د. محمود الجندي يكتب: عن العلاقات وانواعها
د. محمود الجندي يكتب: عن العلاقات وانواعها
العلاقات وانواعها وايه بيحدد شكلها…..
في واحد اسمه John Bowlby كتب نظرية سماها Attachment Theory
النظرية بتقول ان كل طفل بيتولد بجهاز نفسي فطري اسمه Attachment-Behavioral System
وظيفة الجهاز ده دفع الطفل للقيام بسلوكيات هدفها تحافظ على تواجد الأباء أو أي شخص قادر على توفير الأمان وحماية الطفل ورعايته )Attachment Figure ) وخصوصا في أوقات الضغط زي الطفل اللي بيبدأ يعيط ويصرخ لما يحس ان أمه هتسيبه أو لما يتحط في مكان فيه أغراب أو لما يتعرض لأي خطر عموما.
السلوكيات دي بنسميها Primary Strategies ولو الأهل قدرو ساعتها يوفرو للطفل ده احتياجاته من الحماية والإحساس بالأمان ساعتها بنقول ان الطفل ده Securely Attached
لما تفشل السلوكيات دي في جلب عطف الأب وحمايته ورعايته زي ان الأهل يكونو مهملين ومتجاهلين لاحتياجات ابنهم الطفل بيبدأ في تفعيل سلوكيات تانية بنسميها Secondary Strategies
الطفل اللي بيكتشف ان الصراخ والعياط وطلب الحماية من الأهل استيراتيجيات مش جايبة همها بيستجيب لده بحاجة من اتنين:
اما ان الطفل يعمل Hyperactivation of the Attachment System وساعتها الطفل ده هيستجيب لأوقات الضغط والخطر بالمبالغة في الإنفعال والخوف والرهبة الشديدة من غياب الأهل وده بنقول ان عنده Anxious Attachment وده لما بيكبر بيبقى عنده قلة الثقة بالنفس واعتمادية على الأخرين ورهاب شديد من فكرة الهجر لدرجة ان ممكن يقدم تنازلات كتير عشان يحافظ على استمرار علاقته بالأخرين وبيكون قليل الحيلة ودايما محتاج للحب والاهتمام ودايما منشغل باحتياجاته هو وبيتجاهل احتياجات شريكه.
أو ان الطفل يستجيب بإنه يعمل Deactivation of the Attachment System وده معناه ان الطفل قرر انه يتجاهل مشاعره عشان ما يتعرضش لصدمة انه يحتاج لحد وما يلاقيهوش والطفل بيعوض احتياجه للأخرين بالمبالغة في التركيز على نفسه عشان يثبت انه مش محتاج لحد اما من خلال تضخيم تعويضي للذات (نرجسية) أو المبالغة في تحمل المسؤولية ونقض الذات(مثالية) وده بنقول ان عنده Avoidant Attachment والشخص ده بيبقى صعب عليه يكون علاقات لأنه بيبقى منعزل عن مشاعر الأخرين ومشاعره هو شخصيا عشان المشاعر بالنسبه له ضعف.
وفي الحالتين بنقول ان الطفل ده Insecurely Attached
عشان كدة بنأكد ان مهم جدا جدا ان ابنك وقت ما يحتاجك يلاقيك..
