د. محمود الجندي يكتب: الأعراض النفس-جسمية…

كتير من الناس بيكون عندها اعراض جسمانية وبعد الفحص والتحاليل ما بنلاقيش في خلل عضوي يفسر ظهور الاعراض دي

ساعتها بنقول ان الاعراض دي سببها نفسي.

طب الحقيقة فين؟

خلينا نتفق ان في اضطرابات نفسية جزء من اعراضها بتكون اعراض جسدية اشهر الاضطرابات دي الاكتئاب والقلق والهلع واشهر الاعراض دي بتكون الآم عامة في الجسم شعور بالارهاق الدائم صداع مغص وحموضة الام بالمفاصل نغزة في الصدر الام في العضلات.

احيانا بتكون الاعراض دي اوضح من غيرها عشان كدة المريض بيلف كتير على تخصصات الباطنة والقلب والمخ والاعصاب قبل ما يتحول للنفسية.. دي اول حاجة

تاني حاجة ان وجود الاكتئاب والقلق مع اي مرض عضوي تاني في حد ذاته بيزود من شدة اعراض المرض العضوي ده.

تالت حاجة في مجموعة من الناس بتستجيب للضغوطات والصدمات والزعل باعراض جسمانية ودي بنشوفها كتير لما واحدة تزعل مع جوزها دراعها بيتشل لسانها بيتقل بتتشنج بيغمى عليها  وهكذا وده من غير مايكون في اي خلل عضوي في الجهاز العصبي واسم الحالة دي اضطراب العرض العصبي الوظيفي ودول غالبا مش بيقدرو يعبرو عن مشاعرهم بالكلام فبيلجأ العقل لتفريغ شحنة المشاعر دي على هيئة عرض جسدي منه بيبعد المريض عن الضغط ومنه بيكسب تعاطف اللي حوليه.

في نوع رابع من الناس بيكون عنده عرض جسدي وكل حاجة لكن انشغاله بالعرض ده وتفكيره فيه مبالغ فيه اوي لدرجة انه بيلف على دكاترة كتير ومهما الدكاترة يقنعوه انه كويس ومعنوش حاجة مابيقتنعش ويغير الدكتور ويعمل تحاليل كتير وممكن توصل انه يعمل عمليات استكشاف بدون داعي والحالة دي بنسميها اضطراب العرض الجسدي ودي حالة مذمنة وصعب علاجها لأن حياة الشخص بتبقى متمحورة حولين تعبه والاعراض اللي عنده.

اجعل الحياة أفضل: انشر هذا المقال على