د. محمود الجندي يكتب: اضطراب الشخصية الحدية وعدم احتمال الوحدة
د. محمود الجندي يكتب: اضطراب الشخصية الحدية وعدم احتمال الوحدة
الوحدة ممكن تضايق أي حد لكن بالنسبة للشخصية الحدية فالوحدة مرعبة ومؤلمة لأقصى درجة
عشان نفهم سر معاناة البوردرلاين مع الوحدة محتاجين نفهم الأول أهمية العلاقات لنمو ونجاة الطفل في الحياة
الطفل في البداية مشاعره بتكون مادة خام
مش متحددة ومش متصنفة وتقريبا بيعبر عنها بنفس الشكل في كل الازمات سواء عاوز ياكل او ينام سواء خايف أو غضبان أو مش مرتاح كل الاحاسيس واحدة وبالتالي الاستجابة لأي ضغط بتكون بنفس الشدة مهما اختلفت درجة الضغوطات والمشاعر لو فضلت بالشكل ده هتبقى مهلكة ومرهقة
دور الام انها اولا تصنف للطفل احساسه وده عن طريق انها تعكسله تعبيرات وشه بتعبيرات وشها وبالتالي الطفل بيشوف نفسه فيها ويدرك معنى اللي هو حاسس بيه ويسجل نسخه من ده عنده كجزء من صورته عن نفسه
ولو ده محصلش المشاعر اللي مش هتتفهم هتعتبر تهديد للنفس لأن الطفل معندوش مرجعية يقدر يفرق بيها بين شعور بسيط بالانزعاج وبين شعور مرعب بالهلاك المحقق
ومعروف ان البوردرلاين عندهم مشكلة في احتواء مشاعرهم وتصنيفها وبالتالي بتكون مؤلمة جدا ليهم وشديدة الا لو تواجد حد جنبهم يتولى مهمة تصنيف مشاعرهم واحتوائها
البوردلاين مشكلتهم مش في الوحدة اد ما مشكلتهم
انهم يبقو لوحدهم مع مشاعرهم
ثانيا تأثر الأم بمشاعر الطفل بيحسس الطفل انه موجود لأن له تأثير على الأخر ودي الطريقة الأولى االي بيدرك بيها الطفل انه حقيقي من خلال رد فعل اللي حوليه ليه لحد ما تتكون جوا ذاكرة الطفل صورة عن تأثيره عاللي حوليه بحيث يستخدمها لتعزيز احساسه بذاته حتى لو لوحده
وبالتالي بدون وجود أخر يعمل فيدباك للطفل ويكون رد فعل لفعله الطفل مش هيحس بوجوده مش هيحس انه حقيقي وعليه لما يكبر هتبقى الوسيلة الوحيدة اللي يحس بيها بوجوده انه يلاقي حد يأثر فيه ويأثر عليه وينتزع منه رد الفعل سواء كان ايجابي او سلبي سواء حب شديد او كره شديد
البوردلاين محتاجين وجود أخر عشان يبقو هم نفسهم موجودين
ثالثا في مهارة بيتعلمها الطفل عند سن سنة لسنة ونص اسمها دوام الأشياء
وده لأن الطفل قبل كدة بيعتبر ان الأشياء موجودة فقط طالما هي قدام عنيه ولو اتشالت من قدامه فبيعتبرها اختفت من الوجود
يعني لو الأم سابته وراحت اوضة تانية بينهار ويعيط لأنه فاكرها خلاص ما بقتش موجودة
كمان الطفل معندوش وسيلة يقدر يعرف بيها اذا كانت الام فاكراه او لا وايه مشاعرها تجاهه الا من خلال التعامل المباشر لكن بمجرد اختفائها هي مبقتش موجودة بالنسبة له وهو مش موجود بالنسبة لها
وده لحد ما يتعلم مبدأ دوام الأشياء من خلال تكرار اختفاء الأشياء وعودتها
ومعروف ان البوردرلاين عندهم مشكلة في الحتة دي وعشان كدة عاوزين اللي بيحبهم يفضل موجود قدامهم طول الوقت ولو بعيد يبعتو كل دقيقة رسالة وكل ساعة مكالمة وده لأن الطريقة الوحيدة اللي ممكن يتأكدو بيها من ان الاخر بيفكر فيهم وبيحبهم هي من خلال التواصل المباشر
غير كدة يبقى انت بعدت عنهم وهجرتهم
وعشان البوردلاين يقدرو يحافظو على وجود الأخر ممكن يلجأو للتهديد بالانتحار عشان الاخر يحس بالذنب ويكمل في العلاقة
وممكن رغبتهم الشديدة في وجود أخر تخليهم يرتبطو بأي حد في أي وقت بأي طريقة وبأي تمن ومهما كانت التنازلات
يتبع ..
