الموسيقى.. أنغام صحية

عام
فريق شيزلونج
كتبت بواسطة فريق شيزلونج

“لو لم أكن فيزيائيًا، لأصبحت موسيقيًا، أنا أفكر عادةً بالموسيقى، أنا أعيش أحلام يقظتي في الموسيقى، أري حياتي بمصطلحات الموسيقى، إنني أحصل على المتعة الأكبر في حياتي من الموسيقى.” ألبرت إينشتاين.

 

من قايمة الأغاني المفضلة ليك، أنا أقدر أعرف عنك حاجات كتير، عن طباعك، تفضيلاتك، ذوقك العام، مستواك الثقافي، أقدر أعرف شوية كمان عن حالتك الصحية الجسدية والنفسية، ده مش هايكون تنجيم وتوقعات، ده هايكون وفقًا لدراسات علمية في أكبر جامعات العالم، اللي بتوضح فوايد الموسيقى لعقلنا وروحنا وجسمنا، مش هانقدر هنا نذكرها كلها، فهنذكر شوية منها.

 

 

  • الموسيقى بتخلينا نشوف العالم أجمل

 

دراسة  سنة 2011  قام خلالها الباحثين بعرض مجموعة من الصور على أشخاص أثناء تشغيل مقطوعات موسيقية، الصور اللي بيعرضوها عليهم كانت صور لوجوه أشخاص مبهمة بعض الشئ، وكان الباحثين بيطلبوا من الأشخاص اللي بيسمعوا الموسيقى دول يحددوا هل الوجوه اللي في الصور مبهجة مبتسمة، ولا حزينة مكشرة، والنتيجة كانت إن الأشخاص اللي كانوا بيسمعوا موسيقى سعيدة وقت مشاهدتهم للصور كانوا بيشوفوا الصور مبهجة مبتسمة والعكس صحيح، وبالتالي توصل العلماء في الدراسة دي إلى إن الموسيقى بتؤثر على رؤيتنا للحياة والعالم.

 

 

  • الموسيقى بتقلل إحساسنا بالإجهاد

 

اتنين من العلماء في Imperial Collage London حبوا يختبروا مدى تأثير حضور حفلة موسيقية على الغدد الصماء وتنظيم الضغط، فأخدوا 117 متطوع من المهووسين بالموسيقى بس مش بيحضروا حفلات، وخلوهم يحضروا حفلتين  للملحن Eric Whitacre، وأجرى الباحثان للمتطوعين تحليل للهرمونات عن طريق عينة من اللعاب قبل الحفل، وبعدين في الاستراحة بعد ساعة من بداية الحفلة خدوا عينات تانية، وبالمقارنة بين النتيجتين، وجد الفريق إن مستويات هرمونات القلق والتوتر زي الكورتيزول والكورتيزون قلت خلال الحفلتين، وتقليل الهرمونات دي  مفيد جدًا لإن التعرض ليها لفترات طويلة بيسبب زيادة خطر الإصابة بأمراض القلب والسكري والعجز الجنسي، وبغض النظر عن الذوق الموسيقي أو الخلفية الموسيقية للمتطوعين، فالنتايج كانت متشابهة جدًا عند جميع المتطوعين.

  • الموسيقى بتحسن مزاجنا

دراسة نُشرت سنة 2010 وجد فيها الباحثين إن الموسيقى بتأثر على مناطق معينة من المخ، فمثلًا بتزود نشاط منطقة اسمها  (caudate nucleus) لما بيتوقع الإنسان إن الجزء الجاي من الموسيقى هايأثر عليه لدرجة كبيرة، و منطقة( Nucleus accumbens)بتتأثر بالاستجابة العاطفية للموسيقى، وعلشان ماقعدش أعد  في مناطق في المخ أسماءها صعبة، فالملخص إن ارتفاع نشاط المناطق دي من الدماغ بيدُل على إفراز أكبر للدوبامين اللي هو ناقل عصبي له تأثير إيجابي على مزاج الإنسان وإسعاده، فنقدر نقول إن الموسيقى بتأثر على دماغنا بشكل كبير، وبتتحكم في مزاجنا للأفضل.

 

  • الموسيقي بتقلل من إحساسنا بالألم

 

22 دراسة توصلت لإن الاستماع إلى الموسيقى في المستشفيات بيساعد في تخفيض مستويات هرمون الكورتيزول، منها دراسة تمت على مرضى خاضعين لعملية جراحية لاستبدال المفصل، ووجدت الدراسة دي  إن استماع المرضي الخاضعين للعملية تحت تأثير مخدر موضعي للموسيقى بيقلل من الإجهاد والضغط بتقليل إفراز الكورتيزول.

 

  • الموسيقى ممكن تعالج الصرع

 

دراسة تمت في المركز الطبي بإيليونز لتجربة أثر مقطوعة سوناتا لموزارت على 29 مريض بالصرع، واستمعوا للمقطوعة دي خلال التجربة لمدة 5 دقائق، والنتايج كانت تحسن حالة 79% من المرضى وتقليل نشاط أدمغتهم الزايد اللي كاد يعرضهم للنوبات الصرعية، دراسة كمان في قسم طب الأعصاب المُتعلق بالأطفال بمستشفي رويال للأطفال في أدنبرة بتجربة على الأطفال المُصابين بالصرع للتأكد من الفرضية دي  وكانت النتيجة إيجابية، فمتوسط النبضات العصبية الصرعية قبل الاستماع للموسيقى 3.23 لكل 10 ثواني ولكن أثناء الاستماع قلت لحد 2.85.

 

  • الموسيقى بتحسن مهارتنا اللغوية

 

دراستين في جامعة ستانفورد توصلوا لإن الموسيقيين عندهم القدرة على التعامل مع اللغات بشكل أفضل من غيرهم، كمان عندهم مهارات لغوية كبيرة ، يعنني مثلًا بيقدروا يميزوا الفرق بين المقاطع اللفظية أحسن بكتير من غيرهم، وأظهرت كمان الدراسات إن الموسيقيين بيتمتعوا بذاكرة لفظية أحسن بكثير، ففي دراسة قام بيها عالم النفس ستيفن بونجارد وعالمان تانيين من قسم الموسيقى بجامعة أولدينبرج في ألمانيا، على  مجموعة من الطلاب كان فيها الطلاب اللي بياخدوا حصص إضافية في العزف أفضل في الذاكرة اللفظية من زمايلهم اللي بياخدوا حصص إضافية في العلوم.

 

“اعطيني خمس دقايق بس تسمّع ع الموسيقى” بتقول فيروز في أغنية أنا فزعانة، والحقيقة ممكن نستخدم الجملة الغنائية دي كنصيحة نقولها كلنا لبعضنا علشان تبقى صحتنا ونفسيتنا أفضل لما نتسمّع ع الموسيقى.

 

المصادر:

https://www.sciencealert.com/rocking-out-to-live-music-linked-to-reduced-levels-of-stress-hormone

https://news.stanford.edu/news/2005/november16/music-111605.html

 

https://www.sciencedirect.com/book/9780123814609/the-psychology-of-music

https://sydney.edu.au/courses/units-of-study/2018/musc/musc2645.html

https://www.healthline.com/health-news/mental-listening-to-music-lifts-or-reinforces-mood-051713#5

https://www.apa.org/research/action/speaking-of-psychology/music-health.aspx

 

أترك تعليق