من حوالي 25 سنة غنت الطفلة الواعدة “شيري عادل” أغنية حفظها معظم أطفال جيل الثمانينيات والتسعينيات، بتشجع فيها أبناء جيلها يكون عندهم هواية تشغل أوقات فراغهم ويستفيدوا منها، وكنت أنا واحدة من أطفال الجيل ده واتأثرت بالأغنية اللي لسه حافظة كلماتها ” أنا لما احب اتسلى ما احبش اقزقز لب، أنا عندي أقرا مجلة، أو أرسم زي ما احب، مهما تكون الأسباب مش ممكن أبقى وحيدة أنا أصلي مصاحبة كتاب، وحبيبتي رياضة مفيدة”.

الكلمات بسيطة تناسب الفئة العمرية اللي موجهة لها، لكن قدرت تخليني أدور على هواية أعملها في وقت فراغي زي شيري، لكن كل ما كانت السنين بتعدي وبكبر، كان وقت فراغي بيقل وانشغالي بيزيد، وما بلاقيش وقت أمارس أي هواية من اللي بحبها، وبسبب الشغل، الارتباط، الالتزامات الاجتماعية، بقيت شايفة إن معنديش وقت أعمل حاجة غيرهم، لحد ما اكتشفت إن ده مش حقيقي، أنا اللي واهمة نفسي بكده، مش أنا لوحدي، ناس كتير اوي غيري.

“أنا مشغول جدًا، الجملة دي بقت مصدر فخر لصاحبها، علامة على الأهمية والنجاح، احنا بذلنا مجهود كبير علشان نقنع نفسنا واللي حولينا إننا مشغولين جدًا، معندناش وقت! ما تصدقش الكلام ده، كل واحد مننا عنده وقت يمارس هواية أو اتنين”  ده كلام الكاتبة الأميركية بريجيد شولت، مؤلفة كتاب “تشعر بأنك مرهق: عليك بالعمل والحب واللعب، عندما لا يكون لديك وقت”، ولو حاسس كلامها مش حقيقي وإنك فعلًا مشغول جدًا، فكر في الوقت اللي بتضيعه وانت ماسك موبايلك بتقلب في مواقع زي فيسبوك وانستجرام، أو الوقت اللي بتقضيه على الكنبة قدام التليفزيون بتتفرج على فيلم إنت شوفته تقريبًا 10 مرات ومش مركز فيه، أو بتلعب لعبة أونلاين بالساعات، فخلينا نتفق إن كلنا عندنا الوقت، بس هل كلنا عندنا هواية؟

المفترض إن كل واحد مننا عنده هواية أو شغف، اهتمام بشئ معين، لكن مش كلنا بنشوف موضوع الهوايات والاهتمامات ده بنفس الطريقة، يعني فيه ناس مننا بتعتقد إنها مولودة عندها اهتمام بشكل فطري بحاجات معينة، ودول بيتأثروا فعلًا باعتقادهم ده وبيكونوا مش مهتمين بإنهم يكتسبوا أي هوايات جديدة مش في نطاق اهتماماتهم، وناس تانية بتعتقد إن الاهتمامات بتكتسب مع الوقت وممكن تتغير وتتطور مع مرور الوقت، ودول فعلًا عندهم القدرة على إنهم يمارسوا هوايات جديدة مختلفة عن اهتماماتهم، وده وفقًا لدراسة في جامعة سنغافورة الوطنية وجامعة ستانفورد.

دراسات أكاديمية تانية كتير كان موضوعها الأساسي الهوايات، الدراسات دي نتايجها وضحت إن الهواية مش مجرد حاجة نعملها لما “نحب نتسلى” وبتوضح الفوايد اللي هاتعود على صحتك النفسية والجسدية وحياتك العملية والاجتماعية لو  مارست الهوايات

• الهوايات هتحميك من الاكتئاب وهتحسن صحتك
  عالمة النفس سارة بريسمان وفريق من الباحثين توصلوا إلى إن الاستمتاع بهواية معينة بتخلينا نحس بالتحسن نفسيًا وجسديًا، وبتخلينا أقل عرضة للاكتئاب، وبتنظم هرمون الكورتيزول في الجسم، وتخفض من ضغط الدم، وبتخلي كتلة الجسم والوزن بحالة أفضل.

• الهوايات هتساعدك تكون ناجح أكتر
  دراسة على 40 من العلماء قام بيها Robert Root-Bernstein عالم الفيسيولوجي توصلت إلى إن اللي كانوا بيمارسوا هوايات بتضمن تخيل فني زي الرسم والموسيقى، كانوا أنجح من غيرهم، وقدروا يحققوا نجاحات علمية أكبر، وده بيتفق مع نتايج  دراسة اتنشرت في مجلة علم النفس المهني والتنظيمي بتأكد إن ممارسة الهوايات ممكن تزود انتاجية الشخص في عمله.

• الهوايات هتنظم وقتك
  قانون باركنسون بيقول  “يتم توسيع العمل لملء الوقت المتاح لإنجازه”، بمعنى أوضح الشغل هياخد منك وقت أطول كل ما طال الوقت المتاح للشغل ده، يعني لو عندك شغل أو مذاكرة ومعندكش خطط غيرهم الليلة دي، هاتقعد لحد ما تنام تشتغل او تذاكر، لكن لو كنت مخطط تروح بعد ما تخلص التمرين في النادي نفس الكم من الشغل أو المذاكرة هاتخلصه في وقت أقل بكتير، معنى كده إن الهوايات بتنظم لنا وقتنا وبتزود لنا كفاءتنا.

• الهوايات هتساعدك تحس بمتعة الحياة
  علماء النفس الإيجابي ، وده فرع جديد نسبيا من علم النفس بيدرس ايه ممكن يخلي الحياة جديرة بالاهتمام ، توصلوا  لإن الهوايات بتجلب المتعة لحياة اللي بيمارسوها، وبتساعدهم على الاسترخاء وتحسين حالتهم المزاجية، وممكن تكون سبب كبير في مساعدتهم يحسوا بالفرح عمومًا في حياتهم.

• الهوايات هاتقلل إحساسك بالتوتر والضغط
  علماء النفس الإيجابي كمان توصلوا إلى إن الهوايات بتخلينا نحس بالاكتفاء والرضا، وبتخلصنا من مشاعر التوتر والإحباط بسبب ضغوط الحياة والانخراط فيها بشكل يومي، وده لإن الهوايات دي بتخلينا نستخدم أفضل مهاراتنا وده بيخلينا راضيين عن نفسنا وبيقلل من مشاعر التوتر عندنا.

     – الهوايات هتحمي دماغك
T.F. Hughes الباحثة بجامعة بيتسبرج قامت مع فريق من الباحثين بدراسة توضح تأثير الهوايات على حياة الناس، ووجدوا إن ممارسة هواية لمدة ساعة أو أكتر كل يوم، ممكن يحمي من الخرف والشيخوخة في الكبر، دراسة تانية توصلت لإن الهوايات ممكن تساعد على الحياة لمدة أطول بصحة أفضل، وده بيتوافق مع دراسة تالتة توصلت إلى إن المرضى اللي  بيتم علاجهم جراحياً بسرطان الثدي ممارسة هواية ممكن يقيهم من الانتكاس.

–   الهوايات هتحمي قلبك
في إحدى الدراسات فحص الباحثون ازاي ممكن تأثر الهوايات على الشرايين التاجية اللي كانت في المراحل الأولى من الانسداد، ووجدوا إن ممارسة المريض لهواية له علاقة بتوسع الشرايين بسهولة أكبر ، والتخلص من الانسداد وتدفق الدم بشكل طبيعي  في القلب.

• الهوايات هاترهقك وهاتخليك تتعافى من إرهاقك
  ممارسة الهوايات بتخلينا نبذل مجهود ووقت فيها، ب وده بيسبب لنا إرهاق،  لكن إرهاق من النوع المفيد، اللي بيخلينا نتعافى ونتخلص من الضغوط اللي بيسببها الإرهاق والإجهاد الناتج من مشاكل الحياة والوظيفة، وبيساعدنا ننام بشكل أفضل.

• الهوايات هتساعدك تتخلص من عاداتك السيئة
  مقالة في Health24 بتقول إن ممارسة الهوايات ممكن تكون طريقتك للإقلاع عن التدخين، فبدل ما تمسك سيجارة اتجه لفرشة الرسم، او إبرة الكروشيه، علشان توجه اهتمامك بحاجة تانية غير التدخين، وتخليها مصدر سعادتك.

انت عندك وقت أكتر ما انت تعتقد، كل اللي انت محتاجه إنك تبدأ تمارس هواية ما، وهوايتك هاتنظم لك وقتك، وهاتحسن نفسيتك، وهاتقلل من ضغوطك، وده هاينعكس على كل جوانب حياتك، بس انت جرب وابدأ.

احجز جلسة مع معالج يمكنه مساعدتك فيما يتعلق بهذا الموضوع

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

( المراجعات)

عرض الصفحة الشخصية

إيمان السيد

كاتبة صحفية ومهتمة بالشأن النفسي

المصادر:

https://www.ncbi.nlm.nih.gov/pmc/articles/PMC4919481/

https://www.ncbi.nlm.nih.gov/pubmed/20660517

https://www.ncbi.nlm.nih.gov/pmc/articles/PMC1724835/

https://global.oup.com/ushe/product/a-primer-in-positive-psychology-9780195188332?cc=eg&lang=en&

. https://www.ncbi.nlm.nih.gov/pubmed/16551187

https://www.psychologytoday.com/us/blog/debunking-myths-the-mind/201706/how-hobbies-impact-your-head-and-your-heart

https://www.psychologytoday.com/us/blog/happy-trails/201509/six-reasons-get-hobby

https://ajp.psychiatryonline.org/doi/abs/10.1176/ajp.99.1.122