العلاقات

إيه هي الشخصية السيكوباتية؟

 

معظم الناس بتفكر فى الشخص المضطرب نفسياً على أنه قاتل يا مجنون يا إنسان مش طبيعى و بيتعرف بسهولة، لكن بعد دراسات كتير العلماء اكتشفوا إن ممكن المريض ده يكون صديق أو زميل أو زوجك أو مراتك أو جارك مش شرط يكون مرض نفسى بصورته التقليدية، لكن فى بعض الناس عندهم حاجة على سبيل المثال اسمها  “Personality Disorders” يعني “إضطرابات الشخصية.

و اللى أحياناً بتتطور لدرجة أعلى توصل للمرض النفسى بصورته المعروفة..

– طب هنستفيد ايه لما نعرف يعنى إيه الشخصية دى و صفاتها إيه و يعنى إيه إضطراب شخصية و أنواعها و هكذا..إيه الميزة إنى إفهم شخصية اللى قدامى سواء شخصية سوية أو مضطربة !!

هقولك ..

  •  انت عمرك فكرت إزاى تقدر تتعرف على الناس اللى قصادك من خلال كلامهم او أسلوبهم او شكلهم او لبسهم او أكلهم او حتى بيئتهم..
  • أيوا ليه برده أعمل ده!
  • لما تعرف سلوكيات الشخص اللى قصادك و تفهم تصرفاته إزاى و ليه بيعملها، هتعرف ساعتها إزاى هتتعامل معاه و التصرف الصح مع كل إنسان حسب شخصيته وبالتالى نجاحك فى حياتك و إنك تعيش بشكل تكون سعيد بيه و متصالح مع نفسك و مع اللى حواليك.
  • دى طبيعة الحياة ربنا خلقنا بشخصيات مختلفة عشان ما نبقاش نسخ من بعض، و فى الوقت ده لازم تعرف هتتعامل مع كل شخص ازاى من غير ما تبقى منافق او بياع كلام.

– موضوعنا النهاردة عن أصعب نوع من اضطرابات الشخصية:

نوع إسمه الشخصية السيكوباتية “Psychopath”

  • سمعت عنه قبل كده؟
  • لأ
  • طيب قبل ما نتكلم هنقول مثال بسيط كده و نرجع نكمل كلامنا..

 

-ﺟﻤﻴﻞ ﺭﺍﺗﺐ: ﺃﻧﺎ ﻋﻴﺸﺖ ﺣﻴـﺎﺗﻲ ﻛﻠﻬﺎ ﺗﺎﺟﺮ ﻛﻴﻮﻑ؛ ﺍﺑﺘﺪﻳﺘﻬﺎ ﺑﺎﻟﺸﺎﻱ ﻭﺍﻟﺒﻦ ﻭﺍﻟﺪﺧـﺎﻥ ﺍﻟﻜﻴﻒ ﺷﻬﻮﺓ، ﻭﺍﻟﺸﻬﻮﺓ ﻫﻲ إﻟﻠﻲ ﺑﺘﺸﺪ ﺍﻟﻘﺮﺵ ﻣﻦ ﺟﻴﻮﺏ ﺍﻟﻨﺎﺱ.
-ﻳﺤﻴﻰ ﺍﻟﻔﺨﺮﺍﻧﻲ: ﺇﻧﺖ ﺷﻴﻄﺎﻥ
-ﺟﻤﻴﻞ ﺭﺍﺗﺐ: ﺍﻟﻨـﺎﺱ هما إﻟﻠﻲ ﻣﻐﻔﻠﻴﻦ، ﻭﻓﻲ ﺷﻬﻮﺗﻬﻢ ﻏﺮﻗﺎﻧﻴﻦ، ﻭإﻟﻠﻲ ﻳﻘﻒ ﻉ ﺍﻟﺒـﺮ ﻣﺎ ﻳﻐﺮﻗﺶ..ﺇﺣﻨﺎ ﻣﺎﺿﺮﺑﻨﺎﺵ ﺣﺪ ﻋﻠﻰ ﺇﻳﺪﻩ..إﻟﻠﻲ ﺑﻴﺤﺒﻨـﺎ ﻫﻮ إﻟﻠﻲ ﺑﻴﺮﻣﻲ ﺭﻭﺣﻪ
ﻓﻲ ﺣﻀﻨﻨﺎ..ﺯﻣــﺎﻥ ﻛﻨﺖ بغش ﺍﻟﺸﺎﻱ ﺑﻨﺸـﺎﺭﺓ ﺧﺸﺐ ﻭأﺑﻴﻌﻪ ﻓﻲ ﺑﻮﺍﻛﻲ..ﺷﻜﻠﻬـﺎ ﺣﻠﻮ ﻣﻜﺘﻮﺏ ﻋﻠﻴﻬﺎ ﺷﺎﻱ “ﺃﺑﻮ ﺍﻷﺻـﻮﻝ”
ﻛﺴﺒﺖ ﻭﺍﻟﻤـﺎﺭﻛﺔ ﺑﻘﺎﻟﻬﺎ إﺳﻢ ﻭسُمعه
ﻭﻓﺠـﺄﺓ.. ﺍﻟﻨﺸـﺎﺭﺓ ﻏﻠﻴﺖ ﻭﺍﻟﻨﺠﺎﺭﻳﻦ ﺍﺗﻤﻠﻌﻨﻮﺍ، ﻋﺒﻴﻨـﺎ ﺍﻟﺸﺎﻱ ﻣﻦ ﻏﻴﺮ ﻧِﺸـﺎﺭﺓ..
ﺗﻌﺮﻑ ﺣﺼـﻞ ﺇﻳﻪ؟!!
ﺍﺗﺨﺮﺏ ﺑﻴﺘﻲ ﻭﻓَﻠِﺴﺖ..
ﺍﻟﺰﺑـﺎﻳﻦ ﻃﻔﺸﺖ ﻭﻗﺎﻟﻮﺍ ﻋﻠﻴـﺎ ﻏﺸﻴﺖ ﺍﻟﺸﺎﻱ..ﻣﺶ بقوﻟﻚ ﻣﻐﻔﻠﻴـﻦ!
-ﻳﺤﻴﻰ ﺍﻟﻔﺨﺮﺍﻧﻲ: هما ﻣﺶ ﻣﻐﻔﻠﻴﻦ، إﻟﻠﻲ ﺯﻳﻚ إﻟﻠﻲ ﻓﺴﺪﻭﺍ ﺫﻭﻗﻬﻢ ﻋﻮﺩﺗﻮﻫﻢ ﻋﻠﻰ ﺍﻟﻮِﺣِـﺶ ﻟﻐﺎﻳﺔ ﻣﺎ ﻧﺴﻴﻮﺍ ﻃﻌﻢ ﺍﻟﺤﻠﻮ!

حد فهم حاجة؟

ده مشهد من المشاهد العبقرية فى فيلم الكيف، و شخصية جميل راتب فى الفيلم هى التجسيد الأمثل فى الأفلام المصرية للشخصية “السيكوباتية” اللى إحنا عايزين نسلط الضوء عليها فى المقالة دى، فمن المشهد ده ظهر جزء كبير من شخصية السيكوباتى و صفاته فى شخص “سليم البهظ” تاجر الممنوعات ذائع الصيت.

لو هنيجى نتكلم على المستوى العالمى، فطبعاً أكبر شخصية سيكوباتية بالنسبة ليا بإمتياز قام بدورها “هيث ليدجر”  فى فيلم باتمان “The Dark Knight

وهى شخصية “الجوكر”

 

The Joker”

طب لو جينا نتكلم عن أشهر الصفات اللى ممكن نلاقيها فى الناس دى ..

تفتكروا ايه هى؟!

و هل فى أنواع من الشخصيات السيكوباتية؟!

طب الناس دى نتعامل ازاى معاهم !! و هل فى علاج ليهم؟!

ده هيبقى تكملة موضوعنا إن شاء الله المرة الجاية..

هتتفاجئوا من الحقائق اللى هنعرفها مع بعض 🙂

عن الكاتب

Shezlong Team

Shezlong Team

أول موقع للعلاج النفسى على الإنترنت فى الوطن العربى | اتكلم.. هنساعدك

www.Shezlong.com

error: المحتوي المدونة محمي بحقوق الحفظ ، من فضلك أتصل بنا