عند افتراق الطريق: عن التعامل مع ألم الإنفصال
عند افتراق الطريق: عن التعامل مع ألم الإنفصال
آدي اللي كان و آدي القدر و آدي المصيرنودع الماضي .. و حلمه الكبير
نودع الأفراح .. نودع الأشباح
~ صلاح جاهين
الإنفصال حقيقي جاهين لخص حكايته كلها في الكوبليه القوي والمؤثر جدا ده في أغنية ” مفترق الطريق “.
لو كان بعض الناس بيشوفوا العلاقات أمر مرهق و مربك بالنسبة لهم , يبقي الأكيد إن التعامل مع وجع الإنفصال و نهاية العلاقات أمر صعب للغاية علي البعض
لدرجة بتدفع بعض الناس للتصرف بشكل غير مقبول و أحيانا بطريقة مضرة جدا بصحتهم و صحة الآخرين النفسية .
لكن في الحقيقة حتي لو نجحنا في إنهاء العلاقات بشكل صحي مبني عالإحترام و التقدير، ممكن يفضل وجع الإنفصال و المشاعر المرهقة الناتجة عنه لو ما لم يتم التعامل معها بشكل سليم عائق في طريق النمو و الإزدهار النفسي و العاطفي و بالتالي عقبة كبيرة في رحلة التخطي .
في المقال ده بنتمني نقدم لك شوية نصائح تساعدك في تخطي وجع الإنفصال و البدأ من أول و جديد .. كل اللي محتاج تفكر نفسك بيه إن بالرغم من صعوبة موقفك دلوقتي إلا إن كله بيعدي بما فيهم الألم الشديد اللي أنت حاسس بيه دلوقتي ..يلا بينا !
إيه العمل في الوقت ده ؟
بغض النظر عن مدى استعدادك النفسي و العاطفي ،إلا إن لا يمكن ننكر مدي صعوبة إنهاء علاقة خصوصا لو لو كانت بتجمع بينكم عشرة عمر و ذكريات ، لكن لحسن الحظ ربنا زي ما خلق الداء خلق الدواء .. و مفيش مشكلة من غير حل .
أولاً .. ساعات أقوم الصبح قلبي حزين
1-اسمح لنفسك بالحزن
خللي في اعتبارك أن الحزن عملية لها جدول زمني خاص بيها, مش هينفع تستعجله , بالعكس مهم تاخد وقتك و حقك في التعبير عن مشاعر الحزن ،الغضب ، خيبة الأمل, أو الوحدة ، كل دي مشاعر طبيعية و مقبولة خلال تجربة الإنفصال .
2- عبر عن ألمك .. و لكن
خلينا متفقين الأول إن في ألم بيتولد من رحم التجربة و مع معالجته بشكل صحي ، بينور أماكن في قلوبنا و عقلنا و يزودنا بخبرة أو إتنين في الحياة و يكبرنا، وفي كمان إجترار الذكريات المؤلمة بشكل مرضي , و الدوران في دوائر مفرغة من المعاناة ، و ده شئ غير مفيد بالمرة و مهلك كليا لصحتنا النفسية و البدنية .
بالعكس حاول تخرج , تتفرج علي حاجات مبهجة , تشغل نفسك بحاجات بتحبها , تعمل ذكريات جديدة ….إغسل عينك و قلبك و خد قرار جاد في فتح شباك نور علي بداية جديدة و مختلفة جدا .
.. بطل تسمع الأغاني الحزينة أو الأغاني المشتركة بينكم
..خد فترة راحة من الأماكن اللي كانت بتجمعكم سوا قدر المستطاع
..بطل تبص علي صوركم القديمة و الذكريات اللي بتجمعكم
3- بيئة آمنة
مهم يكون عندك نظام دعم آمن مكون من مجموعة الأهل و الأصدقاء اللي عندهم درجة من الوعي النفسي و فاهمين اللي بتمر بيه.
ساعات بيكون كل اللي محتاجه إنك تعبر عن مشاعرك في بيئة آمنة ، و تلاقي حد تلجأ له في الأوقات الصعبة.
ثانياً ..أطل بره الباب . ياخدني الحنين
إقفل الباب الموارب
اخلق مسافة آمنة و مريحة بينك و بين الطرف الآخر . ..أحيانا بنقع في فخ الوعود الزائفة زي اننا هنفضل صحاب و هنفضل علي اتصال دائم ، بغرض تخفيف وطأة الإنفصال .
بس الحقيقة مفيش حاجة اسمها كدة ،أنام الاتنين محتاجين وقت ومسافة للتعافي ،و استكشاف مساحات جديدة بعيدا غن العلاقة السابقة .
اذا قررتوا في النهايةالحفاظ علي علاقات طيبة ،ده شئ جميل بس اتاكدوا من وضع الحدود المناسبة.
إرقص مع الفراغ
الفراغ بعد الانفصال أحيانا بيكون من أكبر التحديات اللي بتواجهنا ..مفيد إنك تشتثمر وقتك و تدلع نفسك .
أحيانا بنغرس في العلاقات و بننسي نفسنا , بننسي إحنا مين و عايزين إيه .
في الوقت المناسب إدي نفسك فرصة تتعرف علي نفسك من أول و جديد .. احتياجاتك ,إهتماماتك ,أهدافك ,الحاجات اللي تشبه روحك>
دور عالحاجات اللي كان وقتك مش سامح تمارسها أثناء وجودك في العلاقة ، و إكتبها و إختار كل شوية نشاط أو فكرة أو هدف حابب تحققه إفنح شبابيك الأمل و اسمح للنور يدخل قلبك .
كنتي عايزة تتعلمي التفصيل ??, حابب تحترف رياضة ما ?? ,لغة جديدة ,رحلة بعيدة …الفرصة قدامك
ثالثا : نبص قدامنا . على شمس أحلامنا
1- خد بالك من نفسك
حاول كل يوم ،تقدم لنفسك شئ:
• يسعد قلبك (قعدة صحاب دافية ، بتجربة جديدة ، هواية قديمة, طبخة حلوة)
• يغذي روحك (الصلاة ،ممارسة الرياضة ،والتأمل)
يساعد جسمك (الأكل الصحي و النوم )
• يداوي مشاعرك (أطلب مساعدة معالج ، فرغ مشاعرك من خلال االفن كالموسيقى ، أو الكتابة )
2- اعرف إمتي تلجأ لمختص
في الغالب وجع الإنفصال بياخد وقته و يعدي علي خير وبدون أي مشاكل خطيرة، لكن أحيانا بيقع بعض الأشخاص في دوامة من المشاعر بدون القدرة الفعلية علي التعامل معها ، و بشكل بيؤثر هذه على حياتهم اليومية وتمنعهم من ممارسة أبسط المهام
. إذا مر أكثر من أسبوعين علي الحالة دي ننصحك باللجوء لمختص لتوجيهك و معالجة مشاعرك الملخبطة.
وأرجع وأقول
لسه الطيور بتفن . والنحليات بتطن
والطفل ضحكه يرن
نبص قدامناعلى شمس أحلامنا
نلقاها بتشق السحاب الغميق
في النهاية..مهم تعرف إن وجع الإنفصال مهما كانت صعوبته , فهو مرحلة هتتخطاها بسلام في النهاية مع إدارة مشاعرك و حياتك بشكل صحي.أهم حاجة ، كن لطيفً مع نفسك طول عملية التخطي, و خد قرار بالتركيز علي الأشياء اللي بتجلب لك السعادة و الرضا ساعتها بس هتقدر من اتخاذ الخطوة الأولى نحو الشفاء والتعافي
للمزيد من المعلومات التي تخص صحتكم النفسية تابعوا مقالاتنا علي موقع شيزلونج.
كما يمكنكم دائما حجز الجلسات للتحدث مع أحد متخصصي موقع شيزلونج عن طريق موقعنا
إيناس طه البداوي
باحثة ماجستير إرشاد نفسي
المصادر
- Rhoades GK, et al. (2012). Breaking up is hard to do: The impact of unmarried relationship dissolution on mental health and life satisfaction. DOI:
10.1037/a0023627 - Gordon AM. (2012). When are you sacrificing too much in your relationship?
greatergood.berkeley.edu/article/item/when_are_you_sacrificing_too_much_in_your_relationship - Breaking up. (2015).
girlshealth.gov/relationships/dating/breaking_up.html - Perilloux C. (2008). Breaking up romantic relationships: Costs experienced and coping strategies deployed. DOI:
10.1177/147470490800600119 - How to get over a relationship breakup: Headspace. headspace National Youth Mental Health Foundation. (n.d.). Retrieved September 19, 2021, from https://headspace.org.au/young-people/how-to-get-over-a-relationship-breakup/.
