سنة 2001 اتعرض الجزء الأول من سلسلة أفلام “هاري بوتر”، كانت بطلته الممثلة البريطانية “ايما واتسون”، ايما حققت نجاح باهر في دورها لدرجة إن النجم “مايكل جاكسون” بسبب الفيلم وقع في غرامها وقرر إنه يتجوزها، لو انت ما تعرفش”هاري بوتر” هاتقول جاكسون داخل البيت من بابه فين المشكلة! هاقولك المشكلة بسيطة اوي، عمر العروسة وقتها كان 11 سنة تقريبًا، ومايكل جاكسون كان عمره 43 سنة…وبغض النظر عن بعض الدول مابتجرمش زواج القاصرات، المجتمعات الحديثة عموما بتشريعاتها وقوانينها بتعتبر الانجذاب الجنسي للأطفال (مرحلة ما قبل البلوغ أو بعدها بفترة قصيرة) غير مقبول وبمثابة جريمة في حق الطفل.

نرجع لمايكل جاكسون..دكتور كونراد موراي الطبيب المعالج لمايكل جاكسون قال بعد موته إن “ايما” مكنتش أول طفلة يفكر جاكسون في الجواز منها، قبلها كان فيه “هارييت”بنت الممثل”مارك ليستر” صديقه، واللي حبها وعمرها 5 سنين، وفكر في الجواز منها وعمرها 12 سنة! لو مندهش من حب مايكل جاكسون للبنات الصغيرة هاتندهش أكتر أما تعرف إنهم مكنوش بنات بس!

بعد موت جاكسون ب5 سنين قدم الشاب الأمريكي “جيمس سايفتشاك” شكوى قضائية بيقول إنه النجم اتحرش بيه حوالي 100 مرة ولمدة 4 سنوات، لما كان بيشاركه إعلان لشركة بيبسي وكان عمر الطفل وقتها 10 سنوات، انت ممكن تقول طيب مش ممكن كل ده ظلم لنجم البوب اتقال عليه لما مات! هاقولك لأ وهو عايش كمان، لإن في التسعينيات كان فيه فضيحة فزعت العالم كله عن تحرش جاكسون بابن صديقه واضطر إنه يدفع له تعويض 15 مليون دولار، وبقى اسم مايكل جاكسون مرتبط بالبيدوفيليا.

البيدوفيليا هي اضطراب جنسي،  المصاب بيه بيكون شخص بالغ عمره ما يقلش عن 16 سنة لكن انجذابهالجنسي بينحصر في الأطفال قبل سن البلوغ وبس، فرق العمر بين مصاب البيدوفيليا  وبين الطفل الضحية ما بيقلش دايمًا عن 5 سنين علشان ينجذب ليه، وتكون له شهوة متكررة ناحيته وتخيلات جنسية معاه، وممكن الشهوات دي تتحول لممارسات فعلية مع الطفل، ما بيتبعهاش أي مشاعر انزعاج أو ذنب من الجاني بالعكس بيعتبرها تعبير عن الحب.

مش معروف لحد دلوقتي نسبة الأشخاص المصابين بالبيدوفيليا في العالم، لكن تقريبًا بتقدر ب    5% بين الرجال البالغين، وتقريبًا 4% من السيدات، النسبة تبدو مش كبيرة اوي! لكن يؤسفني أقولك إن النسبة دي تقديرية لإن النوع ده من الاضطرابات الجنسية ما بيكونش مصرح عنه وبالتالي معندناش نسب دقيقة، لكن النسبة المفزعة هي إن 20 % من الأطفال الأمريكيين اتعرضوا للتحرش الجنسي، وإن الجاني غالبًا شخص بيعرفه الطفل وبيثق فيه.

النسبة دي في أمريكا، إنما احنا مجتمعات محافظة متدينة أكيد معندناش الظاهرة دي، للأسف ده مش حقيقي، ومن غير نسب ولا احصائيات، لو فتحنا دلوقتي موقع “فيسبوك” وشوفنا الهاشتاج اللي انتشر من فترة #أول_محاولة_تحرش_كان_عمري، هانقرا حكايات مرعبة من آلاف البنات والشباب المصريين اتعرضوا للتحرش وهما أطفال، وبرضو من أشخاص كانوا في دايرة أمانهم ومعارفهم.

لكن هنا لازم نوضح إن مش كل المتحرشين جنسيًا بالأطفال مصابين بالبيدوفيليا، وإن  35 % من المتحرشين جنسيًا بالأطفال مصابين بالبيدوفيليا حسب دراسة في سنة 2006، وبالتالي فباقي نسبة المتحرشين بالأطفال عندهم دوافع تانية.

” همبرت همبرت” بطل رواية “لوليتا” للكاتب الروسي “فلاديمير نابكوف”، أثناء مراهقته بيقع في حب صديقته، وبيبدأوا بفضول ومشاغبة المراهقين يسرقوا لحظات من أهاليهم يستخبوا قرب الشاطئ ويستكشفوا سوا مشاعرهم الجنسية وإن كانت مش مكتملة لكن همبرت بيحس بنشوة وسعادة مش بيقدر ينساهم أو يستبدلهم، خصوصًا بعد موت حبيبته في السن ده، فبيفضل همبرت بيعاني من عدم تفضيله الجنس غير مع البنات اللي سنهم بين 9 و13 سنة، لحد ما يقابل “لوليتا” المراهقة اللي بيضطر يتجوز أمها علشان يفضل جنب حبيبته الصغيرة، نهاية الرواية مش مهمة بالنسبة لنا على أد ما يهمنا الدافع اللي خلاه الكاتب سبب  البيدوفيليا عند همبرت.

احجز جلسة مع معالج يمكنه مساعدتك فيما يتعلق بهذا الموضوع

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

وفي الواقع فأسباب البيدوفيليا مش معروفة بشكل واضح لحد دلوقتي، فيه بس بعض الاحتمالات إنها عوامل وراثية، أو اختلالات هرمونية، أو إن الشخص تعرض لاعتداء جنسي أو تجربة جنسية قاسية في طفولته، بس كل دي احتمالات لسه.

ويلسون و كوكس في دراسة له سنة 1983 أوضح إن المصابين بالبيدوفيليا بيعانوا من الانطواء والخجل والحساسية المفرطة والإحباط، ودراسة تانية وضحت إن 46% من المصابين فكروا في الانتحار و 13% حاولوا ينتحروا بالفعل، فعلاج المصاب مش بس بيكون لإنقاذ الأطفال من خطره عليهم ده لإنقاذه هو كمان من الانتحار.

عامة مفيش علاج فعال لتغيير التوجهات الجنسية، لكن فيه حلول علاجية بتقلل من خطورة المصاب بالبيدوفيليا على الاطفال، والعلاج بيتم بأكتر من طريقة:

• علاج المصاب بنفس طريقة علاج الإدمان، بتعريف المريض بمرضه، الدوافع اللي بتخليه يحول شهوته لفعل، ازاي يتعامل مع المواقف اللي ممكن تثير شهوته ويحاول يسيطر عليها، وتدريبه على التعاطف مع الأطفال.
• تقليل الرغبة الجنسية عند المصاب باستخدام الأدوية اللي بتتحكم في نسبة الهرمونات، أو اللجوء للإخصاء، وإن كان الحل ده مستخدم بشكل محدود في ألمانيا و التشيك  وسوِيسرا وبعض الولايات الأمريكية.
• العلاج بالتشويش من خلال ربط الرغبة الجنسية بشعور سئ زي الغثيان، رائحة كريهة، إجبار المصاب بمشاهدة أفلام لجريمته، وده زي الطريقة اللي تم علاج المجرم بيها في فيلم A clockwork orange ، واللي أثار جدل أخلاقي عنأحقية الطبيب التحكم في سلوك المريض إن كان بيأذي المجتمع ولا لأ.

يمكن يكون الطب لسة ما اخترعش دوا سحري لعلاج الاضطرابات الجنسية اللي بينتج عنها سلوكيات مش مقبولة اجتماعيا أو اللي بيجرمها القانون، لكن يظل فيه محاولات جادة وفعالة لتغيير سلوكيات المصاب دة من الاضطراب، زي ما فيه علاج نفسي متخصص لضحايا الاعتداءات الجنسية من الأطفال عشان يكملوا حياتهم بشكل طبيعي وسوي، لكن أهم حاجة هي المبادرة  بطلب المساعدة المتخصصة.

لو في محيطك طفل وقع ضحية فعل جنسي من النوع دة أو شخص عنده اضطراب بيدفعه لممارسة سلوك جنسي غير مقبول إزاء الأطفال، ما تترددش في التواصل مع أطباء شيزلونج لطلب المساعدة النفسية أونلاين بكل سرية وخصوصية.

كتبته لشيزلونج: إيمان السيد

كاتبة صحفية وباحثة مهتمة بالشأن النفسي

لمزيد من الاطلاع في الموضوع:

https://www.annualreviews.org/doi/abs/10.1146/annurev.clinpsy.032408.153618

https://www.sciencedirect.com/science/article/pii/S0025619611610744

https://www.psychologytoday.com/us/conditions/pedophilia


http://www.dailymail.co.uk/news/article-3694902/Michael-Jackson-dressed-CLOWN-romped-strippers-wanted-marry-Emma-Watson-ELEVEN-unable-wed-12-year-old-goddaughter-says-ex-doctor.html

https://www.mayoclinicproceedings.org/article/S0025-6196(11)61074-4/fulltext

https://www.ncbi.nlm.nih.gov/m/pubmed/17418075/

https://arabic.rt.com/news/754367-%D9%85%D8%A7%D9%8A%D9%83%D9%84-%D8%AC%D8%A7%D9%83%D8%B3%D9%88%D9%86-%D9%82%D8%B6%D8%A7%D8%A1-%D8%AA%D8%AD%D8%B1%D8%B4-%D8%AC%D9%86%D8%B3%D9%8A-%D8%A3%D8%B7%D9%81%D8%A7%D9%84/#

————————————————————