د. محمود الجندي يكتب: تعرف على اضطراب الشخصية الحدية وعلاقته باضطراب ثنائي القطب

مبدئياً الشخصية معناها نمط ثابت ومستقر من طريقة التفكير والشعور والتصرف في العلاقات والاستجابة للضغوطات بتميز الشخص عن غيره واللي بتبدأ تتشكل من الطفولة لحد اما توصل لشكلها النهائي لما الانسان يتم ١٨ سنة.

طيب ليه حدية؟

العلماء لما قالو حدية كان قصدهم انها شخصية تقف على الحد الفاصل ما بين العصاب والذهان لا هي كدة ولا هي كدة حاجة بين الاتنين

وده لأن الامراض النفسية بشكل عام بتتقسم لنوعين كبار:

العصاب وده بيشمل اضطرابات المزاج زي الاكتئاب والهوس والوسواس واضطرابات الصدمة

الذهان وده بيشمل الاضطرابات اللي بيفقد فيها الشخص اتصاله بالواقع زي الفصام والبارانويا والضلالات والهلاوس

عشان نفهم ليه حطو الشخصية دي في النص لازم نعرف ان لو في حاجة أساسية بتميز الشخصية دي فهي عدم الاستقرار

الشخصية دي مستقرة في عدم استقرارها.. عدم الاستقرار في كل شئ

في أفكارها ومشاعرها واهدافها وعلاقاتها وحتى هويتها..

جه منين عدم الاستقرار ده؟

 كل شخص وله مزاجه المميز

في شخص بطبعه عصبي وشخص هادي وشخص فرفوش وشخص نكدي

اللي بيميز مزاج الشخصية الحدية انه حساس جدا

شديد التفاعل من أقل استثارة بيوصل لدرجات عالية جدا من الانفعال

ودي اول حاجة بيلقطها اي حد بيتعامل معاهم

ان مشاعرهم قوية جارفة وبتنتقل من الصفر لمية في مفيش ومن النقيض للنقيض ومن أتفه الأسباب

للدرجة اللي بتخلي التعامل معاهم صعب ومرهق لأن أي غلطة ممكن تشعل الفتيل

وعشان مشاعرهم قوية جدا وجارفة بتبقى مسيطرة بالكامل على وعيهم ونظرتهم وحكمهم على الامور للدرجة اللي بتخليهم يتجاهلو أي دليل او اي صوت يخالف احساسهم

وده بيدي انطباع للي بيتعامل معاهم انهم ذهانيين لأنهم في وقت غليان مشاعرهم بيكونو مؤمنين جدا باللي حسينه مهما خالف الواقع ويكأنها ضلالات ولأن التغيير بيكون مفاجئ فبيبان كأن الشخص بيتحول بيكون حد تاني مش هو وده بيخليه مش مستقر مش عارف هو مين وعاوز ايه بيحب ايه وبيكره ايه

وعشان التغير الوجداني المفاجئ ده ناس شافت اننا ممكن نضم اضطراب الشخصية الحدية لمجموعة الاضطراب الوجداني ثنائي القطب لكن الفرق بين الاتنين ان التغير العنيف في المزاج بالنسبة للشخصية الحدية بيكون اسرع ووقته اقصر وبيكون لسبب حتى لو تافه لكن الاضطراب الوجداني بيكون تقلب المزاج فيه تلقائي تدريجي وبيقعد فترات اطول

هنتكلم أكتر عن سمات الشخصية دي وديناميتها والعلاجات المتاحة ليها في مقالات لاحقة..

يتبع..

اجعل الحياة أفضل: انشر هذا المقال على