حمايتك الزايدة لأطفالك ممكن تسببلهم “أكروفوبيا”

عام
كتبت بواسطة فريق شيزلونج

“منال” زي ناس كتير مننا، بتخاف من الأماكن العالية والمرتفعات. بس الموضوع زيادة عند منال شوية، لدرجة ان أحيانا طلوع السلم بيصيبها بدوار وخوف وضيق تنفس، ولدرجة ان فكرة وجود شباك في الشقة اللي هي واقفة فيها لو الشقة دي في دور تاني أو أكتر بيخليها قاعدة متوترة جدا وقلقانة وفاقدة جزء كبير من إحساسها بالأمان. دة لأنها مصابة بالأكروفوبيا أو الخوف المرضي من الأماكن المرتفعة، واللي هو واحد من أكتر أنوا عالفوبيات انتشارا في العالم.

كلنا بنخاف على أطفالنا من المرتفعات والأماكن المرتفعة، لكن لما بنبالغ في خوفا دة ولما بنخلق حالة من الذعر حوالين الشبابيك والأبواب في وجود أطفال، دة بيخلق الطفل تلقائيا يربط بين الخطر والموت والألم والسقوط من ناحية وبين الشبابيك والأماكن المرتفعة من ناحية تانية..الشخص المصاب بالأكروفوبيا هو غالبا طفل بالغت أمه في حمايته من الأماكن اللي “عالحافة” سواء في أماكن مفتوحة أو في بلكونات البيت.

اللي بتلاحظه على المصابين بالأكروفوبيا انهم بمجرد تواجدهم قرب مكان عالي أو قريب من سور بلكونة أو سطح، انه بيبدو عليهم التوتر والخوف الشديد وتبقى إيديهم تلقائيا بتدور على حاجة تمسكها وتتسند عليها ، وتلاقي الشخص ابتدا يعرق، ويفقد تركيزه في أي شيء ما عدا الخوف الشيد اللي عنده، والحقيقة كمان ان ضربات قلبه بتزيد وبيبقى كل همه يهرب من المشهد المخيف دة حتى لو كان المخرج– ودة وارد في بعض الحالات- هو بانه يرمي نفسه من الارتفاع الشاهق دة وينهي المعاناة دي. الموضوع ممكن إذن يبقى جدي جدا، ما تتعاملش معاه باستخفاف وما تجبرش مريض أكروفوبيا انه يقف “ع الحافة” على أساسا انك بتساعده يغالب خوفه..الحقيقة انك غالبا حتكون بكدة بتعرضه لتعذيب نفسي شديد. هو عارف ان مافيش خطر حقيقي من البلكونة وان المكان آمن، بس دة مش كفاية عشان يتغلب على خوفه ويقف معاك ببساطة في مكان مرتفع… عقله الواعي شايف حاجة بس عقلة الباطن مترجم الأمور بشكل تاني خالص وبيحطله المشهد دائما في قايمة “خطر جدا” وصريخ وزعيق وحاجات بتقع وموت محتمل!

طيب والحل؟

كتير من حالات الأكروفوبيا مش محتاج علاج لأن نسبة المرض أصلا مش مستدعية دة، عالاقل لأن الفوبيا دي مش معطلة حياة الشخص المصاب بيها. في الحالة دي كفاية بس ان الشخص اللي عنده الخوف دة يبعد عن الأماكن اللي بتثير خوفه. لكن فيه حالات تانية بتبقى حياتها معطلة بسبب الفوبيا دي وهنا لازم علاج نفسي.

والعلاج في الحالة دي بيشمل حاجتين بالتوازاي:

  • الأدوية: ودي فعالة لكن ما بتحلش المشكلة الأساسية، هي بس بتخفف حالة الهلع دي والتوتور اللي بيصاحبوا الفوبيا.
  • العلاج النفسي عن طريق الجلسات اللي بيحاول فيها المعالج يساعد المريض انه يتعرض للأماكن العالية بالتدريج ويحاول يشتغل على فض الاشتباك اللي حصل في عقله الباطن دة سواء كان سببه راجع للحماية الزايدة في الطفولة أو لحادثة معينة خلفت عندها الخوف دة.

 

كتبته لشيزلونج: نيرة الشريف

 

إذا كنت تعاني من اضطراب نفسي ولا تجد من ينصت لك أو يقدم لك يد العون، فلا تتردد في التواصل مع فريق أطباء شيزلونج ليكون رفيقك في رحلة التعافي النفسي.

 

المصادر:

https://www.thesun.co.uk/fabulous/2652730/phobia-acrophobia-fear-heights-cures-symptoms/

https://www.verywellmind.com/acrophobia-fear-of-heights-2671677

https://www.healthtopia.net/disease/mental-health/phobia/acrophobia-causes-symptoms-treatment

 

 

 

أترك تعليق