كلنا بنقع.

بس مش كلنا بنعرف نقوم.

في ناس أول ما تتخبط، بتتكسّر وتغرق في الحزن.

وفي ناس تانية، رغم وجعهم، بيطلعوا من كل أزمة أقوى من الأول

الفرق مش في الحظ،

ولا في كمية الألم اللي شافوه،

الفرق في المرونة النفسية العضلة اللي بتخليك تقف تاني على رجلك لما الدنيا تهزّك.

المرونة مش معناها إنك ما تتأثرش،

ولا إنك تبقى “قوي دايمًا.

المرونة معناها:

إنك تتكسر وترجع تداوي نفسك،

تتعور وتتعلم،

وتعرف تمشي رغم الخدوش.

في دراسة مشهورة من جامعة بنسلفانيا (Seligman & Reivich, 2002)

بتقول إن المرونة النفسية مش “هدية من السماء”،

دي مهارة بتتعلّمها زي أي حاجة تانية.

إيه اللي بيحصل في المخ لما بنتعرض لضغط؟

لما الدنيا تضيق (Amygdala)اللوزة الدماغية  بتفهم إن في خطر

فالمخ بيبدأ يفرز كورتيزول (هرمون التوتر)،

وبيحط الجسم في وضع “قاتل أو اهرب”.

لكن الناس اللي عندها مرونة نفسية،

المخ عندهم بيتعلّم يرجع بسرعة للوضع الطبيعي،

بتفضل في نشاط أقوى وهي  (Prefrontal Cortex) القشرة الجبهية الأمامية 

للي بتنظّم الانفعالات وتتحكم في التفكير المنطقي.

يعني ببساطة:

مش إنهم ما بيتوترّوش،

لكنهم بيعرفوا يهدوا أسرع.

أمثلة من الحياة:

سيرينا ويليامز:

بعد ما خسرت بطولة وواجهت مشاكل صحية ونفسية،

قالت إنها استخدمت كل وجع كفرصة مراجعة لنفسها

ورجعت تحقق بطولات بعد سن الأربعين.

محمد صلاح:

من لاعب مرفوض في بدايته،

لبطل عالمي اتعلم من كل رفض دروس..

صلاح دايمًا بيقول:

“كل خسارة كانت تدريب للي بعدها.”

المرونة هنا مش حظ…

هي عقلية اسمها: “مش دي النهاية.“”

العلم بيقول إيه؟

دراسة (Fletcher & Sarkar, 2012)

لقيت إن الرياضيين ذوي الأداء العالي

مش أقل توتر من غيرهم،،

لكنهم بيعرفوا يحوّلوا الضغط لطاقة..

وفي دراسة تانية (Southwick & Charney, 2018)،

اتكلموا عن 10 عوامل للمرونة النفسية، منها:

– العلاقات الداعمة

– المعنى الشخصي

– حس الدعابة

– الإيمان بقدرتك على التكيّف

يعني المرونة مش بس في “العقل”

دي كمان في “القلب” والعلاقات والمعتقدات..

إزاي تبني المرونة النفسية؟

1- اعترف بالمشاعر:

ما تكتمش وجعك، ما تزوّقش الواقع..

اللي بيواجه مشاعره بيتحكم فيها،،

واللي بيهرب منها بيعيش أسيرها..

2- غيّر طريقة كلامك مع نفسك:

بدل “ليه ده حصل لي؟”

جرب تقول “إزاي أتعلم من ده؟”..

مجرد تغيير السؤال يغيّر كيمياء التفكير.,

3- ابني شبكة دعم:

الناس اللي حواليك مش رفاهية..

الكلمة الحلوة، الحضن، أو المكالمة،

ممكن تبقى الفارق بين الانهيار والقيام.

4- مارس الامتنان حتى في وقت الوجع:

مش عشان تتظاهر إنك بخير،،

لكن عشان تفتكر إن لسه في نور في آخر النفق..

5- اعتني بجسمك:

نوم كفاية + أكل صحي + شوية رياضة

= مقاومة أعلى للتوتر النفسي،

الجسم والمخ على نفس الفريق.

– تمرين عملي: “يوميات القوة”

كل يوم قبل ما تنام، اكتب:

موقف واجهته النهارده وكان صعب.

إيه اللي اتعلمته منه؟

وإزاي تصرفت بشكل كويس رغم الضغط؟

بعد أسبوعين، هتتفاجئ إنك أقوى مما كنت فاكر..

من الآخر:

المرونة النفسية مش إنك ما تقعش…

لكن إنك كل مرة تقع، تقوم أذكى، أهدى، وأقوى.

مش لازم تبقى “سوبرمان”،

كفاية إنك تبقى إنسان… بيحاول،

وبيكمّل رغم التعب.