العلاقات

سنة أولى أمومة

ريم عوض
كتبت بواسطة ريم عوض

أول فرحة، أول إحساس بالحب الغير مشروط وأول تضحية بلا مقابل!

أول سنة أمومة هي أكتر سنة هتحسي فيها بمشاعر مختلفة جدا عن أي فترة تانية في حياتك. ولو مستنية طفلك الأول، ومشتاقة لأول لقاء حاولي تستعدي لأول مرة هتحسى فيها بمشاعر سلبية برضه ..ما تقلقيش الإحساس ده طبيعى جداً 🙂

حب من أول نظرة

هتحبي ابنك طبعاً، بس مش كل الأمهات بيحسوا بمشاعر قوية ناحية أولادهم أول ما يشوفوهم، ساعات الموضوع بياخد وقت خاصة لو الأم ولدت بعملية قيصرية، الألم اللي بيستمر فترة أطول من الولادة الطبيعية بيأثر على الحالة المزاجية وتقبلك للأمور. فما تحسيش أبدا بالذنب، فترة صغيرة قوى وهتخدي على ابنك وهتحبيه أكتر من نفسك!

اسأل مجرب؟!  لأ .. اسأل طبيب!

هتسمعي نصائح لا حصر لها من كل الناس، خاصة ستات العائلة الكبار. مع كل الاحترام والتقدير ليهم وإنهم أكيد عايزين يساعدوا ويفيدوا، بس حاولي تلتزمي بكلام الدكتور ولو حد اعترض على طريقتك في حاجة أكدي عليهم دايما إنك بتسمعي كلام الدكتور، أكيد هو مش مقضي عمره في مجاله عشان ندوّق الولد ملوخية في البيبيرونة! 😀

الرضاعة الطبيعية

في الأول مش هتكون الرضاعة سهلة، هتخدي وقت على ما تحسي إنك اتعودتي عليها والألم قل. أهم حاجة تدوري على أوضاع الرضاعة الطبيعية الصحيحة ولو المشكلة استمرت استشيري أخصائية رضاعة طبيعية. ما تيأسيش .. لبن الأم أهم غذاء لطفلك.

القراءة شعار المرحلة

اقرئى في كل حاجة تخص الأطفال على مواقع موثوقة وعالمية، اشتركى في النشرة الأسبوعية على المواقع المهتمة بالأطفال؛ هيبعتلك كل أسبوع نشرة حسب عمر طفلك. ثقفى نفسك واتناقشي مع طبيب طفلك في أي حاجة محتاجة تتأكدي منها.

اكتئاب ما بعد الولادة

نسبة مش بسيطة من الأمهات بيجيلهم اكتئاب ما بعد الولادة (تابعى مقالات شيزلونج عن الاكتئاب)، لو حسيتي إن الأعراض دي عندك والمشكلة بتتطور ما تتردديش إنك تطلبي المساعدة من أطبائنا 

اهتمى بصحتك

كلى كويس وخدي الفيتامينات المكتوبة لكِ، اهتمامك بصحتك من اهتمامك بابنك. العبي رياضة حتى لو في البيت وبلاش تاكلي الحاجات اللي بيقال شعبيا إنها بتزود اللبن وطبعا بتزود الوزن! استشيري طبيب في نظام الأكل المناسب.

النوم

مش هضحك عليكِ، ممكن تنسيه فترة لحد ما نوم ابنك يتظبط. سواء هتدربي ابنك على النوم المتواصل أو هتستني لما ينمي المهارة دي لوحده، الصبر مفتاح الفرج 😀

فى سنة أولى أمومة هتعرفي قد إيه والدتك تعبت في تربيتك وهتغيري نظرتك لأمور كتير. استمتعي بكل لحظة، خديه في حضنك وصوريه كتير، قريب هيكبر واللحظات دي مش هتتكرر.


لاستشارة المعالج النفسى فى هذا الموضوع .. اذهب لموقع شيزلونج من هنا.

عن الكاتب

ريم عوض

ريم عوض

محررة من فريق شيزلونج

اترك تعليقك

error: المحتوي المدونة محمي بحقوق الحفظ ، من فضلك أتصل بنا