟ بيقول حكم شخصية؟ و إيه طبيعة العلاج النفسي اللي بيقدمهولي؟

الطبيب أو المعالج النفسي هو حد متمرس بيساعدك أنك تتغلب على مشاكلك عشان حياتك أنت تتحسن وتبقى للأفضل. ومن أشهر الطرق اللي بيستخدمها المعالج النفسي هي: العلاج المعرفي السلوكي

العلاج المعرفي السلوكي هو نوع من أنواع العلاجات النفسية بيكون غرضه الرئيسي هي حل مشاكلك اللي مسببة لك أذى نفسي ومقللة انتاجيتك من خلال الوصول لأفكار بديلة للأفكار السلبية المؤذية، والهدف منه هو تغيير طريقة تفكيرك و طريقة شعورك تجاه المشاكل الحياتية من خلال التركيز على الأفكار وطرق حُكمك على الأمور ومهاراتك العقلية علشان تقدر تغير سلوكك وطريقة تعاملك مع همومك و مشاكلك.

فكرة العلاج المعرفي السلوكي مبنية على أن المعالج بيعلمك ويساعدك على إنك تدرك مشاكلك وتحددها كويس وبعد كدا يساعدك على تغيير أفكارك ومشاعرك السلبية وطريقة تفكيرك ناحيتها بحيث تقدر تترجم التغيير في الأفكار والمشاعر لتغيير في سلوكياتك بشكل إيجابي. فالمعالج هنا بيكون هوا والشاكي زي شركاء في فريق بيشتغلوا سوا بهدف حل مشكلة الشكوى مع بعض، بمعنى أن المعالج مش اللي بيحل مشاكلك بل بيساعدك إزاي تلاقي أفضل وسيلة لحلها.

————————————————————–

طيب هل الأفكار السلبية دي مشكلة تستحق كل دا؟

خلينا نتكلم سوا عن مدى أذى الأفكار السلبية. الأحداث اللي بنمر بيها خلال اليوم و الضغوطات الحياتية مش بتكون هيا السبب للأذى النفسي في حد ذاتها ولكن طريقة استقبالنا ليها بتكون هي سبب المشكلة النفسية. طريقة تعاملنا مع مشاكل الحياة هي سبب رئيسي لتعبنا النفسي. ومن هنا كانت نظرية العلاج المعرفي السلوكي وهي تغيير الأفكار السلبية لأن تركها بدون تغيير و الاكتفاء بالعلاج الدوائي فقط على سبيل المثال مش هيؤدي لتحسن و تغيير في السلوك.

  • طب بتتكون من إيه الرحلة العلاجية؟:

العلاج المعرفي السلوكي بيختلف مضموناً وشكلاً عن أنواع العلاج النفسي الأخرى، فهو مش مجرد شاكي بيقول اللي بيخطر على باله للمعالج بشكل عفوي.  في البداية الشاكي و المعالج بيبتدوا يحددوا المشاكل اللي تخصه ويبتدوا يقسموها لمشاكل أصغر يكن حلها بشكل عملي. بعدها يحاولوا يصيغوا أهداف علاجية للعلاج بشكل يناسب صاحب المشكلة يكون هدفها حل مشاكله اللي مسبباله الاضطراب النفسي وليكن مثلا مشاكل في الشغل أو العلاقات الاجتماعية أو قلة النوم.

بعد صياغة الأهداف بينتقل المعالج وصاحب المشكلة لتكوين خطة علاجية بفترة زمنية في ضوء الأهداف اللي حددوها سوا ويرتبوا أولوياتها. في كل جلسة بيكون دايما فيه جزء مخصص لمناقشة مدى التطور اللي حصل من بادية العلاج و مناقشة واجب الأسبوع اللي قبله و دا ياخدنا لأهم جزء في العلاج المعرفي السلوكي وهو عمل الواجب.

  • أهمية العلاج السلوكي: ليه فيه عمل الواجب وإيه أهميته؟

زي ما اتفقنا، دور المعالج في العلاج المعرفي السلوكي هوا انه ياخد بإيد الشاكي مش أنه يحلله مشاكله، ولذلك نجاح العلاج بيتوقف على التزام الشخص بالمهام اللي بيتفق عليها مع المعالج وتنفيذه ليها ومناقشته ليها معاه في الجلسة اللي بعدها في إطار الخطة العلاجية .

ليه بنعمل الواجبات المقررة؟ لأن ده جزء أساسي في التغير السلوكي والمعرفي في حياته، وهو وسيلة الشخص في التعامل مع الخطأ وتعلم الوصول لأحسن وسيلة هيعتمد عليها في مواجهة المشاكل وحلها والتخلص منها من المشاكل اللي بيمر بيها و مسببة معاناة ليه مش دايما هتكون عملية سهلة ولا بسيطة بل دايما بتكون عملية صعبة شبه الولادة فعلا ودايما الشاكي هيبذل الكتير من المجهود عشان يتخلص من الأفكار السلبية إللي بتسبب الأذى والاضطراب النفسي عشان تتحسن حياته.

                                                               ————————————————————–

  • مين يقدر يستفيد من العلاج المعرفي السلوكي؟

يمكن مفيش حد في العالم ماجربش انه يساعد نفسه في تحسينها سلوكياً ومعرفياً، لكن مش كل بيقدر ينجح لوحده. عامة العلاج المعرفي السلوكي أثبت نجاحه في علاج اضطرابات القلق والاكتئاب والسيطرة على الغضب و الألم المزمن و مشاكل تقلب المزاج واضطرابات النوم والوسواس القهري والفوبيا و الإضطرابات الزوجية والعلاقات الجنسية.

بكدا نكون فهمنا العلاج المعرفي السلوكي و نقدر نختار أنسب أنواع العلاج النفسي لمشاكلنا بوعي أكتر بأهمية العلاج النفسي و تأثيره في حل مشاكلنا.

أترك تعليق