ما بين الوردي والرمادي..
ما بين الوردي والرمادي..
شوفت سحر الحب عامل فيا ايه..
دوشة حلوة زي ما تكون سيمفونية..
حتى قلبي اتجن وبيرقص باليه..
بكلماته وصف صلاح جاهين بداية الحب، وبصوت مليان بالخفة والبهجة غنت سعاد حسني اللي الحب والهوى مخلينها شايفة حتى الضلمة “بمبي”، زيها زي كل اللي بيقعوا في الحب، وبيعيشوا حلاوة وسحر بداية بداياته، البدايات اللي بالرغم من جمالها إلا إنها ممكن تكون مخادعة، والحب اللي كنا فاكرينه أبدي يخلص، والعلاقة تنتهي أسرع ما كنا نتخيل، علشان كده الأبحاث والدراسات بتقدم شوية علامات ودلائل تساعدك تعرف العلاقة دي ليها مستقبل وهاتكمل ولا دي مجرد علاقة عابرة وهاتنتهي بسرعة، إجاباتك على الخمس أسئلة دي هاتوضح لك حاجات كتير:
- إلى إي مدى تشبهوا بعض؟
وهنا أنا ما أقصدش صورة البروفايل اللي مقسومة نصين، نص وشك ونص وش حبيبك ومكتوب تحتها “ملامحك كلها مني يا دوب الاسم متغير”، أنا أقصد التشابه في الاهتمامات، القيم، الأفكار، المعتقدات، الأهداف، طريقة التفكير، مدى التفتح وتقبل الآخر، حتى الذوق والتفضيلات، لإن الدراسات بتقول إن الأشخاص بينجذبوا غالبًا للشركاء المختلفين عنهم في العلاقات القصيرة، لكن في العلاقات الطويلة المستقرة اللي بتنتهي بالالتزام العاطفي بينجذب الشخص للطرف الل بيشبهه، والتشابه ده مش معناه تطابق، لإن مفيش اتنين نسخة بالكربون، لكن تكون نسبة الحاجات اللي انتم متشابهين فيها أكتر من الاختلاف بينكم.
- هل عينيك ما بتشوفش غيره؟
أي حد لما بيقابل شخص من الجنس الآخر بيفكر فيه ولو لحظة هل ده يصلح يكون شريكه العاطفي!، وده ما بيحصلش في حالة واحدة إنك تكون في علاقة جدية محققة لك الاكتفاء وملتزم ومخلص لشريكك العاطفي، والدراسات أثبتت إن العلاقات الثابتة القوية بتخلي حواس وعقل الشخص ما يتشتتش بالمغريات والاحتمالات حواليه، بس لو كان واحد من الطرفين بيتعامل إنه لسه مش مرتبط ولما بيقابل حد جديد بيفكر إنه ممكن يكون حبيب محتمل له، بيقارن وبيفكر هل يصلح له ولا لأ، ده معناه إن علاقتكم مجرد اندفاع وتسرع ملهاش مستقبل.
- هل انت خايف تفضل “سينجل”؟
ساعات الخوف من الوحدة، والرغبة في إنك تدخل في علاقة، وإن يكون عندك حبيب تعيش معاه الأجواء الرومانسية، حاجتك إن يكون فيه شخص معاك سواء لإنك أصلًا وحيد وزهقان، أو لإنك ما بتقدرش تقعد وقت طويل من غير ما تكون مرتبط، فبتخرج من علاقة تدخل في غيرها بسرعة، أو لإنك حاسس إنك كبرت وخايف تفضل أعزب، ده ممكن يخليك تقلل معاييرك في اختيار شريك حياتك، وطموحك العاطفي يقل، وتتصرف بتهور واندفاع عاطفي بيخليك مش عارف تفرق بين الأشخاص اللي يستحقوا حبك واهتمامك وبين اللي ما يستاهلوش، فلو انت ارتبطت في الظروف دي راجع نفسك لإن ده مؤشر إن اختيارك مكنش سليم بشكل كبير، وممكن علاقتكم ما تكملش.
- هل اتعرفت على أصحابه وأهله، والعكس صحيح؟
“الأهم من إنك تخليها تحبك وتوافق عليك، إنك تخلي صاحباتها تحبك وتوافق عليك” الجملة دي حقيقة بشكل كبير لإن الأبحاث أثبتت إن كل ما زاد عدد الأصدقاء اللي حابين ومستلطفين شريكك العاطفي، كل ما زاد الاحتمال إن العلاقة دي تكمل، فلو انت علاقتك جدية وناوي تكمل، أكيد هاتعرّف الشخص اللي انت مرتبط بيه على اصحابك وأهلك بعد ما تكون حكيت لهم عنه، وتبدأ تدمجه في دايرة معارفك وشبكاتك الاجتماعية، والمفروض الطرف التاني كمان يعمل كده، ولو ده محصلش يبقى فيه طرف مش متأكد إنه عايز يكمل.
- رد فعله بيكون ايه لما بتيجي سيرة الجواز؟
لما بتيجي سيرة الجواز، الأفراح، الأولاد والبيت، هاتيجي تقابل بابا امتى، بيكون رد فعله ايه، بيتهرب وبيغير الكلام، بيستخدم أساليب المراوغة، بيخترع خناقة علشان ينهى الحوار، بيتجنب القعدات اللي بتكلموا فيها عن طبيعة علاقتكم، بيخاف لما العلاقة بينكم بتتطور، وبتقربوا من بعض أكتر، كلامه عام مفيهوش أي تلميح للمستقبل، كل دي علامات أكيدة إن علاقتكم مش جدية.
ما تفتكرش إن الإجابة على الأسئلة دي هاتكون سهلة، وهج الحب هايكون مشوش رؤيتك، ومراية الحب مش هاتخليك تشوف الحقيقة بسهولة، فالإجابة محتاجة منك كتير من الهدوء والموضوعية، ولازم كمان تحط في اعتبارك إن فيه أسباب تانية كتير ممكن تخلي العلاقة ما تكملش، لكن احنا هنا بنشاور لك على الأسباب الرئيسية اللي لازم ناخد بالنا منها بدل ما الحياة اللي لونها بمبي تتحول للون الرمادي في علاقة مش واضح معالمها، لحد ما تنتهي بعد ما تكون سرقت كتير من طاقتنا ونفسيتنا ووقتنا.
إذا كنت تعاني من اضطراب نفسي ولا تجد من ينصت لك أو يقدم لك يد العون، فلا تتردد في التواصل مع فريق أطباء شيزلونج ليكون رفيقك في رحلة التعافي النفسي.
إيمان السيد
كاتبة صحفية ومهتمة بالشأن النفسي
المصادر:
http://www.psych.nyu.edu/amodiolab/Publications_files/Amodio_Showers_2005.pdf
http://psycnet.apa.org/record/2001-17979-002
http://www.individual.utoronto.ca/sspielmann/Spielmann_et_al_inpress_JPSP.pdf
