إزاي أواجه الضغوط النفسية والعصبية؟ (الجزء الثاني)

المرة اللى فاتت كان هدفنا إننا نقدر نحدد بدقة مصادر الضغوط فى حياتنا اليومية، وإيه اللى بيعمله التعرض للضغوط فى جسمنا. الوعى ده فى حد ذاته الخطوة الأولى فى التعامل مع أى مشكله. طب ليه بعض اللى حواليا بيتعرضوا لنفس الضغوط اللى بتعرضلها ويمكن أكتر ومع كده أنا اللى بتأثر وبتعب؟ إشمعنى أنا اللى مكنتش بدخل الإمتحان على آخر لحظه؟ إشمعنى أنا اللى بيقولوا عليا واخد الدنيا على أعصابى؟ عشان فى عوامل بتخلينا أكثر عُرضه للتأثر بالضغوط من غيرنا.

تعالو كده نفتكر قصة (س)..
(س) كانت بتصحى من غير نوم كفاية، كانت من النوع اللى علطول مستعجل كأنه بيجرى فى سباق، معندوش فرصة انه ياخد نفسه ويعيد ترتيب حساباته  أو يفصل من الجرى، بتعيش معظم وقتها فى اللحظة اللى جاية، بتفكر هتلاقى مواصلات ولا لأ وهيا لسه فى بيتها وبتفكر هل دخلها فى المستقبل هيكفى أولادها ولا لأ، تفكير غير مقرون بتخطيط، وهل هلحق أمضى فى الشغل ولا لأ، وده تفكير مش هيغير من الواقع فى شئ، بتحمل هم التحرش اللى لسه محصلش أصلاً، ،بتكره وجودها فى البلد، بس للأسف هى متقدرش تغير حقيقة وجودها فى البلد فى اللحظة الحالية، عقلها كده بيترجم ده إنه قدام مصدر تهديد هو عاجز ناحيته فبيحول وضع قائم لمصدر ضغط لا يتوقف.

 (س) لقت مواصلات، بس الطريق أتعطل بسبب حادثة بسيطة (س) قلقها كل مادا بيزيد وعقلها بيدور على حد يلقى عليه المسئولية، فالنتيجة ان جواها بيشتم فى السواقين والمواصلات والشغل ،وبتكره إنها بتشتغل أصلاً وبتتمنى لو كانت قاعدة فى البيت..(س) عندها صراع داخلى غير محسوم بين واجباتها تجاه شغلها وواجباتها تجاه بيتها لأنها فى الحقيقة مش محدده أولوياتها بالظبط ومش حاطة فاصل محدد بين حقوقها وحقوق الأخرين عليها ودا ظاهر فى سؤالها (أنا بظلمهم)!

(س) مش مخططة هتعمل إيه فى الغداء، مفيش خطة قصيرة المدى وده مزود الضغوط عليها فى وقت هي مش متحملة أصلاً.

(ص) زميلتها فى الشغل بتتعامل مع نفس المدير على فكرة، بس الحقيقة (ص) عمرها ما فسرت تصرفاته على انه بيستقصدها، نفس الموقف كان بالنسبة لـ(س) مصدر ضغط ومكانش لـ(ص) مصدر ضغط، الفرق هنا كان فى قراية كل واحده للموقف.

(س) قرأت الموقف على ان المدير مستقصدها لأن عندها إعتقاد راسخ أن الآخر بيرفضها وبيضطهدها، الإعتقاد ده هي ممكن متكونش واعية بيه، ممكن تكون اكتسبته من واقع تربيتها أو خبراتها، لكن (ص) قرأت الموقف ده على أن المدير حاسم فى شغله وأنه لما بيكلمها بانفعال فمحتمل إنها تكون مُقصره فى الشغل، (ص) معتقدة إن الآخر بيتعامل معاها على حسب تصرفاتها هي.

(س) لما فكرت فى المواصلات والتحرش وصلت لنتيجة إن البلد كلها بقت سيئة ومينفعش تعيش فيها ،الموضوع هنا متعلق بإستنتاج عقلى يميل للتعميم وده حول مشكلة صغيرة وممكن التعامل معاها لمشكلة أكبر وصعب جداً التعامل معاها والنتيجة إستنزاف للجسم وبس.