“المفروض نعمل تراك زي بتاع مسابقات الجري يجري عليه المتجوزين جديد، وأول ما يعدوا سنة أولى جواز يلاقوا ناس واقفة لهم بزينة وطبل ومزامير ويدوهم شهادات تكريم وجائزة الدولة للاستحقاق لإنهم عدوا المرحلة الصعبة دي من علاقتهم” منة صاحبتي اللي اتجوزت قبلي تقريبًا ب 4 سنين كانت دايمًا تردد مقولتها الخالدة دي، واللي أنا بصراحة شديدة كنت شايفاها محض مبالغة، لكن دلوقتي وأنا فاضل لي على إتمامي سنة جواز أيام، فأنا مستنية شهادة التكريم والطبل والمزامير!

كل أصحابنا اللي لسه ما اتجوزوش بيقولوا علينا اتغيرنا اوي، شكلنا اتغير، شخصياتنا وطريقة تفكيرنا كمان اتغيروا، فيه ناس شايفانا اتغيرنا للأحسن، وناس تانية شايفين إننا اتغيرنا للأسوأ، والحقيقة أنا بتضايق من الناس اللي شايفة إن تأثير الجواز علينا سلبي، خصوصًا رابطة محبي العزوبية، اللي بيجوا يقولوا لنا جمل من طراز “هو أنا مجنونة علشان ابهدل نفسي” أو “يا عيني عليك يا ابني شيلت الهم بدري”، وعلشان يا حبيبي أثبت لك وأثبت لنفسي إن الجواز جميل وكله فوايد أكتر من السبع فوايد بتوع السفر، وإن صحابنا معندهمش حق، وإن احنا ما اتغيرناش ولا حاجة وزي الفل أهو، قررت أدور هو الجواز بيغير فينا ايه وبيأثر علينا ازاي!

في معظم الثقافات والحضارات بيعتبروا إن الجواز مفيد للصحة الجسدية والنفسية، لإن الشخص المتجوز عنده شريك بيدعمه وبيشاركه حياته، وده أكيد هايخلي صحته أحسن، لكن الدراسات الحديثة قالت لا يا جماعة الموضوع مش بالبساطة دي، الموضوع ده فيه أبعاد كتيرة، لإن مش كل العلاقات والجوازات بتتسم بنفس السمات، وبالتالي أكيد الموضوع فيه مزايا وعيوب، خلينا هانبدأ بتأثير الجواز على صحتنا، الدراسات الحديثة بتقول إن المتجوزين بيتمتعوا بصحة أفضل من غير المتزوجين، يعني مثلًا الستات والرجالة المتجوزين أقل عرضة لأمراض القلب، والأوعية الدموية وأمراض الشريان التاجي، شوف زوجي العزيز أنا وجودي في حياتك علاج والله!

أنا شايفة في عينك سؤال، بيلوح في الأفق اهو، امال ليه الزملاء والأصدقاء العزاب شكلهم يبدو أحسن! أقوم أرد عليك أنا بالأبحاث، بكلام العلم والعلماء يا حبيبي وأقولك ده لإن المجتمع مبقاش بيضغط على العزاب زي زمان، فده بيخليهم معلهمش مسؤوليات ولا ضغوط من أي نوع، ده غيري إن الدراسات بتقول إن المتجوزين خصوصًا الرجالة بيكونوا أكتر عرضة لزيادة الوزن والسمنة، ده لإنهم بعد الجواز ما بيهتموش بالرياضة، ده علشان كانوا بيلعبوها علشان يحصلوا على أجسام رشيقة تجذب البنات وبعد الجواز خلاص بقى، أو لإن مبقاش عندهم وقت وبغض النظر عن إن طبيخي حلو، فدي مش مشكلتي أنا بقى!

بالنسبة بقى لإن شخصياتنا اتغيرت بعض الجواز، فيؤسفني أقولك إن كلام صحابنا حقيقي، الجواز بيأثر على شخصياتنا وعلى نفسيتنا وده طبيعي جدًا، لإن تجربة إنك بعد ما كنت عايش لوحدك بقيت عايش مع شخص من بيئة وثقافة وتربية مختلفة، عايش معاه طول الوقت بتدين له بالولاء والمشاركة والاهتمام، أكيد لازم يكون ليها تأثير عليك، هاتطلب من كل طرف شوية تنازلات وتغيرات.

“خلي شوية عليا وخلي شوية عليك.. علشان المركب تقدر تمشي بيا وبيك”

أكتر من دراسة تم اجرائها لقياس مدى الاختلاف اللي بيحصل لشخصيات وصفات الرجالة والستات بعد الجواز، وبمقارنة دراسات ألمانية وكندية وأمريكية تمت على آلاف الأشخاص اللي اتجوزا أثناء فترة الدراسة، علشان يرصدوا التغيرات اللي طرأت عليهم بسبب الجواز، فملخص نتايج الدراسات دي إن الرجالة بعد سنة من جوازهم بقوا واعيين أكتر، عندهم نزعة أخلاقية أكتر، بقى عندهم تسامح وضبط نفس أكتر، لكنهم بقوا أقل انفتاح وأقل رغبة في تجربة حاجات جديدة ومختلفة، بقوا أقل انشراح وأقل صراحة فيما يخصهم!

الستات بقى بعد سنة جواز بقوا أقل عصبية، أكتر مسؤولية، هما كمان بقى عندهم تسامح أكتر، وللأسف برضو فالستات بعد الجواز بتبقى أقل انفتاح على العالم والتجارب الجديدة، وأقل انشراح وبتحس إنها بقت تحت قيد، لكن عمومًا فالدراسات أثبتت إن الطرفين بعد الجواز بيكونوا أقل عرضة للأزمات النفسية طالما العلاقة سوية، والواقع برضو إننا ما نقدرش نقول إن الدراسات دي بتنطبق على الكل لإن نتايجها برضو بتعتمد بشكل كبير على صفات الطرفين قبل الجواز.

“انتم اتطبعتم بطباع بعض” احنا بنسمع الجملة دي كتير، ومش احنا بس اللي بيتقال لنا كده، دي فكرة سائدة على مر الزمن في ثقافات كتير، وموضوع التشابه ده بيزيد أكتر بين المتزوجين المسنين، مكنش فيه دراسة علمية بتثبت ده أو تنفيه لحد ما باحثين في جامعة ميتشجان بعد ما قيموا صفات 1200 ثنائي متزوج، توصلوا لإن التشابه ده بسبب إن الأشخاص اللي سماتهم متشابهة من البداية بيميلوا للارتباط ببعض وعلشان كده بيتجوزا، وغالبا بيكملوا طول حياتهم متشابهين.

احجز جلسة مع معالج يمكنه مساعدتك فيما يتعلق بهذا الموضوع

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

بالرغم من كل الصعوبات اللي قابلتنا واللي بتقابلنا، ورغم صعوبة التجربة على ثنائي زينا عنده مسؤوليات وشغل كتير، إلا إني ممتنة لتجربة جوازنا، لأيام عيشتها راضية وفرحانة، وليالي نمت فيها معيطة، تجربة سنة أولى جواز اللي أتمنى تكون بتغير فينا احنا الاتنين للأحسن، زوجي العزيز خليني بدل ما أقولك كل سنة وانت طيب بمناسبة عيد جوازنا، أقولك كم جميل لو بقينا أصدقاء، أصدقاء واحنا متجوزين عادي، بنتشارك كل تفاصيل حياتنا الحلوة والمرة، بنحل مشاكلنا سوا، ولو معرفناش نحلها لوحدنا مش عيب أبدًا نلجأ لاستشاري نفسي يساعدنا نحل مشاكلنا.

إيمان السيد

كاتبة صحفية ومهتمة بالشأن النفسي

إذا كنت تعاني من مشكلات عاطفية ووجدانية مرتبطة باضطرابات جسدية، فلا تتردد في التواصل مع فريق أطباء شيزلونج ليكون رفيقك في رحلة التعافي النفسي.

المصادر:

https://www.psychologytoday.com/us/blog/happy-singlehood/201903/does-marriage-make-you-happier-in-the-long-term

http://www.bbc.com/future/story/20170831-how-marriage-changes-people-forever

https://www.sciencealert.com/marriage-changes-you-physically-and-mentally-here-s-the-science-behind-why