بقلم/ منال محي الدين

الشغف..كلنا سمعنا الكلمة دي كتير وكل واحد له تعريفه الخاص عن الشغف، ومعظمنا عارفين قد إيه مهم إننا ندرس أو نشتغل في الحاجه اللي بنحبها وقد إيه ده هيساعدنا نبقي ناجحين في شغلنا وفي حياتنا كمان.

تحب تعرف يعني إيه شغف؟

تعريف الشغف (passion) عند علماء النفس هو إنه ميل قوي تجاه نشاط معين بتحبه وبتعتبره مهم وبتديله جزء كبير من وقتك وطاقتك.

• هتستفيد إيه لما تعرف شغفك؟

العلماء عملوا درسات كتيره في موضوع الشغف ده علشان يجاوبوا عل السؤال ده لو عرفت شغفي ده هيفرق في إيه؟

1. حسب الدراسات الإنسان بيقضي أكتر من 50% من وقته في الشغل

يعني نص عمرك بتقضيه في شغلك تخيل كدا لو أنت في وظيفه مبتحبهاش ده هيكون تأثير علي إنتاجك وسعادتك إيه. أنت مش محتاج تتخيل لأن في دراسات أتعملت في الموضوع ده لو بتشتغل ف شغل مبتحبوش سعادتك هتقل بشكل ملحوظ والسعادة هنا مش رفاهية لأن لو أنت مش سعيد ومرتاح ممكن تصاب بالإكتئاب، الأرق أو التوتر واللي ممكن يؤدي لإصابتك بأمراض جسدية زي الضغط والسكر وكمان القلب!!

شوفت الشغل في حاجه بتحبها مهم إزاي.

2. السعادة ليها علاقة بالشغف!!

الناس اللي شغلتهم يدرسوا السعادة والناس السعداء في حياتهم عملوا دراسات كتير علشان يثبتوا أن السعداء أكثر نجاحاً في حياتهم، جميل وده إيه علاقته بالشغف؟ الموضوع طلع متعلق بنوعية الشغل اللي بيختاروه السعداء، عادةً بيبقي في الشغف بتاعهم ولقوا كمان إنهم بيعيشوا حاله إسمها التدفق (Flow) والحالة دي مهمة جداً علشان تبقي سعيد وهي بتعني الإستغراق التام في نشاط ما لحد ماتنسي الوقت وإحتياجاتك الأساسية زي الأكل والشرب.

طيب إمتي هتحس بالتدفق؟ هتحس بالتدفق لو أنت شغال في حاجه بتحبها (عندك شغف فيها يعني) وكمان لو الشغل المطلوب منك أعلي شويه من قدراتك الحاليه فهتحس بالآثاره والسعادة وأنت بتجيب أقصى ماعندك علشان تخلص شغلك، طب لو الشغل أعلي أو أقل من مستواك بكتير؟  لو الشغل أعلي من مستواك بكتير هتحس بالتوتر والقلق ولو أقل بكتير هتحس بالملل.

3. تقدر تحقق نجاح ملحوظ لو أخترت شغل ليه علاقه بشغفك

الحاجه اللي بتحبها هتبقي دايماً مهتم تعرف الجديد بتاعها وتطور نفسك فيها و زي ماقلنا عادةً بيبقي معاها تدفق وده معناه إنك هتبقي سعيد و مش حاسس بنفسك ولا وقتك ومندمج في الشغل بتاعك، الوقت اللي هتخصصه ليها هيبقي كبير، هتقدر تعدي عقبات كتير لأن الدافع مش المرتب ولا إرضاء المجتمع ولا أي عامل خارجي ممكن يأثر عليك شويه وبعدين يختفي. “الدافع هنا دافع داخلي للنجاح”

• أهم سؤال بقي أعرف شغفي إزاي؟

فيه خطوات بسيطة لو حاولت تطبقها ممكن توصلك لشغفك أو علي الأقل تحسنلك حياتك.

1. لو الفلوس مش مهمة كنت هتشتغل إيه؟

احجز جلسة مع معالج يمكنه مساعدتك فيما يتعلق بهذا الموضوع

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

معظم إختيارتنا في بداية حياتنا بتبقي متأثرة برأي الناس المهمين في حياتنا ونظرة المجتمع للوظيفه دي والدخل المادي اللي هتديهولنا. علشان تقدر تفهم نفسك صح وتعرف أنت فعلاً حابب إيه هتحتاج تفكر من غير المؤثرات دي كلها. أنت فعلاً بتحب إيه، اللي بيمتعك وبينسيك الوقت إيه، أول كتاب عينك بتيجي عليه لما تروح مكتبة؟ وأنت صغير كانت إيه لعبتك المفضله لو سألت نفسك الأسئلة دي أكيد هتوصلك لمكان تقدر تبدأ منه رحلة بحثك عن شغفك.

2. جرب حاجة جديدة

مش هتعرف أن شغفك هو التصوير لو عمرك ماجربت تصور!!  لما تحس أن في حاجه بتشدك جربها، حاول تخصصلها وقت حتي لو كان صغير وتجربها فيه وتشوف رأيك فيها إيه ومع الوقت.

تجربتك دي هتديك صورة أوضح عن المجال وعن إذا كان هو المجال المناسب ليك ولا لأ.

3. كون صداقات خارج مجال دراستك أو عملك

لو كل أصحابك من نفس الكلية أو من شركتك مش هتتعرض لمؤثرات كتير ولا نوعيات شغل مختلفه، حاول تتعرف علي ناس بتشتغل حاجات مختلفه وخد معلومات منهم عن شغلهم ولو حسيت إنك مهتم بالشغل ده ممكن تطلب ممكن يساعدوك إزاي تبدأ، صدقني هيوفروا عليك كتير.

4. تطوع

من أحسن طرق التعلم إنك تلازم شخص في المهنة اللي عايزه تتعلمها وتتابعه وتتعلم منه كل حاجه بيعملها بشكل عملي. وأسهل طريقه تعمل بيها ده إنك تتطوع للعمل في المكان اللي حابب تعرف عنه أكتر أو تتعلم من الناس اللي فيه وصدقني تطوعك ده هيعود عليك بحاجات لا تقدر بمال فعلاً منها شبكة العلاقات اللي هتفيدك جداً وأنت بتبدأ وكمان كمية العلم اللي هتاخده بطريقه عملية لأن الكُتب لوحدها عمرها ماهتحطك علي الطريق الصح ولا تعملك الدنيا ماشيه إزاي.

5. أسأل الناس اللي حواليك شايفين إيه مميز فيك

كتير أصحابنا وأهالينا بيبقوا شايفين فينا حاجات ممكن منكونش شايفنها في نفسنا، جرب تسألهم عن رأيهم فيك وإيه اللي بيميزك وده هيساعك جداً وأنت بتدور علي شغفك لأن جزء كبير من الشغف ليه علاقه بسمات شخصيتك يعني مثلاً  مش هينفع تشتغل في المبيعات وأنت مبتحبش التعامل مع الناس.

6. متخافش

من أكبر المعوقات اللي ممكن تقابلك في رحلتك في البحث عن شغفك هي الخوف، خوفك من الفشل أو نظرة المجتمع أو عدم رضا أهلك عن اللي بتعمله. علشان تقدر تكمل رحلتك لازم تقهر خوفك وده ممكن يكون عن طريق إنك تحدد الخطوات اللي عايز تاخدها بشكل دقيق وتحسب المخاطر اللي ممكن تتعرضلها وتكون مجهز دايماً خطط بديله وطبعاً متاخدش قرارات سريعة غير مدروسة خد وقتك واستمتع بالرحله دي لأن وقتها مش ثابت وظروفنا وشخصياتنا مختلفة دايماً حط ده في حساباتك.

7. حاسس إنك أتأخرت

متقلقش أنت ممكن في أي وقت تبدأ رحلتك، الحياه مش خط مستقيم أنت ممكن في أي وقت تبدأ في حاجه جديدة وعلشان قدراتك وشغفك فيها هتقدر تنط بدل ماتمشي خطوات بسيطة.

صدقني الموضوع يستحق إنك تفكر فيه وتديله من وقتك وتجرب علشان توصل للي بتحبه صدقني ساعتها هتحس إنه كان يستاهل كل التعب والتفكير وكمان هتحس أد إيه الرحله كانت ممتعه.

دمتم سعداء 🙂