السيرتونين وأنا.. الأسباب الحقيقية لاتهامنا بالنكد

عام
كتبت بواسطة Shezlong

في يوم من الأيام بيصحى الشاب الوسيم “لالو” بيبص في المراية فبيلاقي نفسه اتحول لبنت جميلة جدًا نتيجة لتعويذة من واحدة من ضحايا “لالو” المستهتر صاحب العلاقات المتعددة،  قررت تنتقم منه وتحوله لبنت، وبتبدأ أحداث المسلسل الأرجنتيني”lalola” اللي أنتج سنة 2007 واللي في رأيي من أكتر الأعمال الدرامية اللي عبرت عن المشاكل والمشاعر النسائية بطريقة كوميدية لطيفة من خلال مواجهة “لالو” اللي بيتريق على كل ما يخص الستات لكل المشاكل النسائية اليومية،  ومن ضمن اللي هايقابله وهو “ست” الدورة الشهرية، بوجعها الجسدي، بالخجل من نظرة المجتمع للست في فترة الدورة الشهرية، والأهم التقلبات النفسية والعاطفية اللي بتحصله وقت الدورة الشهرية.

ستات كتير تتمنى إن الرجالة اللي في حياتهم يمروا بتجربة زي اللي حصلت ل”لالو” علشان يتفهموا مشاعرهم في الفترة دي، بدل ما بيتهمونا إننا مجانين ونكديين ومش مفهومين، بس بما إننا معندناش تعويذات سحرية ممكن تخليهم يجربوا اللي بنحس بيه، فاحنا هنحاول نفهمهم بالراحة، والأهم إن كل واحدة مننا تفهم أكتر عن نفسها في الفترة دي علشان تقدر تساعد نفسها على تجاوزها بأقل ألم وخساير.

مبدأيًا مهم جدًا تكوني عارفة وتعرفي شريك حياتك إنك مش لوحدك اللي بيحصل لك كده، فيه حاجة اسمها المتلازمة السابقة للحيض  (PMS) ودي بتتعرض لها 75% من السيدات في العالم، وبتبقى أعراضها التقلبات المزاجية، ألم في الجسم، الرغبة الزايدة في الأكل، الإرهاق والاكتئاب، لكن فيه ستات وبنات كتير الموضوع ما بيقفش معاهم لحد هنا، الأعراض بتزيد وبتستمر لدرجة إنها بتصعب عليهم يمارسوا حياتهم اليومية وممكن تدمر علاقتهم الاجتماعية وده اسمه اضطراب سوء المزاج السابق للحيض (PMDD).

الأعراض بتبدأ تظهر قبل الدروة الشهرية بحوالي أسبوع وبتستمر لمدة 4 أيام تقريبًا بعد بداية الدورة الشهرية، بس علشان يتم تشخيصك بال(PMDD) لازم  تكون عندك 5 أعراض على الأقل من الأعراض الجاية، والدكتور يكون متأكد إن الأعراض دي مش بسبب حالة طبية زي بطانة الرحم والأورام الليفية، ولا مشاكل عاطفية واكتئاب، والأعراض دي هاتنفي عنك كتير من اتهامات  وشائعات الرجالة لإن ده كلام العلم مش كلامنا!

 

  • انتي مش نكدية

بس في الفترة دي نفسيتك بتكون هشة وضعيفة، ومزاجك متقلب بشكل متطرف، يعني تكوني فرحانة وبتضحكي وفجأة تحسي إنك حزينة، تعيطي من غير سبب، تكوني حساسة جدًا وبتزعلي بسرعة ومش بتتحملي ضغط.

  • انتي مش بتدوري على الخناق

بس في الفترة كل الحاجات بتعصبك وحاسة بغضب شديد، وعندك تململ وزهق، وده بيزود الخلافات الشخصية، فتلاقي نفسك بتتخانقي مع جوزك وصحابك ومديرك في الشغل على أتفه الأسباب.

  • انتي مش كئيبة

بس في الفترة دي  بتعاني من مزاج مكتئب ملحوظ،الإحساس باليأس، عدم ثقة بالنفس وأفكار بإنك مش هاتقدري تنجزي حاجة.

  • انتي مش مجنونة

بس في الفترة دي بتعاني من قلق وتوتر ملحوظ، وبتسيطر عليكي مشاعر بإنك مقيدة أو على وشك الفشل والانفصال. عندك إحساس بالارتباك، ومش عارفة تتصرفي بشكل صح، وممكن تنهاري وماتعرفيش تسيطري على أعصابك.

  • انتي مش كسولة

بس في الفترة دي اهتمامك بالأنشطة المعتادة زي شغلك والمدرسة او الأعمال المنزلية بيقل، وتحسي إنك مش قادرة ولا ليكي مزاج تعملي حاجة. بتحسي بالخمول، التعب بسرعة، وافتقاد الطاقة.

  • انتي معندكيش ألزهايمر

بس في الفترة دي بتعاني من صعوبة في التركيز، خصوصًا لو وراكي حاجات كتير، بتحسي إنك بتنسي ومش قادرة تركزي علشان تنجزي مهامك.

  • انتي مش بتدلعي

بس في الفترة دي الاعراض الجسدية زي الام المفاصل، الام الثدي، الانتفاخ، احتباس السوائل، زيادة الوزن، الام العضلات.

كمان بيحصلك تغيير في الشهية، يا إما بتاكلي كتير جدًا خصوصًا الحلويات، يا إما بتحسي إنك قرفانة من الأكل ومعندكيش شهية تاكلي.

كمان بتعاني من اضطرابات النوم، يا إما بتنامي كتير جدًا، يا إما عندك أرق.

 

طيب هو ايه بيحصل في جسمنا بيسبب لنا كل ده! الباحثون مش عارفين السبب الدقيق لـ PMDD، لكن الدراسات ربطت بينه وبين التغييرات الهرمونية اللي بتحصل في الجسم في الوقت ده، خليني أشرح لكم أكتر، فيه مادة كيمائية في المخ اسمها “السيروتونين”، المادة دي بتساعد في نقل الإشارات العصبية، وبعض خلايا المخ اللي بتستخدم السيروتونين بتتحكم في المزاج والانتباه والنوم والألم، عند الستات بقى التغيرات الهرمونية قبل الدورة الشهرية بتسبب انخفاض في نسبة السيروتونين في مخهم فبتحصل الأعراض دي،  فالموضوع مش في ايدينا يا جماعة في ايد السيروتونين.

بس خلينا نسأل الاسئلة المهمة، هل اضطراب سوء المزاج قبل الدورة الشهرية ليه علاج، ولا المصابات بيه هايفضلوا يعانوا منه طول حياتهم، الإجابة إن الأطباء حددوا أكتر من طريقة علاج علشان تقلل من أعراض ال PMDD، الطبيب المعالج هايحدد لك الطريقة الانسب لحالتك.

1-مضادات الاكتئاب

مضادات الاكتئاب ممكن تقلل من أعراض زي الأعراض العاطفية والتعب والرغبة الشديدة في الأكل واضطرابات النوم، والدكتور بيحدد لك الجرعة والوقت اللي بتاخديه فيه مضادات الاكتئاب كل شهر.

 

2- العلاج بالهرمونات (حبوب منع الحمل)

ممكن الدكتور يوصف لك حبوب منع الحمل لفترة متصلة دون انقطاع  طول الشهر أو في فترات معينة من الشهر علشان يقلل من أعراض اضطراب سوء المزاج قبل الدورة الشهرية.

 

3- مكملات الفيتامينات

1200 ملجم من العناصر الغذائية ومكملات الكالسيوم يوميًا ممكن تقلل من أعراض اضطراب سوء المزاج قبل الدورة الشهرية، .وممكن فيتامين بي-6 والماغنسيوم  كمان يساعدوكي، بس لازم تستشيري الدكتور قبل تاخدي أي مكملات غذائية.

 

4 الأدوية المضادة للالتهابات

بعض مسكنات الألم اللي لا تستلزم وصفة طبية ، زي الأسبرين والأيبوبروفين،ممكن تساعد في علاج بعض الأعراض زي الصداع وألم الظهر والتشنج، كمان مدرات البول  ممكن تساعدك في التخلص من احتباس السوائل والانتفاخ.

لكن مش كل العلاج بالدوا والأقراص، فيه مجموعة من الخطوات لو اتبعتيها ممكن تقللي من الأعراض بشكل كبير:

 

تقليل معدل الضغط النفسي وده من خلال:

  1. حاولي تاخدي كفايتك من النوم.
  2. تمارين التنفس العميق هتساعدك في تقليل نوبات الصداع، والقلق، وصعوبة النوم.
  3. جربي اليوجا أو التدليك للاسترخاء وتخفيف الإجهاد والتوتر.
  4. قللي من الكافين.
  5. تجنبي المشروبات الكحولية، وتوقفي عن التدخين.
  6. تجنبي المواقف الضاغطة نفسيًا، زي النقاشات في الأمور المالية أو مشكلات العلاقات، على أد ما تقدري.

 تغيير النظام الغذائي. 

  1. تناولي وجبات أصغر كمًا وأكتر عددًا علشان يقل الانتفاخ وإحساسك بالامتلاء.
  2. قللي تناول الملح والاطعمة المالحة، لتقليل احتباس السوائل.
  3. اختاري أطعمة ذات محتوى عالي من الكربوهيدرات المعقدة، زي الفاكهة، والخضراوات، والحبوب الكاملة.
  4. اختاري الأطعمة الغنية بالكالسيوم.

 

ممارسةالرياضة بشكل يومي

مارسي المشي السريع، أو ركوب الدراجات، أو السباحة، أو غيرها من الرياضات 30 دقيقة على الأقل، ممارسة الرياضة يوميًا بانتظام  هتساعدك في تحسين صحتك العامة، والتخلص من أعراض معينة، زي الإرهاق والحالة المزاجية المكتئبة.

الدورة الشهرية مش نقمة، دي نعمة ورزق من ربنا، سر من أسرار الحياة ربنا اختصك بيه، أمانة اتكتبت عليكي، إنك تتحملي الوجع والتعب علشان الدنيا تستمر، حبي طبيعتك اللي بتتميزي بيها، اتعاملي مع الفترة دي بفهم وحكمة، وفهمي شريك حياتك علشان يساعدك تعدي الفترة دي بسلام من غير تعب ومشاكل.

 

إذا كنت تعاني من اضطراب نفسي ولا تجد من ينصت لك أو يقدم لك يد العون، فلا تتردد في التواصل مع فريق أطباء شيزلونج ليكون رفيقك في رحلة التعافي النفسي.

 

إيمان السيد

كاتبة صحفية ومهتمة بالشأن النفسي

 

المصادر:

https://www.webmd.com/women/pms/premenstrual-dysphoric-disorder#2

https://www.mayoclinic.org/ar/diseases-conditions/premenstrual-syndrome/diagnosis-treatment/drc-20376787

https://www.ncbi.nlm.nih.gov/pmc/articles/PMC2153940/

https://www.mayoclinic.org/ar/diseases-conditions/premenstrual-syndrome/expert-answers/pmdd/faq-20058315

https://www.psychologytoday.com/au/articles/200509/pms-sufferers-listen

https://www.uptodate.com/contents/clinical-manifestations-and-diagnosis-of-premenstrual-syndrome-and-premenstrual-dysphoric-disorder

 

أترك تعليق