في بيتنا مدمن – الجزء الثالث
في بيتنا مدمن – الجزء الثالث
انتكاسة في البيت
بعد مرور اسبوعين من اخد الدوا في البيت , وقافلين علي الأبن اوضتة بالمفتاح , يا دوب بياخد العلاج والأكل والشرب , ومخرجش من اوضتة الا بعد مرور 10 ايام . وفي لحظة رجوع الأب من شغله,,,, نظر الأب لأبنه وقال :اخبارك اية النهاردة شايفك قاعد برا اوضتك يعني ؟ رد الأبن: هااا اه احسن كتيير حاسس اني خلاص خفيت ,,, ورجع بسرعه علي اوضته تاني … نظر الأب للأم في حيرة وقال : انا حاسس الولد متغير النهاردة وغير كل يوم , حاسة غريب كدا , ومش قادر يرفع عنيه ووشه , شاحب اووي بعد ما كان فاق كدا , اية اللي حصل له ؟؟!!! ردت الأم سريعآ : لا لا بيتهيألك هو بقي كويس خالص , و بيأخد العلاج بأنتظام , وبعدين اكيد زهق من قعدة البيت , وهو مش واخد علي كدا , واحنا كلنا بنخرج نغير جو وهو لأ , اكيد نفسيته تعبت… رد الأب في قلق : لا انا حاسس ان في حاجة غريبة , وعلي العموم بكرة معاد المتابعة عند الدكتور , وهنطمن منه . وطبعآ كان رافض الولد أنه يروح متابعته تاني يوم , ولكن الأب اجبرة , وهناك كانت الصدمة , ظهر في التحاليل مخدرات … وكانت انتكاسة الأبن في البيت ” ااااه في البيت ” ……. اكيد طبعآ هتستغربوااا , طيب ازاااي هينتكس في البيت ؟!! دا مخرجش منه , ومتأكدين ان اوضته مفيش فيها اي حاجة , ويا دوب كان بيأخد الدوا ويأكل ويشرب , واعراض الأنسحاب كانت ظاهرة عليه جدآ في اول كام يوم ( اسهال-وجع في الجسم – رشح – فقدان الشهية – هرش – تثاؤب – دموع – تسقيط – عدم القدرة علي النوم وعلي الاستيقاظ) , اه فعلآ ممكن يكون عمل اعراض الأنسحاب دي ورجع آخد المخدر تاني , وكمان وهو في البيت ازااااااي ؟؟!! هقولكم المدمن بيكون مأمن نفسة كويس اووي , عشان لو حصل اي حاجة ومعرفش يخرج , او لو ملقاش المخدر بتاعة في يوم , او مثلآ مش معاه فلوس في وقت معين . اه طبعآ ما هو مبيقدرش يعيش من غيره , فبيكون في حاجة اسمها وحدة التخزين , دي بقي انه بيكون مخزن المخدرات في البيت , وبتكون في اماكن مش ظاهرة ابدآ , ممكن ورا التكييف او جوااه , او ورا الغسالة في الحمام , او في المكنسة اوفي فرش الأنترية او او او او .
بيكون في اماكن كتيير متقدرش تتخيلها , و صعب توصلها , فالأنتكاسة ممكن وببساطة شديدة تحصل وهو في البيت , لانه وقتها مبيقدرش يستحمل حتي اعراض الأنسحاب , والحبسة في البيت , ومع اول فرصة بينتكس للأسف … لان طريقة تفكيره لسة زي ما هي , ومشكلته النفسية اللي غالبآ بتكون وصلته للأدمان , برضه زي ما هي كامنة جواااه , فبيكون مش عاوز يفوق اصلآ , لانه لما آخدها كان بسبب انه معرفش يتكيف مع الواقع بتاعه او يتعامل معاه … وفي حاجة كمان مهمة جدآ عاوزة اوضحها ..
اوقات تانية يقولوا الأهل خلاص هناخدة ونسافر مكان بعيد وهادى , ونكون جمبه ومعاه , لان محدش هيساعد ابننا غيرنا , ومحدش هيخاف عليه ولا هيفهمه قدنا , وكمان عشان مش عاوزين حد من قرايبنا يعرف حاجة , ويسافروا مكان جميل وبعيد وهادي , ويأخد الولد علاجة و يمر بأعراض الأنسحاب , و اول ما بيرجع بردوا بتكون الأنتكاسة !! ودا بردوا بيكون لان هو زي ما راح زي ما رجع , لأن التغيير عمرة ما كان من برا بس , التغيير قرار ناتج عن تفكير كتير والقرار لوحده مش كفاية لاااا, دا بيترتب عليه خطوات معينه , بتتعمل عشان يكون في استمراريه , ودا بيكون علي كل النواحي في الحياة , مش بس في تبطيل المخدرات . واكيد دا بيتطلب مساعدة من متخصص , لأن مفيش حاجة اسمها ” انا عندى إرادة وهقدر ” , والكلمة دي بنسمعها كتير اوي من المدمنين بالذات, ودا طبعآ مش صح ومش حقيقي , لأن مفيش حد عنده إرادة قدام حاجة بيحبها , حاجة كانت هي كل حياته , وكانت كمان بتسعده , وبتعطيه مشاعر حلوة , حتي لو كانت مزيفه , المدمن وقتها مش بيكون مدرك دا , والحاجة الوحيدة اللي بتساعده في رحلة التعافي وانه يفضل مكمل فيه ؛ ان المخدرات دي خسرته حاجات كتير اوي في حياته , وخسرته نفسه سنين كتير اوي , لما بيفوق ويبدأ يفكر , و يحس بخسايره بمساعدة معالج طبعآ , وقتها بس بيدأ يفكر انه لازم يأخد القرار دا , ويطلب المساعدة , ووقتها بس بيبدأ رحلته في خطوات التعافي ….
