هو أنا زعلان ولا مكتئب!

عام
كتبت بواسطة Shezlong

“أنا مكتئب جدًا من الشغل.. أنا عندي اكتئاب  فظيع من امبارح.. انت فعلًا جبت لي اكتئاب” الجُمل دي وجُمل تانية شبهها بنقولها وبنسمعها بشكل يومي مع كل موقف بيسبب لنا مشاعر حزينة أو سلبية، فكلمة اكتئاب بقت منتشرة بين الناس لدرجة إنها بقت معتادة جدًا، وده في حد ذاته غلط، لإن خلط المفاهيم وعدم القدرة على التفريق بين الاكتئاب والحزن بيعرض المكتئب فعلًا للخطر.. لإنه لما بيقول إنه مكتئب الناس بيفتكروا إنه يقصد إنه حاسس بشوية زعل، لكن الموضوع أصعب من كده بكتير!

“أنا زعلان يا بومبا وقلبي حزين” حتى أطبال لكارتون بيزعلوا، وده لإن الحزن والبكا والدموع شعور إنساني طبيعي كلنا بنحس بيه، وده مختلف عن الاكتئاب، وده بقى اللي مش طبيعي ومحتاج تدخل من اخصائي نفسي علشان نتخلص منه، وعلشان تعرف إنت مكتئب ولا حزين فيه شوية علامات وإشارات تحذيرية لو لاحظت على نفسك 5 علامات منها أو أكتر لمدة أكبر من أسبوعين فانت ممكن تكون بتعاني من اضطراب اكتئابي جسيم:

 

  • مزاج سئ وتوقعات يائسة

الاكتئاب الجسيم هو اضطراب في المزاج بيأثر على الطريقة اللي انت شايف بيها بالحياة بشكل عام، بيخليك شايف العالم من ورا نضارة سودا مخلياك شايفه بنظرة ميؤوس منها أو عاجزة وحزينة، بيخلي مزاجك سئ ومحبط معظم الوقت، كل يوم تقريبًا،  وده أحيانًا بيخلي الناس تلاحظ نظرة الحزن اللي في عينيك ، والعرض ده هو أكتر أعراض الاكتئاب شيوعًا.

  • فقدان الشغف والاهتمامات

كل الحاجات اللي كنت بتحبها وبتستمع بيها مبقتش مهتم تعملها، ولو عملتها ما بقتش تتبسط بيها، أي حاجة بقى شغل ، رياضة، هوايات، شوبنج، جنس، فسح وخروجات، الاكتئاب بيخلي المصاب بيه ملوش رغبة في أي نشاط كان ممتع بالنسبة له في يوم من الأيام

  • زيادة الإرهاق والتعب

فجأة بتحس إنك مرهق جدًا وتعبان تعب شديد، مخليك مش قادر تعمل أي حاجة، ويمكن يكون ده اللي مخليك مش عارف تعمل الأنشطة اللي بتحبها وتستمتع بيها، وتبدأ تدور على الأسباب الصحية اللي مسببة لك التعب ده، وممكن تعمل تحاليل وفحوصات تكشف لك إنك مش بتعاني من أي مرض جسدي بيسبب لك الأعراض دي، لحد ما تكتشف إن الإرهاق والتعب ده هو واحد من أعراض الاكتئاب.

  • اضطرابات النوم

نومك ملخبط، ممكن تكون بتنام كتير جدًا، وده بسبب إنك حاسس بتعب وإرهاق، وممكن تكون مش عارف تنام وبتعاني من الأرق، وفي الحالتين لخبطة النوم دي بتخلي مزاجك سئ أكتر وبتسبب لك القلق وبتأثر على حياتك وانتظامها.

  • تغيرات في الشهية والوزن

ودي كمان حاجة بتختلف من شخص للتاني، ممكن لما تكتئب تفقد شهيتك ورغبتك في الأكل، وبالتالي بتفقد الوزن ويبقى باين عليك إنك تعبان وهزيل، أو ممكن لما تكتئب شهيتك تزيد وتاكل كتير وتكتسب وزن ممكن يوصلك للسمنة.

  • هياج نفسي وحركي

بتعاني من هياج نفسي وحركي، وتململ بيخليك تحس بعدم قدرة عل  الثبات في وضعية واحدة، وبتتصرف بعصبية وبطريقة ممكن تعرضك للخطر، حتى أفكارك متسارعة وملخبطة، ده كله علامة من علامات الاكتئاب.

  • التشتت وقلة التركيز

بتنسى الحاجات في غير اماكنها وتقعد تدور عليها، بتنسى كان مفروض تعمل ايه دلوقتي، انت حتى بتنسى كنت بتفكر فيه ايه حالًا! انت وكل اللي حواليك ملاحظين إنك مش قادر تركز، ولا قادر تاخد قرارات في حياتك مهما كان مهم تحسمها عمال تأجلها.

  • انعدام القيمة

بتسأل نفسك أسئلة وجودية من نوعية “هي ايه فايدة حياتي”، “انا بعمل ده كله ليه أصلًا” وما بتلاقيش إجابة، حاسس إن مفيش هدف لحياتك، ومعندكش تقدير لذاتك، وكمان عندك شعور بالذنب من غير سبب، حتى ممكن تكون حاسس بالذنب لانك تعبان، أو لإنك بتنام كتير.

  • التفكير  في الموت

بتفكر كتير في الموت، مش قصدي إنك خايف تموت، للكن دايمًا في بالك فكرة الموت، لما تموت مين هايزعل عليك، هايعملوا ايه من بعدك، الموت هايريحك ولا هايعذبك، وأحيانًا التفكير في الموت ما بيقفش لحد هنا بيوصل للرغبة في الموت والانتحار.

 

لو لاقيت في نفسك علامات الاكتئاب ما تتفزعش، لإنك مش هاتقدر تجزم لوحدك إنك فعلًا مصاب باضطراب اكتئابي جسيم، لإن فيه معايير وعوامل تانية بتداخل في تشخيص حالتك، ولإن الاضطرابات الاكتئابية ليها أكتر من نوع وتصنيف فانت لو لاحظت العلامات دي محتاج تلجأ لطبيب نفسي علشان يشخص حالتك بشكل صحيح، وعمومًا فالعلاج سهل وبسيط وأول خطوة فيه إنك تدرك إنك بتعاني من اكتئاب، والعلاج هايكون يا إما سلوكي أو دوائي، وانت مع الطبيب المختص هتختاروا مسار العلاج الأنسب لحالتك، علشان تقلع النضارة السودا وتقدر من تاني تشوف الدنيا ملونة.

 

كتبته لشيزلونج: إيمان السيد

كاتبة صحفية وباحثة مهتمة بالشأن النفسي

 

المصادر:

 

https://www.psychiatry.org/psychiatrists/practice/dsm

 

https://www.nimh.nih.gov/health/publications/depression/index.shtml

https://www.mayoclinic.org/diseases-conditions/depression/in-depth/male-depression/art-20046216

https://adaa.org/understanding-anxiety/depression

https://www.nimh.nih.gov/health/topics/men-and-mental-health/men-and-depression/nimhs-real-men-real-depression-campaign.shtml

أترك تعليق