Article

اضطراب الشخصية التمثيلية. يااا للهول!

blog12 1 scaled

اضطراب الشخصية التمثيلية. يااا للهول!

“ريجينا جورج”، لو كانت مراهقتك في أوائل الألفينات، وكنت من متابعي الأفلام الأمريكية، فبالتأكيد علق بذاكرتك الاسم ده للبنت الجميلة الجذابة اللي جسدتها الممثلة رايتشل مكأدامز في فيلم “Mean girl”، البنت الثرية والمدللة، اللي بتحاول دايمًا تكون محط الاهتمام، وجذب الانتباه بشكلها ولبسها وتصرفاتها غير اللائقة أخلاقيًا، لإنها ما بتشوفش نفسها جميلة إلا من خلال عيون الآخرين، لو شوفت الفيلم من غير ما تكون دارس علم نفس هتدرك إن ريجينا بتعاني من اضطراب نفسي ما، ولما تقرا الكلام الجاي هاتعرف إنها بتعاني من اضطراب الشخصية التمثيلي “Histrionic Personality Disorder”.

كلمة “Histrionic” تعني “دراماتيكي أو مسرحي”، واضطراب الشخصية التمثيلية (HPD) هو واحد من المجموعة B  من الاضطرابات الشخصية، وبيتم تصنيف الاضطرابات في الفئة دي بشكل عام على إنها دراماتيكية أو عاطفية أو غير منتظمة، والأشخاص اللي  بيعانوا من الاضطرابات دي بتكون عندهم مشاعر حادة وغير مستقرة وصور ذاتية مشوهة.

وبشكل أكتر تحديدًا فالأشخاص المصابين  باضطراب الشخصية التمثيلية، بيعتمد تقديرهم لنفسهم على موافقة الآخرين ومبيكونش عندهم شعور حقيقي بقيمة الذات، وبيكون عندهم رغبة ملحة في أن يلاحظوا، وغالبا بيتصرفوا بشكل مثير أو غير لائق للحصول على الاهتمام، والنوع ده من الاضطراب نسبة الإصابة بيه لا تتجاوز الـ 3% بين سكان العالم، وبتؤكد الإحصاءات الحديثة إن مرض اضطراب الشخصية التمثيلي بينتشر بين النساء أكثر من الرجال، حيث تصاب بيه 4 سيدات مقابل رجل واحد، والنسبة دي رغم إنها  تبدو لصالح الرجالة إلا إنها ممكن تكون مش كده، لإن الدراسات أثبتت إن الرجالة بتنجذب للمرأة المصابة باضطراب الشخصية التمثيلية، وده لإنها بتتمتع بالحيوية والانفعالات القوية، وجاذبية خاصة لقدرتها على التعبير عن عواطفها بحرفية.

وعلشان تاخد بالك وتعرف أعراض اضطراب الشخصية التمثيلية، فوفقًا للدليل التشخيصي والإحصائي للاضطرابات العقلية الطبعة الخامسة، فالأشخاص المصابين باضطراب الشخصية التمثيلية بيعانوا من خمسة على الأقل من الأعراض دي:

 

  • غير مرتاح في المواقف اللي مابيكونش فيها مركز الاهتمام
    المصاب باضطراب الشخصية التمثيلية دايمًا بيدور على  الاهتمام، وما بيحسش بالراحة أو التقدير إلا لو كان مركز الاهتمام،  ودايمًا سلوكياته بيكون هدفها الحصول على الموافقة أو جذب الانتباه، ولو ده محصلش بيصاب بالاكتئاب والإحباط وعدم الرضا عن نفسه لإنه مش مركز الاهتمام، يعني لو نشر صورة وماخدش القدر اللي يرضيه من اللايكات بيحبط جدًا وصورته عن نفسه بتتهز.

 

  • علاقاته مع الآخرين تتميز بسلوكيات جنسية أو اغوائية غير  لائقة
    غالباً بيكون الشخص اللي  بيعاني من النوع ده من بيتصرف بشكل مبتذل سواء بالكلام أو الفعل، وبيحاول يجذب الأطراف اللي حوليه من النوع الآخر جنسيًا،وبيعتمد على الاغراء الجنسي في علاقاته الاجتماعية والعملية، بشكل ملحوظ للكل وبطريقة مش مقبولة اجتماعيًا وعلشان كده ما بيكونش عنده أصدقاء من نفس النوع، يعني الست المصابة بالاضطراب ده غالبا معندهاش صديقات ستات لانها بتشكل تهديد ومنافس، بالعامية بتخاف تخطف جوزها مثلًا.

 

  • مشاعره ومواقفه سطحية وبتتحول بسرعة
    المصاب ب HPD  بياخد قرارات سريعة مبالغ فيها ومتهورة من غير تفكير، زي التهديد بالانتحار أو الانفصال أو الهروب علشان يجذب الانتباه، ده غير إنه بيتحمس لقرار معين زي مشروع أو فكرة او شغل، بعدين يفقد حماسه بسرعة ويزهق، هو عمومًا بيزهق بسرعة وبيحس بالملل والاحباط خصوصًا مع الروتين اليومي.

 

  • بيستخدم باستمرار المظهر الجسدي لجذب الانتباه
    الشخص المصاب ب HPD أهم حاجة في حياته مظهره، جسمه، لبسه،  يعني الراجل دايمًا مهتم بالجيم والعضلات ودقنه، والبنت على تناسق جسمها ، وشعرها ومستحضرات تجميلها، دي طريقتهم لاثبات وجودهم، لإن دي وسيلتهم للاغواء.

 

  • أسلوبه في الكلام  مفرط في التعبيرية لكن مفيهوش تفاصيل
    الشخص المصاب ب HPD  كلامه مليان مبالغة ودراما، ولإن فيه ناس كتير بتحب تسمع النوع ده من الكلام، فالشخص ده بيكون جذاب في بداية العلاقة، بكلامه الساحر وحماسه لكلامه عن نفسه، وانفتاحه الواضح ، وغموضه في نفس الوقت، ومع ذلك فمعظم كلامه مركز على نفسه وذاته.

 

 

  • حركاته تمثيلية ومسرحية، وبيعبر عن عواطفه بشكل مبالغ فيه
    هو “over” بيبالغ في حركاته وتصرفاته، وكمان بينفعل بشكل مبالغ فيه زي ما يكون بيمثل، وبيفكر في كل حاجة بشكل عاطفي،  وغالبًا المصاب ب HPD بيعرض اصحابه للاحراج بسبب افراطه في المشاعر، زي مثلا إنه يحضن ناس بيقابلهم لأول مرة، يعيط وينهار لسبب تافه، يتعصب جدًا ويصرخ في مكان عام، وحاجات شبه كده.

مبالغته دي بتخليه شاطر في الشغل اللي بيتطلب إبداع وخيال وفاشل في شغل محتاج منطق وتحليل.

  • عنده قابلية للإيحاء، بيتأثر بسهولة بالناس والظروف المحيطة
    مشاعر ومزاج واهتمامات واراء الشخص المصاب ب HPD بتتأثر بسهولة وبسرعة جدًا وسهل يغير وفقًا للي حواليه، ممكن يكون متحمس لحاجة في البداية جدًا وبشوية تأثير صغيرين يفقد حماسه ويغير رأيه، حتى الاعراض الجسدية ممكن يتأثر فيها بالايحاء يعني لو اللي بياكل معاه جاله مغص هايقتنع ان هو كمان عنده مغص!

 

احجز جلسة مع معالج يمكنه مساعدتك فيما يتعلق بهذا الموضوع
( المراجعات)
عرض الصفحة الشخصية
( المراجعات)
عرض الصفحة الشخصية
( المراجعات)
عرض الصفحة الشخصية
( المراجعات)
عرض الصفحة الشخصية

 

  • اعتباره  العلاقات أكثر خصوصية مما هي عليه بالفعل
    الأفراد اللي بيعانوا من اضطراب الشخصية التمثيلية بيصفوا علاقتهم بالحميمية رغم إنها مش كده، بالعكس هما بيقابلوا صعوبة في تحقيق الحميمية العاطفية في العلاقات الرومانسية أو الجنسية، وبيهملوا العلاقات طويلة الأجل علشان يلاقوا فرصة لاثارة علاقات جديدة، وفيه علاقتهم بيحبوا يلعبوا أدوار ويتلاعبوا بالطرف التاني ويسيطروا على مشاعره.

 

أعراض الاضطراب معروفة لكن أسبابه مش معروفة، لكن العلماء بيرجحوا إنها بين علم الوراثة، وبين أحداث الطفولة زي إن الطفل كان مدلل واداؤه درامي للفت الانتباه ومكنش  بيتم تقويمه، وبغض النظر عن السبب فعادة أعراض HPD بتظهر في مرحلة البلوغ المبكر، ولو استمر الاضطراب من غير علاج، مضاعفاته بتوصل للانتحار نتيجة الاحساس بالاحباط لو محصلش المريض على الاهتمام اللي يرضيه، ده غير فشل في علاقاته وشغله، المضاعفات خطيرة رغم إن العلاج بسيط.

العلاج في حد ذاته بسيط، بيتمثل في العلاج النفسي بالكلام مع الدكتور المعالج علشان يحدد سبب سلوكيات المصاب، ويعلمه ازاي يتصرف مع الناس بشكل ايجابي من غير ما يستنى منهم الاهتمام، وممكن الطبيب المختص يوصف له أدوية مضادة للاكتئاب والقلق لو كانوا عرض من اعراض احباطه، لكن الجزء الاصعب من العلاج هو إن المريض يعترف بمرضه إنه محتاج مساعدة وعلاج علشان الطبيب يقدر يشخص مرضه ويعالجه، وساعتها حياته هاتكون أفضل.

المصادر:

https://psychcentral.com/disorders/histrionic-personality-disorder/

https://www.hopkinsmedicine.org/healthlibrary/conditions/recipes/

https://www.psychologytoday.com/us/conditions/histrionic-personality-disorder

https://psychcentral.com/disorders/histrionic-personality-disorder/

https://www.verywellmind.com/histrionic-personality-disorder-2795445

https://www.mayoclinic.org/ar/diseases-conditions/personality-disorders/symptoms-causes/syc-20354463

https://my.clevelandclinic.org/health/diseases/9743-histrionic-personality-disorder