الاكتئاب الهياجي.. الاكتئاب الهياجي.. تكرار غير مقصود!

عام
فريق شيزلونج
كتبت بواسطة فريق شيزلونج

سنة 2016 مخرج أمريكي اسمه Zach Whittaker  أخرج فيلم مدته 13 دقيقة عن بنت بتقتل أبوها القعيد لإنها مش قادرة تسمع المزيد من أسف أبوها عن تقصيره في حقها وهي صغيرة! وبعدها بتخرج البنت من الغرفة مش مهتمة غير بشعرها اللي بتعدله أكتر من مرة لحد تتر النهاية، وبما إنك ما تعرفش اسم الفيلم  -وانت طبعًا مش هاتعرفه لإني لسه ما قولتوش- بالتأكيد هاتقول عن البنت دي سفاحة متوحشة، لكن ممكن تغير وجهة نظرك لما تعرف إن اسم الفيلم ” psychomotor agitation”، واللي بيعني “الهياج النفسي” اللي مصابة بيه بطلة الفيلم.

الهياج النفسي هو نوع من الاضطراب المزاجي ممكن ياخد أكتر من شكل، بعضها مش خطر اوي، والبعض الآخر شديد الخطورة والحدة، والاضطراب المزاجي ده ليه أكتر من سبب أهمهم وأخطرهم الاكتئاب الهياجي، وده اللي هانتكلم عنه في المقالة دي.

دراسة أجراها فريق بحثي في الجامعة الأوروبية لعلم الأدوية النفسية والعصبية على 2811 شخص مكتئب، كانت أهم نتايجها إن 40% من المكتئبين اللي حاولوا ينتحروا مصابين بالإكتئاب الهياجي ودي نسبة مرعبة! فضروري نعرف ايه هو الاكتئاب الهياجي وايه أعراضه اللي لو لاحظناها على نفسنا أو حد قريب مننا فهو معرض بشكل ما إنه يحاول ينتحر أو على أقل تقدير يأذي نفسه.

مبدئيا الاكتئاب الهياجي depressive agitation واحد من أكتر أنواع الاكتئاب حدة، بيعاني خلاله المكتئب من العصبية والغضب والقلق الزايد اللي بيخليه يقوم بحركات وتصرفات متكررة  بدون لازمة أو قصد، وده بيخليه يحس أنه عاجز عن السيطرة على نفسه وبالتالي بيحس بالمشاعر دي:

-الغضب الشديد

-سرعة الانفعال من حاجات بسيطة

-قلق متزايد

-أفكار متسارعة جدًا

-حديث داخلي مش مترابط

– عدم مقدرته إنه يقعد ثابت

– الفشل في التخفيف من توتره

– اليأس من إنه يلاقي وضع مريح

– الاندفاع الشديد في تصرفاته

– النوم بصعوبة جدًا

 

العقل الباطن علشان يخفف من حدة توتره بيترجم المشاعر دي لمجموعة من التصرفات زي:

  • فرك الايدين
  • الضغط على الأصابع
  • الكلام بسرعة جدًا
  • نوبات صريخ وشكوى
  • تحريك الحاجات حوليهم من غير سبب
  • خلع الهدوم ولبسها تاني
  • الدخول والخروج من المكان من غير هدف
  • البكاء فجأة على أسباب تافهة
  • قفل وفتح الباب من غير داعي

 

لكن السؤال المنطقي هنا.. ما فيه ناس كتير حواليا بتعمل كده، مش شرط يعني يكون مصاب بالاكتئاب الهياجي علشان بيفتح الباب ويرجع يقفله تاني! وده حقيقي جدًا وعلشان نفرق السلوك العابر عن السلوك الهياجي هانميزه ب3 حاجات:

– الحركات سريعة أو متكررة

– الحركات ملهاش أي غرض

– الحركات مش مقصودة

 

وفي مرحلة متقدمة شوية بتوصل الأعراض إن الشخص يبدأ يأذي نفسه من غير ما يدرك إنه بيعمل ده بداية من :

  • عض الشفايف
  • عض خدهم من الداخل
  • سحب الجلد حول الأضافر
  • نتف شعرهم

وصولًا للانتحار أو تعريض غيرهم للخطر نتيجة سلوكهم المندفع او العدواني.

دكتور جاي جودوينGuy Goodwin، رئيس قسم الطب النفسي في جامعة أوكسفورد، بيقول إن العلماء محتاجين المزيد من الأبحاث عن الاكتئاب الهياجي علشان نوصل لأفضل الممارسات تجاهه، وبالتالي فاحنا كغير أطباء ملاحظتنا للأعراض اللي قولناها مش كفاية أبدًا علشان نقرر الإصابة بالمرض، هي كفاية تخلينا نشك في الاحتمال ده فنطلب المساعدة الطبية، وده لإن تشخيص المرض النفسي مش في سهولة الاختبارات اللي على مواقع التواصل الاجتماعي بتحدد مشكلتك النفسية بعد ما تجاوب على كام سؤال، لإن أعراض الأمراض النفسية بتتداخل مع بعضها، والطبيب النفسي بس هو اللي هايقدر يشخص المرض من خلال ملاحظة سلوكياتك ومزاجك، وممكن يطلب منك فحص دم لاستبعاد الأسباب التانية المحتملة للأعراض دي، زي نقص الفيتامينات أو الاختلالات الهرمونية.

في الحضارات القديمة كانوا بيعتقدوا إن الشخص المصاب بأعراض الاكتئاب الهياجي -طبعًا مكنش معروف بمسماه الحالي- إنه مُسيطر عليه من قبل قوى الشر والشيطان أو إنه واقع تحت تأثير السحر،  وفي القرن ال18 كان بيتم علاج الهياج من خلال عزل المريض وتقييده لمنع حركته بهدف ضبط نفسه، لكن العلم حاليًا توصل لطرق علاج أسهل وكمان حددالأسباب الحقيقة للمرض وهي:

  • التعرض لأحداث مؤلمة
  • الإجهاد على المدى الطويل
  • اختلال الهرمونات
  • قصور الغدة الدرقية
  • اضطراب ثنائي القطب
  • اضطرابات القلق
  • أثر جانبي لبعض أدوية الاكتئاب والأدوية المضادة للذهان
  • إدمان الكحول والمخدرات

 

معرفة الطبيب السبب الحقيقي للمرض بيسهل عليه اختيار الطريقة الأمثل للعلاج اللي بيكون إما من خلال التأهيل النفسي، أو الأدوية، أو الدمج بين الأدوية والعلاج النفسي، وكل ما بدأ العلاج بدري كل ما ده كان في مصلحة المريض لإنه بيعجل من شفائه وبيقلل من احتمالية تعريضنفسه وغيره للخطر، أو وصوله لمرحلة الانتحار، علشان كده متابعة أي تغيرات سلوكية بتحصلك، ممكن تكون سبب في إنقاذ حياتك، وحياة ناس تانيين، فما تستهونش لو لاقيت نفسك بتعيد أفعالك لإن مش دايمًا في الإعادة إفادة.

كتبته لشيزلونج: إيمان السيد

كاتبة صحفية ومترجمة مهتمة بالشأن النفسي

 

المصادر:

 

http://www.evidence-based-psychiatric-care.org/wp-content/uploads/2017/06/01_psychomotor_agitation.pdf

https://www.reuters.com/article/us-health-depression-suicide-signs/mixed-depression-agitation-may-signal-suicide-risk-idUSKCN0R31S320150903

http://www.mayoclinic.com/health/electroconvulsive-therapy/MY00129/DSECTION=risks

http://www.evidence-based-psychiatric-care.org/wp-content/uploads/2017/06/01_psychomotor_agitation.pdf

 

https://www.bbc.com/news/health-34101608

 

https://www.medicalnewstoday.com/articles/320370.php

 

 

—————————————————————————————————

إذا كنت تعاني من اضطراب نفسي ولا تجد من ينصت لك أو يقدم لك يد العون، فلا تتردد في التواصل مع فريق أطباء شيزلونج ليكون رفيقك في رحلة التعافي النفسي.

 

 

أترك تعليق