دليلك السريع لفهم أنماط الشخصيات (اضطرابات الشخصية)

ساعات كتير بتتعرّف على شخصيات بتثير فضولك. بتستغرب ليه الشخص الفلاني بيتصرف بالطريقة دي؟ ليه الشخص ده بيتكلم عن نفسه كتير وعن إنجازاته؟ ليه الشخص ده علطول بيقول كلام حلو للناس كلها وبيبقى عايز كل الناس تحبه؟ ليه الشخص ده علطول بيتكلم عن مشاكله بطريقة تثير التعاطف؟

إنت نفسك ساعات بتستغرب ليه شخصيات معينة بتعجبك أكتر من غيرها.

الحقيقة إنه أنماط الشخصيات المختلفة بتلعب دور كبير في تصرفاتهم مع الآخرين وكمان ليها دور كبير في انجذاب الناس لبعضها وشكل علاقاتهم هيكون عامل إزاي لو دخلوا في علاقات حقيقة مع بعض طويلة الأمد زي علاقات العمل أو الزواج أو حتى الارتباط والصداقة.

من المهم جدًا إنك تتعرف أكتر على أنماط الشخصيات للأسباب التالية:

1-هتقدر تفهم نفسك أكتر، هتتعرف على الصفات المسيطرة على شخصيتك وهتعرف سبب تصرفات كتير بتعملها سواء حلوة أو مزعجة وكمان ممكن تقدر تساعد نفسك لو عندك مشكلة أو محتاج علاج.

2-هتقدر تضع الناس في موضعها الصحيح. مين الشخصيات إللي هتكون مرهقة ليك ومش هتقدر تتعامل معاها بسلاسة وبالتالي يمكن تجنبهم أو تحديد شكل علاقتك بيهم أو حتى إنهاء العلاقة لو استدعى الأمر.

3-هتقدر تعرف نقاط القوة ونقاط الضعف عند ناس كتير وده هيساعدك جدًا في علاقاتك وفي شغلك كمان. فيه وظائف معينة زي العلاقات العامة والمبيعات معرفتك لنمط الشخصية بيساعدك بشكل كبير إنت مش ممكن تتخيله في إنك تكون ناجح في شغلك وتحقق إنجازات كمان.

4-تواصلك مع الناس هيكون أكثر سلاسة. مع الوقت هتبقى أكثر خبرة وتقدر تتنبأ بتصرفات الآخرين والمتوقع منهم. ومع شخصيات كتير هتلاقي نفسك بقيت أكثر تفهمًا وحتى الحاجات إللي كانت بتضايقك جدًا هتلاقي نفسك متقبلها لإنك هتفهم إنه التصرفات دي جزء من شخصيتهم وإنهم مش متعمدين يضايقوك.

إزاي تفهم الموضوع أكتر؟

علم النفس بيصنف أنماط الشخصية لـ 16 نمط متقسمين كالتالي:

الفئة أ (فئة الشخصيات الغريبة)

والفئة دي تحتها: الشخصية الشكاكة – الشخصية الإنعزالية – الشخصية الفصامية

الفئة ب (فئة الشخصيات الدرامية)

الشخصية المعادية للمجتمع- الشخصية التمثيلية-الشخصية الحدية-الشخصية النرجسية

فئة ت (فئة الشخصيات الخائفة)

الشخصية الإجتنابية – الشخصية الإعتمادية – الشخصية الوسواسية

فئة الشخصيات غير المحددة

الشخصية الاكتئابية – الشخصية ذات الميول السلبية العدوانية – الشخصية السادية -الشخصية المازوخية – الشخصية السيكوباتية.

إللي بيحصل عادة إنه الشخص بتكون شخصيته مزيج من عدة أنماط مع بعض وساعات بتكون الأنماط من فئة واحدة أو أكتر. لما الشخص بيكون نمط واحد مسيطر عليه، بنلاقي إنه أغلب خصائص النمط ده بتظهر عنده ومن هنا بتبدأ المشاكل تظهر في شخصيته وممكن الخصائص دي تزيد حدتها لدرجة إنها تبدأ تؤثر على حياته وحياة المحيطين بيه سلبًا وهنا بنسميه اضطراب وبيحتاج متابعة مع متخصص نفسى.

يعني مثًلا الشخص صاحب الشخصية النرجسية بيبقى عنده اعتزاز شديد لآراؤه وبيكون معجب جدًا بشخصيته وصعب يعتذر لو أخطئ وبيحتاج يسمع علطول كلمات الإعجاب والإشادة.  فلو بدأ الشخص النرجسي يقلل من اللى حواليه في حياته ويحاول يقهرهم ويسيطر عليهم ويأذيهم علشان يحس بالسعادة، هنا بتبدأ المشكلة وبيتحول الشخص من مجرد شخص نرجسي لشخص مُصاب باضطراب الشخصية النرجسية.

تابعوا موقع شيزلونج علشان تعرفوا معلومات أكتر عن كل نمط من أنماط الشخصية بالتفصيل والاضطراب الخاص بيها.

لو عندك اى مشلكة ومحتاج مساعدة طبيب نفسى متخصص, تواصل مع اطباء شيزلونج بخصم 25 % على أول جلسة ..نساعدك بمنتهى السرية والخصوصية.

اجعل الحياة أفضل: انشر هذا المقال على