Blog Post

د. محمود الجندي يكتب: النرجسية والمازوخية.. هل هناك رابط؟

نشر بواسطة

Sarah Bahader

المشاركة الى:

مبدئياً لازم كلنا نفهم ان في مرحلة ما من النمو كل الأطفال بيبقو نرجسيين

حرفياً كلنا مرينا بمرحلة كان الكون كله بيدور حولينا

أم وأب هدفهم راحتنا ومن أقل انزعاج بيجرو علينا يلحقونا

يكفي اننا نظهر أي بادرة ضيق وفجأة نلاقي كل أحلامنا اتحققت سواء أكل أو شرب أو نوم

أي حاجة مضايقانا مهما كانت بسيطة بتتحل في ساعتها

وده بيولد في الطفل احساس بأهمية الذات وقدرتها المطلقة وبإنها أهم شئ في الوجود

لكن وفي أفضل الظروف ومهما كانت الأم متفانية في رعاية ابنها مفيش مفر من بعض الإحباط

زي انها تتأخر عليه شوية في الرضعة او يكون بيعيط وتأخد وقت على ما تفهم اللي مضايقه أو انها تكون مرهقه ومش قادرة تلبي طلباته بالسرعة المعتادة

وده بيسبب احباط شديد للطفل

شديد لدرجة ان البعض بيسميها Narcissistic Injury

صدمة شديدة بتضرب جدران الذات

فجأة بيكتشف انه معتمد على أخر وتحت رحمته وانه عرضة للألم والمعاناة في أي وقت

في الطبيعي الطفل بيقدر يتجاوز المرحلة دي بفعل غريزة المبادرة اللي جواه وانه يستمتع باستقلاليته وانه يجرب ويستكشف بنفسه ويبدأ يسيطر على جسمه وحركته ويقدر بإيده يوصل للي هو عايزه

لكن بعض الأطفال ما بيقدروش يحققو التوازن فمببعرفوش يتخلو بسهولة عن عرشهم ومركزيتهم

ما بينسوش بسهولة النعيم اللي كانو فيه والألم اللي حسوه بعد ما اتسلبت منهم أفضليتهم

بس هم مدركين كويس ان الاحباط حتمي وانهم مهما حاولو يحتفظو بامتيازاتهم الواقع هيجرحهم تاني وتالت وهيتكسروا

وعشان الألم حتمي وعشان نرجسيتهم بتمنعهم يقبلو الأمر الواقع فالحل انهم يختارو الألم بمزاجهم بل كمان ويستمتعو بيه

ومبدأهم اللي عايشين بيه:

أنا أخترت أتألم بمزاجي محدش فرضه عليا واخترته عشان بتبسط بيه

او بمبدأ لو معرفتش أكون أكتر طفل مدلل هكون أكتر طفل تعيس وسئ الحظ

ونرجسيتهم هنا بتتغذى على كونهم الأكثر ألما الأكثر معاناة الأكثر سوءا

أفضلية بس بشكل سلبي

كمان ده بيسمحلهم يردو للي حوليهم الألم اللي خدوه لما أحبطوهم

لأنه طول الوقت بيحسس اللي حوليه انه ضحية وبالتالي لازم الكل يعامله معاملة خاصة ويعملوله اللي هو عاوزه تكفيرا عن خذلانهم ليه

لكن مهما عملو مش بيرضى لأنه طول الوقت عاوز يبقى ضحية فبيقاوم أي وسيلة مساعدة حقيقية وما بيحاولش يبذل مجهود حقيقي يحسن بيه من وضعه

بالعكس بيختار ديما المهام اللي هو عارف انه هيفشل فيها وديما بيحمل نفسه فوق طاقته وبيحط لنفسه معايير صعب تحقيقها عشان يبقى فشله حتمى ويفضل يعاني وساعتها يقدر يقول:

شفتو انا بعاني اد ايه شفتو اني مهما حاولت مش هنجح شفتو الحياة ظلماني ازاي

بس من جواه بيكون في قمة السعادة والرضا

اجعل الحياة أفضل: انشر هذا المقال على

اترك تعليقاً

Required fields are marked

اشترك في نشرة الأخبار ليصلك أفضل المقالات لدينا: