الشخصية الهستيرية: لفت الانتباه والمبالغة في إظهار المشاعر

• عادة بيكونوا شخصيات إجتماعية وعندهم مهارات تواصل عالية بيقدروا يستخدموها ببراعة للحصول على إعجاب الآخرين ولفت الإنتباه.

• مبالغين جدًا في إظهار عواطفهم ومشاعرهم.. يعني لما بيكونوا مبسوطين بيضحكوا جدًا وبيشيعوا جو من البهجة حواليهم وفي لحظات حزنهم بيكونوا دراميين جدًا وممكن يبكوا بسهولة أمام الآخرين. حتى الطريقة إللي بيحبوا بيها الآخرين فيها مبالغة شديدة في إظهرا الحب والرومانسية.

• أوضحت الدراسات إنه معظم الرجال بينجذبوا للمرأة الهستيرية بسبب حيوتها وقوة إنفعالاتها وحبها لللإثارة والمغامرة وقدرتها الفائقة في التعبير عن مشاعرها وعواطفها وجاذبيتها الجنسية وقدرتها على التغنج والدلال. ولإنه الشخصية الهستيرية عندها مهارة فائقة إجتماعيًا ولإنها بتسعى دايمًا لجذب إنتباه المحبوب، بتقدر المرأة الهستيرية بشكل مثير للدهشة رصد ما يحبه وما يكرهه الرجل ومعرفة مفاتيح شخصيته والقدرة على إرضاؤه والإهتمام بيه ودي طريقتها مع الناس عمومًا للحصول على إعجاب الآخرين.

• من عيوب الشخصية الهستيرية وجود نزعة نرجسية بعض الشيء مع كره التعرض للنقد المستمر من الآخرين وعلشان كدة الشخص الهستيري ( لو معندوش اضطراب) بيحاول يتجنب التصرفات إللي بتسبب له النقد وبتكون سبب في ابتعاد الناس عنه. من العيوب كمان ضعف الهمة وقلة الصبر وسرعة الضجر وعدم القدر على التخطيط للمستقبل والاستفادة من أخطاء الماضي. الشخصية الهستيرية كمان عندها قدرة على الكذب وقلب الترابيزة إذا دعت الحاجة.

• بيميلوا للإثارة في حياتهم بسبب سرعة شعورهم بالملل فبنلاقيهم دايمًا يحبوا يغيروا شغلهم كتير وبيكونوا علاقات وصداقات جديدة كل فترة.. بصفة عامة هم شخصيات بتكره الروتين جدًا.

• ساعات بيدخلوا في مغامرات مندفعة وتجارب خطيرة بسبب حبهم الدائم للشعور بالدراما والإثارة في الحياة.
   لإنه الشخصيات الهستيرية بتسعى للفت الإنتباه فبنلاقيهم دايمًا مهتمين بمظهرهم وشكل جسمهم مع نزعة ملفتة في ذوقهم في الأزياء والملابس وصرعات الموضة.. هتلاقيهم دايمًا بيحبوا يجربوا الموضة الجديدة وقصات الشعر الغريبة والإطلالات الملفتة في كل شيء.

• الشخصية الهستيرية من الشخصيات المعرضة جدًا للإصابة بالاكتئاب والقلق النفسي والتوتر بسبب التشتت في العلاقات و العمل والتحول الدرامي في المشاعر وسرعة التاثر بالآخرين.

• الشخص الهستيري مش مؤذي عادة مع الآخرين، بالعكس هو بيحب دايمًا إنه الناس تحبه وتكون قريبه منه وبيعمل المستحيل علشان ده. فشله في العلاقات مع الآخرين بيكون في الأغلب بشكل غير مقصود نتيجة التذبذب العاطفي والأنانية والحاجة لكسر الروتين وعدم الحصول على الاهتمام الكافي من إللي بيحبهم.

بإختصار ممكن نقول إنه الشخص الهستيري هو شخص من الناس وللناس وكل حياته بتدور حول الآخرين وأي يتطور بيعمله في شخصيته بيكون هدفه الحصول على الإشادة والإعجاب وسماع كلمات الإطراء والحب والود.

• من المهم أن يفهم الآخرين أن الشخص الهستيري بيحتاج دايما للشعوربالإهتمام وبإنه مرغوب وبيحتاج لسماع كلمات الإطراء والإعجاب مع تجنب النقد أو تقديم النقد بشكل غير جارح وفي صورة اقتراحات ونصائح.

• الشخص الهستيري بيكره الروتين وبيعشق المغامرة والتجديد وعلشان كدة لو عايز تحوز على إعجابة لازم تفضل دايمًا تقدم حاجات جديدة وفريدة من نوعها في العلاقة أيًا كانت.

• الشخص الهستيري غير مناسب عادًة للوظائف الـ Full time أو طويلة المدى علشان كده من الأفضل إنه يشتغل دايمًا نصف وقت أو بشكل حر أو يتم تغيير طبيعية المهام المُسندة ليه كل فترة.

• أفضل مهن يُبدع فيها الشخص الهستيري هي الشغلانات إللي ليها علاقة مباشرة بالتعامل مع الناس والظهور زي العلاقات العامة والصحافة والإعلام والتمثيل والأزياء والفن بوجه عام.

• إنك تطلب من شخص هستيري النزعة إنه يكون غير إجتماعي أو إنك تحاول تدفنه او تخبيه من الناس هو أول طريق لخسارته. كمان لازم تكون متوقع إنه هيحب دايمًا يلبس ملابس ملفتة أو يكون مظهره غريب وغير سائد، محاولة الضغط عليه علشان يلبس لبس عادي زي كل الناس أو إنه يكون تقليدي في مظهره هتسببله الكبت مع الوقت.