أمراض نفسية مقالات مميزة

في بيتنا مدمن_الجزء الرابع

انا خفيت
نجوان ناجي
كتبت بواسطة نجوان ناجي

انا خفيت

(من قسم علاج الادمان في احدي المستشفيات النفسية)
المريض:دكتور انا حاسس اني خفيت خلاص هخرج امته؟؟؟
المعالج :كويس جدأأيعني حاسس ان صحتك احسن النهاردة ؟
المريض :جدأ يا دكتور انا كنت فين وبقيت فين ,,الحمد لله يعني المفروض اخرج بقي أنا بقالي عشرين يوم هنا كفاية كدا اوووي ,,,, انا هنا اتعلمت حاجات كتيير اوي واولها الصبر انا مكنتش كدا خالص ,,,,, وعمري ما افكر ارجع للمخدرات تاني انا فوقت خلاااص ولو اتحطت تحت رجلي كدا عمري ما ابصلها ,,,,
المعالج:هي فعلأ ممكن تكون المخدرات خرجت من جسمك بس في لسه حاجات كتيييير لازم تعرفها هنا عشان متوقعش تاااني وتكمل تعافي لان الأدمان مرض مش بالبساطة دي….
المريض:أنا اصلأ مش مدمن زي ما انت فاكر يا دكتوور دا جت معايا كدا بالصدفة وبعدين انا اما بطلت قبل كدا يعني بأخدها بمزاجي مش هي اللي مسيطرة عليا وبعدين اصل انا عندي امتحانات الترم اول الشهر ولازم الحق اذاكر واروح الكورسات ,,, عشان بس السنه متروحش عليا,,,,

ومن هنا بتبدأ اول مراحل العلاج اللي بنلاحظها في المريض اول ما بيعدي بمرحلة انسحاب المخدر من جسمه واول ما يقدر يقف ويأخد نفسه ,,,,,يقول انا كدا بقيت تمااام انا خفيت الحمد لله ,,,,ودي طبعآ مرحلة الإنكار وفيها ممكن يقول المريض انا مش مدمن ,او بيقلل من حجم المشكلة ,او يتكلم في مشكلة اكبر ويقولك اي حد مكاني لازم يشرب ,وممكن اووي يكون هائج ويبدأ ف العصبية والتكسير ,,وكمان يعيش في دور كبش الفداء مثلآ يقولك “لوعايش مع ابويا لازم تضرب” ,,ويبدأ يعطيك مبررات “انا بأخد عشان اعرف اشتغل او اذاكر” ,,,وممكن بقي يقولك سبب علمي ويكلمك في جينات الوراثة ,او يقارن نفسه بحد كان مدمن او مدخن ومات وعندة 90 سنة مثلآ ,,يقولك “انا اول ماشفت وشك السمح انا خلاص بطلت” او “انا عندي فيرس “سي” ف هبطل مينفعش اكمل” وممكن ببساطة يقولك ” انا مدمن ودا حقي وعارف وهكمل”,,,,,

كل اللي فات دا بيكون المريض مش مدرك ان في مشكلة اصلآ وكمان ممكن يقول “دا انا اهلي اللي عاوزيين يتعالجوا مش انا”,,,وكلام كتير من دا بنسمعه وكل دا بيكون في مرحلة ما قبل التفكير ,,لكن بعد ما يمر المريض بالمرحلة دي مع المعالج اللي بيكون هدفه وقتها انة يوصل للمريض انه فعلأ عندة مشكلة وكل دا في المستشفي اللي هو محجوز فيها ,, وفي اللحظة اللي بيدرك فيها المريض انه فعلآ في مشكلة بتبدأ المرحلة التانية من رحلة التغيير وهي التفكيرفي القرار,,,ومن هنا بيبدأ المعالج يطلب منه كشف خساير وارباح للاستمرارية في المخدرات ولتبطيلها,,,وفي الوقت دا بيمر المريض بصراعات كتير اوي وازدواج وجداني في ما بين انه يبطل ولا يكمل!!!!!

وكلنا لازم نبقي عارفيين ان قرار التغيير دا مش حاجة سهلة بالعكس اذا كان بيبقي صعب علي الناس اللي عادية ,مش هيبقي صعب المدمن ,,,
وتيجي بعدها مرحلة القرار ودي مرحلة مهمه جدأ ولكنها من غير الفعل مفيش لها اي اهمية ,,,لكن لما بيأخد المريض القرار ويبدأ في الفعل ويطلب المساعدة من المعالج ويبدأ فعلأ يغير من سلوكه وتوجيهاته ,,,فا دا بيخليه يثق في نفسه اكتر كل ما تمر فترة وهو في المرحلة دي,,

ويبدأ المريض يبدأ برنامج التأهيل السلوكي في الهاف واي وهو مكون من 12 خطوة ويبدأ يتابع مع مشرف للبرنامج بتاعه بعد ما يقرأ كتاب مرشد عمل الخطوات ويمشي فيه وبيكون قائم علي المشاركة المستمرة مع المعالجين وبيقعد فترة حوالي ستة شهور في المكان العلاج ويبدأ يمارس يومه كاملأ مع زملائه وبيحس وقتها انه دخل عالم جديد وبيكون مستغرب ,,,لكنه في نفس الوقت بيحس انه مقبول في المكان دا وكمان بيحس انه مش لوحدة وان في ناس شبهه,,ويبدأ يحس بالأمان ..وبيكون يوم المريض كله انشطة وفقرات مثل التأمل والعلاج الجمعي و الجلسات الفردية وممارسة الرياضة والكثير من الأنشطة ,,,,وبعد ما بيخلص المريض مرحلة الهاف واي ويتخرج من المكان العلاج بيفضل مكمل ومتابع مع مشرف البرنامج و مدوامة حضور اجتماعات رابطة المدمنين المتعافين ,,,لان الأدمان برنامج تعافي مستمر طول الحياة ومفيش في ارادة ولكن فيه استمرارية خطوات التعافي وكلما زادت مدة التعافي تزيد ثقة المدمن في نفسة ولكن يجب ان يظل حذر من الوقوع فيه مره اخره .

عن الكاتب

نجوان ناجي

نجوان ناجي

error: المحتوي المدونة محمي بحقوق الحفظ ، من فضلك أتصل بنا