الوسواس القهري هو أحد اﻹضطرابات النفسية الموجودة بينّا، و هو عبارة عن فكرة موجود جوا عقل الشخص المصاب بتفرض نفسها بشكل متكرر و بتقهره عشان يقوم بإرضاء الفكرة دي.
ساعات الوسواس القهري، ممكن ياخد شكل اﻷفكار الدينية و العبادات زي الصوم و الصلاة و بما إن رمضان شهر الصوم و صلاة التراويح فبيكون العبء على الكثير من الأشخاص المصابين بالوسواس القهري أكبر. و بييجي في صورة تكرار الصلاة أو الشك في عدد الركعات الشك في تكبيرة اﻷحرام أو نقض الوضوء أو الخوف دايما من بطلان الصيام بسبب أنه بيبلع ريقه في الوضوء و بيصاحب الشك المستمر دا اﻹحساس بالذنب و قلق نفسي مستمر طوال الوقت.
اﻷول لازم ندرك إن الوسواس القهري شئ مختلف تماما عن وسوسة الشيطان، فالموضوع لا يعد قلة إيمان بل دا إضطراب نفسي يعني يعتبر إبتلاء زيه زي أي مرض تاني نفسي أو عضوي و الطريقة اﻷسلم هوا المتابعة مع طبيب نفسي مختص.
من العلاجات السلوكية إللي الشخص المصاب بالوسواس في تكبيرة اﻹحرام أو عدد الركعات ممكن يستعين بيها هوا إنه ممكن يواظب على صلاة الجماعة تقدر تساعده أنه يأدي تكبيرة اﻹحرام في الصلاة و يفصل من الأفكار المتكررة في عقله و يقدر يتابع عدد الركعات من غير شك، و لو بيصلي لواحده و اﻷفكار دي بتزيد يحاول يأجل الصلاة لحد ما يهدا و يرجع ليها تاني مش لازم يستحضر من البداية هم الدخول في الصلاة بل يخش في الصلاة على طول.
بالنسبة لمشكلة الوضوء و الصيام، فمهم الشخص المصاب بالوسواس أنه يحاول يتوضأ مع حد أو يوصي حد يتابع معاه فعل الوضوء عشان يتأكد و يتثبت بيه.
و يبقى أهم شئ لو حسيت أن عندك أعراض تشبه الوسواس القهري أنك تروح تستشير طبيب نفسي مختص.
