“أتمنى لو لم أكن نرجسية”!

عام
كتبت بواسطة فريق شيزلونج

زمان كان فيه شاب وسيم حبته حورية اسمها صدى، حاولت تغويه وتوقعه في حبها، لكنه ما حبهاش فكرامتها كحورية أد الدنيا وجعتها وقررت تنتقم منه، فاستدرجته لبركة مية –لأ ما زقتوش فيها- بس لما شاف انعكاس صورته على المية وقع في حب نفسه، ومبقاش قادر يحب حد غيره وماجربش الحب الحقيقي، وفضل على الحال ده لحد ما مات ونبتت مكانه زهرة سموها باسمه “نرجس”، وده اللي بتحكيه واحدة من أشهر الأساطير الإغريقية، واللي منها اشتق اسم “اضطراب الشخصية النرجسية”.

اضطراب الشخصية النرجسية هو ,احد من الأنواع المتعددة لاضطرابات الشخصية، مصاب بيه تقريبًا 1 ٪ من السكان في العالم، صحيح دي نسبة قليلة، لكن حواليها نسبة كبيرة من الأشخاص المحيطين بالمصابين باضطراب الشخصية النرجسية واللي بيتضرروا من نمط تفكير وسلوكيات المصاب اللي بيعاني من شعور مبالغ فيه من أهمية نفسه، وحاجتهالكبيرة للإعجاب من الآخرين،واعتقاده بإنه يستحق معاملة خاصة وشهرة وتقدير، وتصنيف نفسه بإنه الأفضل على الإطلاق.

ممكن للحظة تكون فكرت إن دي ممكن تكون ثقة بالنفس، صحيح إن  الاتنين –الثقة بالنفس واضطراب الشخصية النرجسية- بيبدأوا عند الإنسان من سن 7 سنوات، بيبدأ الطفل يقارن نفسه باللي حواليه ويقيم نفسه بإنه مثلا “شاطر”، “أمور”، “بسمع الكلام”، لكن مع بداية  المراهقة بيبدأ الموضوع يختلف تمامًا، الثقة بالنفس عند المراهق في الطبيعي بتكون في أقل معدلاتها وبتزيد كل ما بيكبر، عكس النرجسية اللي بتكون في ذروتها في المراهقة وبتتراجع مع زيادة العمر.

ممكن تسألني طيب أنا لو ما قابلتش الشخص ده من زمان ومعرفش تاريخه النفسي هاعرف منين ده عنده ثقة بالنفس ولا اضطراب شخصية نرجسية! هاقولك هو انت في كل الأحوال مش هاتعرف تشخصه لإنك مش دكتور، بس ممكن تحس إن عنده مشكلة فلو يهمك أمره تنصحه باستشارة طبيبة، وعمومًا فيه 9 معايير حددهم الدليل التشخيصي والإحصائي  للاضطرابات العقلية لو توفرت 5 منهم على الأقل في شخص بيتم تشخيصه باضطراب الشخصية النرجسية :

1- الشعور بعظمة الذات وأهميتها.

المصاب باضطراب الشخصية النرجسية حاسس إنه شخص عظيم، حاسس نفسه مهم جدًا، وكل حاجة بيعملها عظيمة، دايمًا بيحكي عن إنجازاته ومواهبه ومهاراته ويبالغ فيها ويهولها، ومتوقع من اللي حواليه إنهم يشوفوه متفوق ومتميز  ويعجبوا بيه، حتى لو كان بيعمل حاجات أقل من عادية.

2-  خيال مفرط بالنجاح أو الجمال أو الحب.

شاغل نفسه بخيالات وأوهام عن نفسه ومصدقها، زي مثلًا نجاحه اللي محصلش، عن حب الكتير ليه حب جنوني، عن قوته الجبارة، مثلًا مقتنع إنه عنده أحسن عضلة تراي حصلت في التاريخ، -ده لو راجل طبعًا-وهو في الغالب هايكون راجل لإن من 50 ل 75 % من المصابين باضطراب الشخصية النرجسية  ذكور، الإناث بقى عندها مثلًا أوهام خاصة بجمالها الفاتن.

3-  يختلف عن بقية البشر وفريد من نوعه

“أنا علي بيه مظهر يا كلاب” هو زي محمد صبحي في الفيلم حاسس إنه مفيش منه، إنسان متميز لازم يصاحب طبقة عليا راقية وناس متميزين زيه يناسبوا مستواه العالي في كل حاجة حسب تصنيفه لنفسه واللي مش حقيقي طبعًا.

4-  يستحق المديح.

إحساسه بالتميز مخليه متأكد إنه لازم يكون محاط بالإعجاب الشديد من كل اللي حواليه، ولو محصلش ده بيضايق جدًا ويحبط، في دراسات حديثةعلى 1300 شخص لاحظوا وجود علاقة بين النرجسية وبين سلوكيات على مواقع التواصل الاجتماعي، زي الاهتمام بعدد المتابعين ولايكاتهم، ومدى تكرار بوستات خاصة بحالتهم وصور سيلفي خاصة بيهم، واحباطهم لو ماحصلوش على القدر المرضي بالنسبة لهم من التفاعل.

5-  أكثر استحقاقاً من غيره.

هو شايف نفسه دايمًا رقم واحد في مجاله، وبالتالي لازم كل الناس تنفذ طلباته، لازم ياخد أحسن حاجة لإنه شايف نفسه يستحق كده دايمًا، يعني مثلًا أحسن عربية، أحسن وظيفة.

6-  يستغل الآخرين.

بيستغل علاقاته علشان يوصل للي هو عايزه، وبيتجاوز وبينهي العلاقات اللي مش مفيدة بالنسبة له، ومبيبقاش شايف ده استغلال هو شايف ده حقه! هو محور الكون ولازم كل حاجة تدور لخدمته.

7-  لا يتعاطف مع الناس.

عاجز أو رافض لفهم احتياجات الآخرين ومشاعرهم، ما بيسمعش اللي قدامه ولا بيتفهم وجهة نظر حد مش متفق معاه، معندوش قدرة يساعد حد أو يهتم بحد غير نفسه، يعني مثلًا لو بتحكي له انك اتفصلت من الشغل هايرد عليك بأد ايه هو متميز ومفروض يترقى!

8-  كثير الحسد.

بيحسد اللي حواليه شايفهم ما يستحقوش اللي وصلوا له أو حصلوا عليه، لإنهم من وجهة نظره ما يتقارنوش بيه وبتميزه! ازاي حققوا ده وهو لأ، يعني مثلًا البنت اللي عندها اضطراب شخصية نرجسية هاتحسد أي بنت غيرها ارتبطت بشخص مناسب لإنها شايفة نفسها أجمل وألطف منها، مش بس كده هي كمان شايفة إن كل الناس بتحسدها على جمالها ده.

9-  متكبر.

لو شوفت فيلم “The Devil Wears Prada” هاتفتكر ميريل ستريب في دور ميراندا بريستلي بتكبرها وقسوتها وعجرفتها وغرورها، وتقليلها من شأن اللي حواليها وتفاخرها بنفسها، وده بالظبط سمات آخر معيار للشخصية النرجسية.

الأعراض مرهقة بس العلاج بسيط، علاج نفسي بالكلام مع المختص وعلاج بالأدوية، يمكن أصعب حاجة في العلاج إن بطبيعة اضطراب الشخصية النرجسية المصاب بيحس إن العلاج مش مهم، مايستحقش وقته وجهده، علشان كده في الغالب هايحتاج دعم من صديق أو قريب يساعده يستمر في العلاج.

مصاب اضطراب الشخصية النرجسية مبيكونش سعيد، لإنه في النهاية علاقاته الشخصية والعملية بتدهور، وهو كل مدى بيشعر بالإحباط لإنه مش واخد الإعجاب والحب اللي يستحقه، فممكن جدًا يوصل للاكتئاب أو المخدرات، وده يشبه تمامًا مقطع من أغنية للمغنية الانجليزية “مارينا اند ذا دايموندز” بتقول فيه:

“أتمنى لو لم أكن نرجسية..

لو لم أقبل المرآة حين رأيت فيها نفسي..

يا إلهي سوف أموت وحيدة!”

 

 

إذا كنت تعاني من اضطراب نفسي ولا تجد من ينصت لك أو يقدم لك يد العون، فلا تتردد في التواصل مع فريق أطباء شيزلونج ليكون رفيقك في رحلة التعافي النفسي.

 

 

كتبته لشيزلونج: إيمان السيد

كاتبة صحفية وباحثة مهتمة بالشأن النفسي

 

————————————————————————————————————–

المصادر:

https://www.ncbi.nlm.nih.gov/pmc/articles/PMC3104277

http://www.bbc.com/future/story/20160802-why-we-should-pity-attention-seeking-narcissists

 

http://levylab.psych.psu.edu/publications/2015/caligor-e.-levy-k.-n.-frank-e.-yeomans-f.-e.-2015-.-narcissistic-personality-disorder-diagnosis-and-clinical-challenges.-american-journal-of-psychiatry-172-5-415-422/view

https://www.mayoclinic.org/diseases-conditions/narcissistic-personality-disorder/symptoms-causes/syc-20366662

https://www.ncbi.nlm.nih.gov/pubmed/18557663

https://www.rcpsych.ac.uk/pdf/calcmpcon2013tennysonleeewamach.pdf

http://news.bbc.co.uk/2/hi/uk_news/4633843.stm

https://www.medicalnewstoday.com/articles/9741.php

https://www.sciencedaily.com/releases/2016/12/161201112705.htm

https://news.uga.edu/narcissistic-individuals-use-social-media-to-self-promote/

https://blogs.scientificamerican.com/beautiful-minds/narcissism-and-self-esteem-are-very-different/

https://www.psychologytoday.com/intl/conditions/narcissistic-personality-disorder

أترك تعليق