بداية الرحلة..الجلسة الأولي في رحلة العلاج النفسي
بداية الرحلة..الجلسة الأولي في رحلة العلاج النفسي
الجلسة الأولي في رحلة العلاج النفسي أحيانا بتكون قرار صعب علي بعض الناس ، زيارة المعالج النفسي لأول مرة ساعات بتكون شئ مثير للقلق.
يمكن فكرة إنك هتقابل شخص تكون بتشوفه للمرة الأولي و محتاج تكشف الستار عن تفاصيل حياتك و معلومات شخصية عنك ،عن أفكارك عن مشاعرك , و أحيانا عن أدق أسرارك .
غالبا بتكون مش متوقع إيه المطلوب منك و إيه اللي المفروض تتوقعه ..عايزين نطمنك إننا فاهمين جدا شعورك و بنقولك إتطمن إحنا معاك .
في المقال ده هنوفر بعض المعلومات اللي هتساعدك تفهم طبيعة الجلسة الأولي و تتحضر أثناء زيارتك الأولي لعيادة المختص النفسي ..يلا بينا.
1- حقيقة الجلسة الأولي
أحيانا بنبص للجلسة الأولي مع المعالج علي إنها ليفل الوحش أو صندوق بندورا ,و كأننا رايحين نقابل كل مخاوفنا و نفتح كل الابواب المغلقة مرة واحدة و الحقيقة إن دي فكرة مش حقيقية .. غالبا بتبقي الجلسة الأولي هي اللي بتتعرف فيها علي المعالج بتاعك و بيجمع فيها بيانات عنك و شوية أسئلة بسيطة عن حالتك و إحتياجك و توقعاتك من العلاج .
2– إتطمن
بنقدر نطمن نفسنا لما نعرف إيه اللي مخوفنا بالظبط و نبتدي نواجهه , ساعات شعورنا بالخوف ده بيكون مبني علي أفكار مش حقيقية عن العلاج النفسي ,زي فكرة (إن المعالج ممكن يحكم عليا ), أو (إن مشكلتي مش محتاجة علاج )ممكن تتفاجئ إن كتير من أفكارك مجردأفكار مغلوطة عن العلاج النفسي .
3- براحتك
من الحاجات المبهجة إن المساعدة النفسية متاحة دلوقتي بدرجة أكبر و أكثر تنوعا , فممكن تختار بين العلاج الأونلاين أو في عيادة نفسية , و طبعا تقدر تختار بين المعالجين بإختلاف تخصصاتهم .
4- إفتكر دايما إن
- -جلسات العلاج النفسي بتتم في بيئة علاجية آمنة خالية من الشروط, الأحكام و المقارنات .
- جلسات العلاج النفسي بتتم في أجواء شديدة السرية و الخصوصية .
- المعالج النفسي مش حكم متسلط , هو موجود في الأول و الآخر عشان يساعدك غالبا بيكون مدرك صعوبة الجلسة الأولي، و همه يساعدك علي تخطي أي حرج .
- الثقة القبول , الإحترام و الإنصات التام هم حجر الأساس في العلاقة العلاجية .
5- حدد أهدافك / وإنزل بسقف التوقعات
- الشفافية :
كل ما كنت أكثر وضوحا و صدقا مع نفسك و بالتالي مع المعالج النفسي الخاص بك ، هتكون أقرب من الحلول و هتدي المعالج فرصة أكبر أنه يساعدك . - دون في نقاط (مفيد جدا إنك تكتب )
-سبب طلبك للمساعدة من الأصل
– مخاوفك و المشاكل اللي بتؤرق توافقك النفسي
– إحتياجاتك و توقعاتك من العلاج النفسي - قلل توقعاتك
مفيد أيضا إنك تقلل توقعاتك من الجلسة الأولي زي ما ذكرنا قبل كدة عشان تمنع تسلل الإحباط إلي نفسك .
6- الأعراض الجسمية قبل الجلسة
ما تقلقش لو حسيت بأعراض جسمانية قبل الجلسة زي خوف غير مبرر , تسارع نبضات قلبك , إضطرابات في المعدة . تعرق زايد ,أو أي أعراض تانية…
لو حسيت بده قبل الجلسة تقدر تطبق تدريبات التنفس و الإنغماس بحواسك في حاجة زي الأشغال اليدوية مثلا لتقليل التوتر ,و ما تتردددش لحظة إنك تشارك الأعراض دي مع المعالج النفسي في أول زيارة ليك.
6– بعد الجلسة ..ماتقلقش لو حسيت بالإجهاد البدني
جلسة العلاج النفسي وارد تكون مليانة بالشحنات العاطفية مكثفة، فممكن تلاقي نفسك بعد جلسة العلاج الأولي عندك رغبة في البكاء أو حزينً أو غضبان أو حتي مش قادر تتلايم علي مشاعرك و تعرف إنت فعلا حاسس بإيه .
الخليط ده من المشاعر ممكن يوصلك لشعور بالإرهاق الجسدي بعد الجلسة .
إتطمن ده شئ طبيعي ووارد بياخد وقته و ممكن تكون المشاعر و الأفكار اللي وردت بخاطرك دي أحسن مادة تبدأ بيها شغلك في الجلسة اللي بعدها .
الآن بعد ما تعرفت علي أهم 7 نصائح في جلستك الأولي علي طريق العلاج النفسي ، نتمنى تتغلب علي مخاوفك و تشجع نفسك لبداية جديدة مليانة أمل و حياة و تقدر تستعد لجلستك العلاجية الأولي بشكل أكثر راحة اطمئنان.
وللمزيد من المعلومات التي تخص صحتكم النفسية تابعوا مقالاتنا علي موقع شيزلونج.
إعداد و كتابة : إيناس طه البداوي
استشاري التربية والصحة النفسية
المصادر
https://www.psychotherapynetworker.org/blog/details/1755/how-i-start-my-first-session
https://www.mind.org.uk/information-support/drugs-and-treatments/talking-therapy-and-counselling/what-happens-in-therapy/
https://www.apa.org/topics/psychotherapy/understanding
https://www.goodtherapy.org/blog/faq/what-will-happen-in-my-first-therapy-session
https://www.goodtherapy.org/blog/9-ways-to-make-your-psychotherapy-sessions-more-effective-0705154
